Belenga ifyacitikiile Karina, no kwelenganya ukuti ni we filecitikila. Bushe nga ni we finshi wingacita?

 Karina: “Nale-ensha motoka pa kuya ku sukulu ninshi nimbutusha, e lyo bakapokola banjiminika no kumpeela umulandu. Nalifulilwe sana! Nalyebeleko bamayo, nabo batile nalingile no kwebako batata. Lelo nshalefwaya ukubeba.”

  Finshi Wingacita?

1.  A: Takuli kubeba, kuti wafwaya fye ukuti bekeshiba.

2.  B: Kweba bawiso fyonse ifyacicitika.

 Kuti wafwaya ukusala pali A. Nalimo kuti watontonkanya ukuti banoko bakamona kwati waliyabeba bawiso. Lelo kwaliba ubusuma butatu ubufwile ukulenga wayebelela nga walufyanya, nampo nga ni pa kwensha motoka nelyo icili conse ico wingalufyanya.

1.  1. Cisuma ukusumina nga walufyanya. Baibolo ilanda pa fyo Abena Kristu bafwile ukuba ilyo itila: “Tufwaya ukuba aba cishinka muli fyonse.”​—AbaHebere 13:18.

    Alexis atile: “Ndesha na maka ukuba uwa cishinka no kusumina bwangu bwangu nga nalufyanya.”

2.  2. Pantu abantu cilabangukila ukwelela umuntu nga asumina ukuti nalufyanya. Baibolo itila: “Uufimba pa fibi ifyo acitile takashuke, lelo uufisokolola no kufileka akabelelwa uluse.”​—Amapinda 28:13.

    Richard atile: “Ulingile ukushipa pa kusumina ukuti naulufyanya, lelo nga wasumina e lyo abantu bengakucetekela. Baleshiba ukuti uli wa cishinka. Nga wasumina icilubo, nangu ifintu fyacibipa, kuti fyawama.”

3.  3. Ne cacindamisha ca kuti, Yehova Lesa alomfwa bwino. Baibolo itila: “Uwa bucenjeshi wa bunani kuli Yehova, lelo abalungama e baba bacibusa bakwe.”​—Amapinda 3:32.

    Rachel atile: “Ilyo napangile icilubo icikalamba, nalilwike ukuti nalingile ukuyebelela. Yehova nga tampaalile nkaana ukucita ico afwaya.”

 E co, bushe Karina acitile shani ilyo alufyenye? Taebele bawishi ukuti alipangile umulandu pa musebo. Na lyo line balisukile baishiba. Atile: “Pa numa ya mwaka umo ilyo batata balemona mu fipepala fya inshuwalansi, basangile icipepala bampeelelepo umulandu wa kubutusha motoka. Balinkalipile, na bamayo balifulilwe sana pantu nshacitile ifyo banjebele!”

 Ifyo nasambilileko: Karina atile: “Ukufisa umulandu kulenga fye ifintu ukubipilako, pantu umulandu taubola!”

 Bonse tulalufyanya. (Abena Roma 3:23; 1 Yohane 1:8) Nga fintu twamona, ukusumina umulandu ilyo line fye walufyanya kulanga fye ukuti wali-icefya kabili ulakonka ifyo Lesa atweba.

 Icakonkapo kusambililako ku filubo wapanga. Ku ca bulanda, abacaice bamo tabasambililako ku filubo bapanga! Nalimo bomfwa ifyo Priscilla, umupungwe aumfwile inshita imo. Atile: “Nalefupuulwa sana nga nalufyanya. Apo nali-isuulile sana, ifilubo nalepanga nalefimona kwati fikalamba icine cine. Nalesakamikwa sana kabili nalemona fye kwati ndi wa cabecabe.”

 Bushe na iwe ulomfwako ifyo limo? Nga ulomfwako ifyo, uleibukisha ukuti: Umuntu uwikalila fye ukutontonkanya pa filubo apangile kale aba kwati ni namutekenya uwikalila fye ukulolesha ku numa ilyo ale-ensha motoka. Ukulatontonkanya pa filubo wacitile kale kuti kwalenga walaimona kwati tawacindama kabili kuti wafilwa no kupwisha amafya wingakwata ku ntanshi.

 Kanshi taufwile ukwikalila fye ukutontonkanya pa filubo wacitile.

 Elliot atile: “Ufwile ukutontonkanya pa filubo wacitile no kusambililako. Lelo taufwile ukwikalila fye ukutontonkanyapo ica kuti fyakuletela no bulanda.”

 Vera atile: “Ndesha ukutontonkanya pa filubo mpanga no kusambililako fimo ku cilubo cimo na cimo ifingalenga nalacita ifisuma e lyo no kukanabwekeshapo ico icilubo. E fyo cifwile ukuba, pantu nga ulecita ifyo e lyo wingasambilila ukucita icalungama.”