Yobo 5:1-27
5 “Bushe nga waita kuli uwalakwasuka?
Nani uwa mushilo uo walaita pa kuti akwafwe?
2 Pantu ukwenda na cimo ku mukoshi kukepaya umuwelewele,Kabili umufimbila ukepaya uubelelekwa bwangu.
3 Nalimona uko ifintu file-endela bwino umuwelewele,Lelo mu kupumikisha amafya yalesa pa ng’anda yakwe.
4 Abana bakwe tabacingililwa,Babacushisha pa mpongolo ya musumba,+ kabili takuba nangu umo uwa kubapokololako.
5 Uuli ne nsala alya ifyo umuwelewele asombola;Ne fimena mu myunga alamupokolola,Kabili balabapoka ne fipe fyabo.
6 Pantu ifyabipa tafipuuka mu lukungu,Na mafya tayamena mu mushili.
7 Pantu umuntu te kuti ekale ukwabula amafya,Nga filya fine insase nangu cibe shani shiya mu muulu.
8 Lelo nga nali niwe kuti nalomba Lesa ukuti angafwe,Kabili kuli Lesa e ko ningatuula umulandu wandi,
9 Ku ucita ifikalamba ifyo tushingomfwikisha,Ifya kupapusha ifishingapendwa.
10 Alosha imfula pano isonde,Kabili alenga amenshi yafika mu mabala.
11 Abika uo basuula apacindama,No uli no bulanda amulenga aba apasansuka apo engapusuka.
12 Afulunganya amapange ya ncenjeshi,Pa kuti iminwe ya shiko, icita ifyo shilefwaya.
13 Alenga aba mano bawila mu fiteyo fyabo ifya bucenjeshi,+Pa kuti afulunganye amapange yabo.
14 Baba mu mfifi mu nshita ya kasuba,Kabili akasuba nga kafika fye pa kati bapampanta fye kwati bushiku.
15 Alapususha abantu ku lupanga lwa tunwa twabo,Apususha umupiina ku wakosa,
16 Pa kuti abasuulwa babe ne subilo,Lelo abashalungama bafwile ukwisala utunwa twabo.
17 Umuntu uo Lesa alungika alaba ne nsansa,E ico wikaana Uwa Maka Yonse nga alefwaya ukukufunda!
18 Pantu alakalifya, lelo alakakila icilonda;Alacena, lelo iminwe yakwe ilaposha.
19 Akakupokolola ku macushi 6,Nangu ubucushi bwalenga 7 bukese, tawakacule.
20 Mu nshita ya cipowe akakupususha* ku mfwa,Na mu nshita ya nkondo akakupususha ku lupanga.
21 Akakucingilila ku lulimi+ ulukapa ngo bwembya,Kabili tawakatiine ilyo ubucushi bukesa.
22 Ubucushi ne nsala tafyakakusakamike,Kabili tawakatiine ifinama fya mu mpanga.
23 Amabwe ya mu mpanga tayakakucushe,*Kabili ukekala umutende ne finama fya mu mpanga.
24 Ukeshiba ukuti itenti lyobe lyalicingililwa,*Kabili ilyo ukayapempula impanga yobe iya mulemfwe, tawakasange icintu nangu cimo naciluba.
25 Ukakwata abana abengi,Kabili abakatuntuka muli iwe bakafula nge cani pano isonde.
26 Ukaya ku nshiishi ninshi ucili uwakosa,Nga filya imyanshi* ya ngano iba mu nshita ya kusombola.
27 Mona! Natufwailisha uyu mulandu. Kabili ifi fine e fyo tusangile.
Utontonkanyepo kabili ifi fine e fyo ucite.”
Amafutunoti
^ Mu ciHebere, “akakulubula.”
^ Nelyo “yakapangana icipangano na iwe.”
^ Mu ciHebere, “mutende.”
^ Nelyo “imipo.”
