Ibuuku lya Kubalilapo Ilya kwa Samwele 3:1-21
-
Samwele bamusala ukuba kasesema (1-21)
3 Pali ilya nshita umwaice Samwele alebombela+ Yehova kabili Eli e walemutungulula, lelo muli isho inshiku Yehova alelanda fye na bantu limo limo; ifimonwa+ tafyaseekele.
2 Bushiku bumo Eli alileele mu muputule wakwe, kabili apo talemwenekesha, alefilwa ukumona bwino.+
3 Inyali ya kwa Lesa+ yali tailashima kabili Samwele aleele mwi tempele*+ lya kwa Yehova, umwali Icipao ca kwa Lesa.
4 Lyena Yehova aitile Samwele. Na o ayaswike ati: “Ndi pano mukwai.”
5 Abutukiile kuli Eli no kumweba ati: “Mukwai naisa, pantu nacumfwa mwanjita.” Lelo Eli amwebele ati: “Awe nshacikwita. Bwelelamo kalaale.” E ico alibwelelemo ayalaala.
6 Yehova alibwekeshepo ukumwita ati: “Samwele!” Na o Samwele alimine aya kuli Eli e lyo amweba ati: “Mukwai naisa, pantu nacumfwa mwanjita.” Lelo Eli amwebele ati: “Awe nshacikwita mwana wandi. Bwelelamo kalaale.”
7 (Nomba Samwele ali talaishiba bwino bwino Yehova, kabili ninshi Yehova talamwebapo amashiwi yakwe nangu yamo.)+
8 E ico Yehova abwekeshepo ukumwita pa muku walenga butatu ati: “Samwele!” Na o alimine aya kuli Eli e lyo amweba ati: “Mukwai naisa, pantu mwacinjita.”
Lyena Eli alilwike ukuti ni Yehova aleita uyu mwaice.
9 E ico Eli aebele Samwele ati: “Kabiye kalaale, kabili nga akwita, ufwile ukwasuka auti, ‘Landeni mwe Yehova, pantu umubomfi wenu alekutika.’” E fyo Samwele abwelelemo ayalaala.
10 Yehova aileiminina apo Samwele aleele, e lyo alamwita nga fintu alemwita pa kubala. Amwitile ati: “Samwele, Samwele!” Na o Samwele ayaswike ati: “Mukwai landeni, pantu umubomfi wenu alekutika.”
11 Yehova aebele Samwele ati: “Mona! Ndi no kucita icintu mu Israele ica kuti onse uukacumfwa, cikamupesha amano.+
12 Muli ubo bushiku nkacita fyonse ifyo nalandile+ ukuti e fyo nkacita pa ba mu ng’anda ya kwa Eli.
13 Ufwile ukumweba ukuti ubupingushi ubo ndepingula aba mu ng’anda yakwe pa filubo ifyo aishiba+ bwa muyayaya. Alishiba ukuti abana bakwe abaume balasaalula Lesa,+ lelo tabakalipila.+
14 E mulandu wine nalapila pa ba mu ng’anda ya kwa Eli ukuti takwakabe ilambo nelyo umutuulo+ uukafuta ifilubo fyabo.”
15 Samwele alileele mpaka ulucelo. Lyena aiswile ifiibi fya ng’anda ya kwa Yehova. Nomba Samwele alitiinine ukweba Eli ifyo amwene mu cimonwa.
16 Lelo Eli aitile Samwele ati: “Samwele, mwana wandi!” Na o ayaswike ati: “Mukwai.”
17 Lyena amwipwishe ati: “Finshi acikweba? Wimfisa. Lesa akukande sana nga ca kuti walamfisapo cimo pali fyonse ifyo acikweba.”
18 E ico Samwele alimwebele fyonse, tamufishilepo nangu cimo. E lyo Eli alandile ati: “Kufwaya kwa kwa Yehova. Nacite ico alemona ukuti e cisuma.”
19 Samwele alekula, kabili Yehova ali nankwe+ ica kuti alengele fyonse ifyo alandile fyafikilishiwa.
20 Ifi fyalengele abena Israele bonse ukufuma ku Dani ukufika ku Beere-sheba beshibe ukuti Samwele ali ni kasesema wa kwa Yehova.
21 Awe Yehova alemoneka mu Shilo, pantu Yehova alengele Samwele amwishiba mu Shilo ukupitila mu cebo ca kwa Yehova.+
Amafutunoti
^ E kutila, itenti lya mushilo.
