Esaya 7:1-25
7 Nomba mu nshiku sha kwa Ahasi+ umwana wa kwa Yotamu, umwana wa kwa Usia, imfumu ya Yuda, e mo Resini imfumu ya Siria na Peka+ umwana wa kwa Remalia, imfumu ya Israele, baile ku musumba wa Yerusalemu mu kulwa na o, lelo alifililwe* uku-ucimfya.+
2 Kwali abaile-eba aba mu ng’anda ya kwa Davidi abati: “Abena Siria nabomana akapi na bena Efraimu.”
Lyena umutima wa kwa Ahasi ne mitima ya bantu bakwe fyatendeke ukututuma, nga filya ifimuti fya mu mutengo fitenkana nga kuli umwela.
3 Lyena Yehova aebele Esaya ati: “Kabiye no mwana obe Sheari-yashubu,*+ mukumanye Ahasi, ku mpela ya mufoolo uukalamba uwa cishiba+ ca pa muulu, icabela mu musebo wa mu mpanga ya muntu uuwasha insalu.
4 Ufwile ukumweba ati, ‘Ucenjele kabili uteeke umutima. Witiina, kabili wileka umutima obe ututume pa mulandu wa utu utupimfya tubili utwa milando utusheleko ukupya utulefuuka icushi, pa mulandu wa cipyu ca kwa Resini imfumu ya Siria no mwana wa kwa Remalia.+
5 Pantu abena Siria na bena Efraimu no mwana wa kwa Remalia nabakupangila ukukucita ifyabipa, baleti:
6 “Natuleya ku calo ca Yuda tuye cibongolola* kabili tucicimfye,* tusonte no mwana wa kwa Tabeele abe imfumu+ muli ici calo.”
7 “‘Shikulu Mulopwe Yehova atila:
“Ifi te fyo cikaba,Kabili tafyakacitike.
8 Pantu umusumba uukalamba mu Siria ni Damaseke,Ne mfumu ya mu Damaseke ni Resini.
Mu myaka fye 65Abena Efraimu bakatobaulwa ica kuti tabakabe uluko.+
9 Umusumba uukalamba mu Efraimu ni Samaria,+Ne mfumu ya mu Samaria mwana wa kwa Remalia.+
Nga tamukwete icitetekelo icakosa,Tamwakacingililwe.”’”
10 Yehova akonkenyepo ukulanda na Ahasi, ati:
11 “Lomba icishibilo kuli Yehova Lesa obe,+ kuti caba icashika nge Nshiishi* nelyo kuti caba icasansama ngo muulu.”
12 Lelo Ahasi alandile ati: “Nshamulombe, kabili nshaeshe Yehova.”
13 Lyena Esaya alandile ati: “Umfweni mwe ba mu ng’anda ya kwa Davidi. Bushe tamwatendwa ukwesha abantu? Bushe mulefwaya ukwesha na Lesa?+
14 E ico Yehova umwine akamupeela icishibilo: Moneni! Umukashana akemita kabili akafyala umwana umwaume,+ akamwinika ati Imanuele.*+
15 Akalalya umukaka watikama* no buci ilyo ashilaishiba ifya kukaana ifyabipa ne fya kusala ifisuma.
16 Pantu ilyo umulumendo ashilaishiba ifya kukaana ifyabipa ne fya kusala ifisuma, icalo ca mfumu shibili isho uletiina cikalekeleshiwa+ nga nshi.
17 Yehova akaleta pali iwe na pa bantu bobe na pa ba mu ng’anda ya kwa wiso inshita iya-afya iishatala aibako ukutula pa bushiku abena Efraimu bapatukanine na baYuda,+ pantu akamuletela imfumu ya ku Asiria.+
18 “Muli bulya bushiku, Yehova akalishisha balunshi umunsoli ababa ukutali ku tumilonga twa mu mumana wa Naelo uwa ku Egupti, kabili akalishisha inshimu ishaba mu calo ca Asiria.
19 Kabili fyonse fikesa no kwikala mu mikonko, na pa milale iikalamba iya mabwe, na pa fimpusa fya myunga fyonse, e lyo na pa ncende shonse apo inama shinwena amenshi.
20 “Muli bulya bushiku Yehova akabomfya ica kubeyelako ica kwashima ica mu citungu ca Mumana.* Akabomfya imfumu ya bena Asiria+ pa kubeya ku mutwe no bupipi bwa ku molu, akabeyela kumo no mwefu.
21 “Muli bulya bushiku umuntu akasunga ing’ombe iyana iya pa mukuni ne mpaanga shibili.
22 Kabili pa mulandu wa kuti umukaka ukafula sana, akalalya umukaka watikama,* pantu umuntu onse uukashala mu calo akalalya umukaka watikama* no buci.
23 “Muli bulya bushiku, ponse apali ifimuti fya myangashi 1,000 ifyo bengashita mu ndalama sha silfere 1,000, pakaba ifimpusa fya myunga ne fyani.
24 Abaume bakayako ninshi nabasenda imifwi no buta, pantu mu calo conse mukaba fye ifimpusa fya myunga ne fyani.
25 Kabili pa mpili shonse apo baleseba ku lukasu tamwakayepo pantu mukalatiina ifimpusa fya myunga ne fyani. Pali ishi mpili epo ing’ombe ishilume shikalalya icani kabili e po impaanga shikalanyantaula.”
Amafutunoti
^ Nelyo kuti yapilibula no kuti, “balifililwe.”
^ Ilipilibula ukuti “Abashalapo fye e Bakabwela.”
^ Nelyo kuti yapilibula no kuti, “tuye cisansa.”
^ Nelyo “tuyetula ifibumba fya ciko.” Mu ciHebere, “tuye cipandula.”
^ Nelyo “Sheol,” e kutila, inshiishi ya bantu bonse. Moneni Amashiwi ya mu Baibo ne fyo Yapilibula.
^ Ilipilibula ukuti “Lesa Aba na Ifwe.”
^ E kutila, Bata.
^ E kutila, Umumana wa Yufrate.
^ E kutila, Bata.
^ E kutila, Bata.
