Mu filonganino fyesu tamwaba bashimapepo abalipilwa indalama pa milimo babomba. Lelo, nga filya cali mu filonganino fya Bena Kristu ba kubalilapo, twalikwata bakangalila abasalwa ukuti ‘balecema icilonganino ca kwa Lesa.’ (Imilimo 20:28) Aba baeluda, Bena Kristu bafikapo abatungulula icilonganino no kucema umukuni wa kwa Lesa. Ilyo balecita ifi balakonka filya Baibolo isosa ati, “mwilapatikishiwa fye uku-ucema, lelo muleitemenwa; mwilaucema pa kuti fye mumwenemo ubunonshi bwa nsoni, lelo mulebomba pa mulandu wa kuti mulefwaisha ukubomba.” (1 Petro 5:1-3) Milimo nshi babomba iitwafwa?

Balatusakamana no kutucingilila. Baeluda balatungulula no kucingilila aba mu cilonganino pa kuti batwalilila ukuba ifibusa fya kwa Lesa. Apo balishiba ukuti Lesa e wabapeela uyu mulimo wacindama, tababa nge mfumu pali bamunyinabo, lelo bacita ifilenga balesekelela. (2 Abena korinti 1:24) Nga filya kacema esha sana ukusakamana impaanga imo na imo, baeluda nabo baleesha ukwishiba bonse aba mu cilonganino.—Amapinda 27:23.

Balatusambilisha ukucita ifyo Lesa afwaya. Cila mulungu, baeluda balasambilisha mu filonganino pa kuti bengakosha icitetekelo cesu. (Imilimo 15:32) Aba baume baipeelesha, e baba pa ntanshi mu mulimo wa kushimikila. Balabombela pamo na ifwe no kutusambilisha ukushimikila.

Balakoselesha umuntu umo na umo mu cilonganino. Pa kuti bucibusa bwesu na Lesa bulekoselako, baeluda balatutandalila ku mayanda nelyo ukulanshanya na ifwe pa Ng’anda ya Bufumu ifyebo fya mu Malembo ifitusansamusha no kutwafwa.—Yakobo 5:14, 15.

Baeluda tababomba fye imilimo ya mu cilonganino, lelo abengi balaya na ku ncito e lyo balakabila ne nshita ya kusakamana indupwa shabo. E ico tulingile ukubapeela umucinshi pa fyo babombesha.—1 Abena Tesalonika 5:12, 13.

• Milimo nshi baeluda babomba mu cilonganino?

• Bushe baeluda balanga shani ukuti balibika amano kuli umo na umo mu cilonganino?