Ilyo imyaka ya ba 1930 yaletendeka, Inte sha kwa Yehova tababililepo imbila nsuma ku Indonesia, ku Malaysia, na ku Papua New Guinea. Cali shani pa kuti imbila nsuma ifike kuli ifi fyalo? Pa kuti imbila nsuma ibilwe muli ifi fyalo, iofeshi lya musambo ilya ku Australia (ilyo beta pali ino nshita ukuti iofeshi lya musambo ilya Australasia) lyalishitile ubwato bwa injini ubwalepele amamita 16. Baleita ubu ubwato ukuti Lightbearer (Ubwato ubusenda ulubuuto), pantu e bo ibumba lya bamunyinefwe abalebomba bupainiya * babomfeshe ukutwala icine icaba ngo lubuuto ku fyalo fyabelele ukutali.—Mateo 5:14-16.

 Mu February mu 1935, bapainiya 7 baile no bu bwato ukufuma mu musumba wa Sydney, uwabela ku lulamba lwa bemba ku kabanga ka calo ca Australia, pa kuti baye ku cabu caba mu musumba wa Port Moresby mu calo ca New Guinea. Baleya baleipaya isabi lya kulya mu nshila kabili baleiminina pa fyabu pa kuti babike amafuta mu bwato, bashite ifya kulya, no kulungisha ubwato. Pa 10 April mu 1935, balimine ubulendo ukufuma mwi tauni lya Cooktown, ku Queensland. Nangu ca kuti limo balebomfya amatanga ya bwato, babomfeshe injini ilyo balepita umwali sana amabwe no mucanga. Lelo baumfwile injini yatendeka ukupanga sana icongo ica kuti bali-ishimishe. Nomba bushe bali no kubwelelamo nelyo bali no kutendeka ukubomfya amatanga? Munyinefwe Eric Ewins uwale-ensha ubwato atile, “tatwalefwaya nangu panono ukubwelelamo.” E co ubwato bwa Lightbearer bwalyendele bwino mpaka bwafika pa cabu ca Port Moresby pa 28 April mu 1935.

 Lyena makanika alilungishe injini ya bwato kabili balya bamunyinefwe, ukufumyako fye munyinefwe Frank Dewar, balibilile imbila nsuma mu musumba wa Port Moresby. Ba Frank abo umwaume umo alandile ukuti “bali ni bapainiya abalebombesha” batile: ‘Nalisendele ifitabo ifingi no kwenda amakilomita 32 nelyo ukucilapo no kuya mu kati ka musumba pa kuti mbile imbila nsuma ku baleikala kuli ilya incende.’ Pa kubwela uyu munyinefwe apitile inshila imbi uko aileabuka akamana akanono umwali ing’wena. Lelo alibikileko sana amano pa kwabuka aka akamana ica kuti alibwelele fye umutende. Mu fyo bamunyinefwe babombeshe mwalifumine ifisuma. Mu kupita kwa nshita abantu bamo abapokeleko impapulo balishileba Inte sha kwa Yehova.

 Ilyo balungishe injini ya bwato, balifumine pa Port Moresby no kulungama ku cishi ca Java icali mu calo baleita ukuti Dutch East Indies (ino nshita e ncende iikalamba iya Indonesia). Pa numa ya kwiminina mu ncende shalekanalekana apo baleshita ifyo balekabila, aba bamunyinefwe bailefika mu musumba wa Batavia (ino nshita musumba wa Jakarta) pa 15 July mu 1935.

 Ilyo bafikile ku Batavia, ba Charles Harris abali pali lilya ibumba balishele mu Java kabili balitwalilile ukuba abacincila ilyo balebila imbila nsuma muli ilya ncende. * Balandile ukuti: “Pali ilya nshita, ifyo twalecita pa kubila imbila nsuma kupeela sana abantu impapulo shilanda pali Baibolo, lyena twaleya kwi tauni limbi. Nalisendele impapulo sha ciArabic, iciChinese, iciDutch, iciNgeleshi, ne ciIndonesian. Abantu abengi balipokeleko impapulo ica kuti mu mwaka fye umo impapulo napeele abantu shalifikile 17,000.”

