Esaya 30:1-33
30 “We bulanda ku bana+ bacintomfwa,” e fyo Yehova alanda,“Abacita ifyo bapanga, lelo ifyo nshabebele,+Abapangana ifipangano* ukwabula ukuti umupashi wandi ubatungulule,Pa kuti balunde pa lubembu bacita.
2 Balaya ku Egupti+ ukwabula ukunjipusha,*+Pa kuti Farao abacingilileKabili pa kuti boobe mu cintelelwe ca Egupti.
3 Lelo ukuya kuli Farao pa kuti amucingilile* kukalenga mukomfwe nsoni,Ukuuba mu cintelelwe ca Egupti kukalenga mukaseebane.+
4 Pantu intungulushi shakwe shili mu Soani,+Kabili inkombe shakwe nashifika ku Hanese.
5 Bonse bakabaseebanyaKu bantu abashingabacitila ifisuma,Abashibafwa kabili abashingabacitila ifisuma,Balenga fye baumfwa insoni kabili baseebana.”+
6 Ubu e bukombe bwa bupingushi pa finama fya ku kapinda ka ku kulyo:
Mu calo umwaba amacushi na mafya,Umwaba inkalamo, inkalamo iibuluma,Umwaba amafwafwa ne nsoka iipupuka kabili iifumya umulilo,*Basendela ifyuma fyabo pa mpundaNe fya bupe fyabo bafisendela pa ntengele sha ngamila.
Lelo ifi fintu tafyakafwe abantu.
7 Pantu ukwafwa kwa kwa Egupti kwa fye.+
E co imwinikiile ati: “Rahabu+ uwikala fye ukwabula ukucita nangu cimo.”
8 “Nomba kabiye, kalembe ifi pe libwe lyapapaatala,Kabili ufilembe na mwi buuku,+Pa kuti ku ntanshiFikabe kambone+ wa muyayaya.
9 Pantu aba bantu ni bacintomfwa,+ bana ba bucenjeshi,+Bana abashifwaya ukumfwa amafunde* ya kwa Yehova.+
10 Beba abeluka ifimonwa abati, ‘Mwilailuka,’
Kabili beba abamona ifimonwa abati, ‘Mwilatweba ifimonwa+ fya cine.
Muletweba fye ifisuma;* mulemona ifimonwa+ fya bucenjeshi.
11 Pasukeni; fumeni mu nshila.
Lekeni ukubika pa ntanshi yesu Uwa Mushilo wa kwa Israele.’”+
12 E ico Uwa Mushilo wa kwa Israele alanda ati:
“Apo mwakaana ifyo nandile+Kabili mwacetekela ubucenjeshi ne fya bufiKabili e fyo mwashintililapo,+
13 E ico pa mulandu wa cilubo mucitile, muli nge cibumba icalepuka,Muli nge cibumba icitali icabeyama icili mu kuwa.
Cikawa bwangu bwangu mu kupumikisha.
14 Cikabongoloka nga filya umutondo uukalamba uwa kwa nakabumba utobaika,Ulatobaika ica kuti takushala ne ci-inga nangu cimoIco umuntu engabomfya ukulapwilako umulilo pe shiko,Nelyo ico engatapwilako amenshi mu cilindi.”*
15 Pantu Shikulu Mulopwe Yehova, Uwa Mushilo uwa kwa Israele, alanda ati:
“Nga mwabwelela kuli ine no kutuusha, mukapusuka;Amaka yenu yakaba mu kuteka umutima na mu kucetekela.”+
Lelo tamwalefwaya.+
16 Mwalandile amuti: “Tatulefwaya, tukafulumuka ninshi natunina pali bakabalwe!”
Ca cine mukafulumuka.
Mwalandile no kuti: “Kabili tukanina+ pali bakabalwe ababutukisha!”
E ico abakalamupepeka bakalabutukisha.+
17 Abantu 1,000 bakatutuma umuntu umo+ nga abatiinya;Abantu 5 nga bamutiinya mukafulumukaMpaka uukashalapo pali imwe akabe nge cimuti icitali ico baimika pa muulu wa lupili,Kabili akabe nge cishibilo pa kapili.+
18 Lelo Yehova alitekanya kabili alalolela pa kuti amulange icikuuku,+Kabili akema pa kuti akamubelele uluse.+
Pantu Yehova ni Lesa wa mulinganya.+
Ba nsansa bonse abatwalilila ukumulolela.+
19 Ilyo abantu bakekala mu Sione mu Yerusalemu,+ tawakalooshe.+ Nangu cibe shani akakumfwila uluse ilyo ukalilila kuli ena ukuti akwafwe; akakwasuka ilyo akomfwa+ fye ishiwi lyobe.
20 Nangu ca kuti Yehova akamupeela amafya nge fya kulya, no bucushi+ nga menshi, Kasambilisha wenu Uwapulamo takafisame na kabili, amenso yenu yakamona Kasambilisha wenu Uwapulamo.+
21 Kabili nga mwafuma mu nshila mwaya ku kulyo nelyo ku kuso,+ amatwi yenu yakomfwa ishiwi ku numa yenu lileti: “Iyi e nshila.+ E mo mwende.”
22 Kabili mukakowesha ifilubi ifyo babikako silfere ne fimpashanya+ fya cela* ifyo babikako golde. Mukafipoosa nga filya umwanakashi apoosa insalu iyo abomfya nga ali ku mweshi, kabili mukafyeba amuti, “Namupoosa!”*+
23 Kabili akalosha imfula pa kuti imbuto mwabyala+ shikamene, kabili ifya kulya ifyo mukasombola fikafula kabili fikaba ifisuma.*+ Muli bulya bushiku, ifitekwa fyenu fikalya umulemfwe+ mu ncende iikalamba.
24 Kabili ing’ombe ne mpunda ishilima shikalya ifya kulya ifisuma ifyo basaakanya, ifyo bafumyako amakapa ukubomfya fosholo ne ca kwelelako.
25 Kabili mu bushiku kukaba ukwipaya kukalamba, ilyo impungu shikawa, pa lupili lonse ulutali na pa kapili konse akatali pakaba imilonga ne mimana.+
26 Kabili ulubuuto lwa mweshi uwabulungana lukaba ngo lubuuto lwa kasuba; kabili ulubuuto lwa kasuba lukabalikilako+ imiku 7, lukaba ngo lubuuto lwa nshiku 7, mu bushiku Yehova akakaka apo abantu+ bakwe baicena* kabili akaposha ifilonda fyabo ifyabipisha ifyo bakwete ilyo abomine.+
27 Moneni! Ishina lya kuti Yehova lileisa ukufuma ukutali,Lilebilima ngo mulilo ku bukali kabili lileisa na makumbi ayafiita.
Imilomo yakwe iswilepo ubukali,Kabili ululimi lwakwe luli ngo mulilo+ uonaula.
28 Umupashi* wakwe ukaba ngo mumana uwapoosa ica kuti amenshi yafika na mu mukoshi,Pa kuti asunkanye inko pali seefa ya bonaushi;*Kabili abantu bakakwata umukobelo mu nsekete+ shabo uukalabafumya mu nshila.
29 Lelo ulwimbo lwenu lukaba ngo lwimbo mwimba mu nshita ya bushikuIlyo mulepekanya umutebeto,*+Kabili umutima wenu ukasekelelaNga filya umuntu uule-enda ninshi alelisha umutoolilo* asekelelaIlyo aleya ku lupili lwa kwa Yehova, ku Cilibwe ca kwa Israele.+
30 Yehova akalenga ishiwi+ lyakwe ilya maka nga nshi likomfwikeKabili akalenga bakamone ukuboko+ kwakwe kuleisa no bukali+ ubukalamba,No lubingu lwa mulilo+ uonaula,No kubulukuta+ no mwela uukalamba ne mfula ya mabwe.+
31 Pantu pa mulandu we shiwi lya kwa Yehova, Asiria akatiina nga nshi;+Akoma Asiria ne nkonto.+
32 Lyonse ilyo Yehova auma abena Asiria ne nkonto ya kukandilako,Kukalaba iciunda ca tuoma twa nyenjele ne ca nsango,+Ilyo aimya ukuboko kwakwe pa kuti alwe+ nabo.
33 Pantu Tofete*+ yakwe nabaipekanya kale;Ne mfumu+ nabaipekanishisha Tofete.
Nalenga icilindi ca kubikamo inkuni cashika kabili cakula,Muli inkuni ishingi no mulilo
Umupu wa kwa Yehova uwaba ngo mumana wa mingu,Ukoca Tofete.
Amafutunoti
^ Mu ciHebere, “Abapongolola umutuulo wa fya kunwa,” ifi nalimo fyaleimininako ukupangana icipangano.
^ Nelyo “ukwabula ukwipusha akanwa kandi.”
^ Mu ciHebere, “pa kuti boobe mu cifulo icacingililwa ica kwa Farao.”
^ Nelyo “insoka iyangufyanya pa kwenda kabili iya busungu.”
^ Nelyo “ifya kukonka.”
^ Mu ciHebere, “Muletweba fye ifyatelela.”
^ Nelyo kuti yapilibula no kuti, “icishima.”
^ Nelyo “ifimpashanya ifyaengwa.”
^ Nelyo kuti yapilibula no kuti, “kabili mukafiita ukuti fiko.”
^ Mu ciHebere, “fikaba ifya mafuta kabili ifyanona.”
^ Nelyo “apo baifuna.”
^ Mu ciHebere, “seefa ya kuseefelako ifisooso.”
^ Nelyo “Umupu.”
^ Nelyo “Ilyo muleisangulula pa kuti mukwate umutebeto.”
^ Nelyo “uwenda ninshi balelisha umutoolilo.”
^ Iyi Tofete balandilepo muli ici cikomo, cifulo ca mampalanya ica kocelamo ifintu, icimininako ubonaushi.