 Abalashi ba buteko bwa Dutch balishibe munyinefwe Charles pantu alebombesha mu mulimo wa kubila imbila nsuma. Bushiku bumo umulashi aipwishe Nte umbi uwalebila imbila nsuma mu Java impendwa ya ba Nte abalebila imbila nsuma ku kabanga ka Java, uko ba Charles balebombela. Munyinefwe aaswike ukuti “kwaba fye umo.” Lyena umulashi alisasukiile munyinefwe no kumweba ati: “Te kuti nsumine ifyo ulelanda! Mufwile mwalikwata ba Nte abengi ababombela kuli ilya ncende, pantu nalimona impapulo ubwingi isho mupeela abantu.”

 Bamunyinefwe balimine ukufuma ku Indonesia no bwato bwa Lightbearer ukuya ku Singapore uko bafikile pa 7 August. Ponse apo baleiminina, bamunyinefwe balelisha amalyashi ayakopwa ukubomfya icilimba cali mu bwato pa kuti abantu abengi bomfwe. Ilingi line iyi inshila balebililamo imbila nsuma yalelenga abantu abengi ukufwaya ukukutika. Na kuba mu nyunshipepala ya Singapore Free Press balembelemo ukuti “pali Citatu ubushiku abantu abengi baleumfwa ishiwi ilikalamba lilelanda kabili baleumfwa fyonse ifyalelandwa.” Muli iyi inyunshipepala balembelemo no kuti: “Lyali lyashi ilisuma nga shi ilyalefuma ku cilimba ico balelisha mu bwato bwa ‘Lightbearer.’ Ukufuma apo ubu bwato bwaishila ku Singapore ukufuma ku Australia, balalisha amalyashi ayasuma ayo bakopela limo aya Watch Tower.” Na kabili iyi inyunshipepala yalandile ukutila “nga ca kuti imiceele ili fye bwino amalyashi balelisha kuti yaumfwika ukufika ukutali, nalimo amakilomita yatatu nelyo yane.”

 Ilyo ubwato bwa Lightbearer bwali ku Singapore, ba Frank Dewar balifumine pali lilya ibumba lyali no bwato no kuya mukubombela kumbi. Ba Frank balilandile ifyo cali pa kuti bafume pali ili ibumba, batile: “Twalitendeke ukubomba bupainiya mu Singapore kabili twalitwalilile ukwikala mu bwato. Nomba ilyo inshita yafikile iya kuti twime no bwato ukufuma ku Singapore, ba Eric Ewins banjebele amashiwi ayamputwile umusana. Batile: ‘Ba Frank, mwasalile ukulabombela mu Siam (iyo beta pali ino nshita ukuti Thailand). Nomba twalapelela pano pene tatwakafike ku Siam. Kanshi kuti mwai-ila mwe bene!’ Calimpapwishe ica kuti nalifililwe no kulanda bwino, natile: ‘Nshaishiba ukwabela Siam, nalaenda shani!’” Ba Eric baebele ba Frank ukutila kuti bayanina ishitima ku Kuala Lumpur, incende iyaba mu calo beta pali ino nshita ukuti Malaysia. Ba Frank balyumfwilile ifyo babebele kabili balile ku Kuala Lumpur. Ilyo papitile imyeshi iingi, balifikile ku Thailand. *

 Ilyo ubwato bwa Lightbearer bwaleya ku masamba ya Malaysia, bwaliminine pa Johore Bahru, pa Muar, pa Malacca, pa Klang, pa Port Swettenham (iyo beta pali ino nshita ukuti Port Klang), na pa Penang. Pa fyabu fyonse ifyo baleimininapo, aba bamunyinefwe balelisha amalyashi ya Baibolo ayo bakopela limo ukubomfya icilimba cali mu bwato. Ba Jean Deschamp ba Nte abalebombela mu Indonesia batile: “Abantu baletemwa nga nshi nga bamona ubwato bwa Lightbearer ukucila ifyo baletemwa nga bamona akandeke beta ukuti flying saucer.” Pa numa ya kupwisha ukulisha amalyashi, bamunyinefwe baleya ku lulamba lwa bemba mu kupeela abantu impapulo abalefwaya ukusambilila icine.

 Ilyo bamunyinefwe bafumine ku Penang, bapitile no bwato pa ncende beta ukuti Strait of Malacca no kuya ku musumba wa Medan mu Sumatra (ino nshita yaba mu Indonesia). Ba Eric Ewins balandile ukuti: “Twalibombele bwino sana umulimo mu musumba wa Medan, kabili abantu abengi balitemenwe ukukutika ku mbila nsuma.” Bamunyinefwe balipeele abantu impapulo nalimo 3,000 muli ilya ncende.

 Ilyo ubwato bwakonkenyepo ukuya ku kapinda ka ku kulyo, bamunyinefwe balebila imbila nsuma pa fyabu fyaba ku kabanga ka cishi ca Sumatra. Mu November mu 1936, ubwato bwa Lightbearer bwalibwelelemo ku Singapore, uko ba Eric Ewins baileshala. Ilyo papitile imilungu iinono, ba Eric Ewins balyupile ba Irene Struys ba Nte abaleikala ku Singapore. Ba Eric na ba Irene balitwalilile ukubomba bupainiya mu Sumatra. Kanshi balingile ukufwaya umbi uwa kwensha ubwato bwa Lightbearer.

 Abatendeke ukwensha ubwato ni ba Norman Senior, abasambilile bwino ifya kwensha amato. Bafikile mu January mu 1937 ukufuma ku Sydney. Lyena aba bamunyinefwe balimine ukufuma ku Singapore ukuya ku Borneo na ku Celebes (iyo beta pali ino nshita ukuti Sulawesi), uko babombele sana umulimo wa kubila imbila nsuma, kabili balifikile na ku ncende ukutali sana ukwalepele amakilomita 480.

 Ilyo ubwato bwafikile pa cabu ca Samarinda pa cishi ca Borneo, umukalamba wa pa cabu alikene ukusuminisha bamunyinefwe ukushimikila abantu ba kuli ilya incende. Lelo ilyo ba Norman bamulondolwelele ifyo tubomba umulimo wesu uwa kubila imbila nsuma, alibasuminishe ukushimikila kabili alipokeleko ne mpapulo.

 Inshita imbi shimapepo umo aitile ba Norman ukuti baye bashimikileko na mwi calici lyakwe. Lelo mu cifulo ca kuti ba Norman baye mu kulanda ilyashi, basalilepo ukulisha amalyashi ya Baibolo 5 ukubomfya icilimba baleita ukuti phonograph, kabili shimapepo aliyatemenwe icine cine. Alisendelepo ne mpapulo shimo isha kupeelako abanankwe. Uyu e shimapepo fye wasumine ukukutika imbila nsuma pali bashimapepo bonse abali muli ilya ncende. Bashimapepo abengi tabatemenwe umulimo Inte sha kwa Yehova balebomba. Na kuba balifulilwe nga nshi pa fyo ili ibumba lya bamunyinefwe lyalebombesha umulimo wa kushimikila ica kuti baebele abalashi ba buteko ukutila babinde ubwato baleita ukuti Lightbearer ukulaya pa fyabu.

 Pa mulandu wa kuti bashimapepo balipatikishe ubuteko ukubinda ubwato bwa Lightbearer, bamunyinefwe balibwelelemo ku Australia. Ilyo bamunyinefwe baleya, baliminine pa cabu ca mu Sydney pa kuti basangwe ku kulongana kwa citungu ukwa Nte sha kwa Yehova ukwaliko mu April mu 1938. Pali ilya nshita ninshi napapita imyaka ukucila itatu ukufuma apo ubwato bwa Lightbearer bwafumine mu Sydney. Mu kutendeka kwa ba 1940, ilyo papitile fye inshita iinono ukufuma apo babindile umulimo wa Nte sha kwa Yehova mu Australia, ubwato balibushitishe. Munyinefwe Ewins alondolwele ukuti: “Imyaka nabombele no bwato bwa Lightbearer, yali myaka ya nsansa nga nshi iyo nshakabale ndaba.” Alandile no kuti: “Bulya bwato bwalibombele umulimo wa buko.”

 Bamunyinefwe ababombele no bwato bwa Lightbearer balitandile imbuto sha Bufumu mu ncende iikalamba kabili ku bantu abengi nga nshi. Kabili nangu ca kuti balebakanya, mu kupita kwa nshita imbuto batandile shalitwele ifisabo. (Luka 8:11, 15) Ici ca cine, pantu na kuba mu ncende umo balya bapainiya babilile imbila nsuma, pali ino nshita mwaba bakabila ba mbila nsuma ya Bufumu ukucila pali 40,000. Ala aba bamunyinefwe no bwato baleita ukuti Lightbearer, ubo balebomfya ukusabankanya ulubuuto lwa cine ca mu Baibolo, balibombele umulimo uusuma nga nshi uo tushakalabe kabili tulingile ukulabapashanya!