ISAMBILILO 2
Rebeka Alicitile Ifyo Yehova Alefwaya
Rebeka alitemenwe Yehova. Umulume wakwe ali ni Isaki. Isaki na o alitemenwe Yehova. Bushe cali shani pa kuti Rebeka na Isaki beshibane? Finshi Rebeka acitile ifilanga ukuti alicitile ifyo Yehova alefwaya? Leka tusambilile na fimbi pali Rebeka.
Abafyashi ba kwa Isaki baali ni Abrahamu na Sara. Baleikala mu calo ca Kanaani, umwali abantu abashalepepa Yehova. Nomba Abrahamu alefwaya umwana wakwe ukuupa umwanakashi uwalepepa Yehova. E ico atumine umubomfi wakwe Eliesere, ukuyafwaila Isaki umukashi muli balupwa lwa kwa Abrahamu abaleikala ku Harani.
Rebeka alibombeshe ukutapa amenshi ya kunwesha ingamila
Eliesere na babomfi bambi aba kwa Abrahamu balyendele ulwendo ulutali sana. Baile ne mpunda 10 ishasendele ifya kulya ne fya bupe ifyalekanalekana. Bushe Eliesere ali no kwishiba shani umwanakashi uo Isaki ali no kuupa? Ilyo Eliesere na babomfi banankwe bafikile ku Harani, baliminine pa cishima. Eliesere alishibe ukuti tapaali no kupita sana inshita, abantu baali no kwisa mu kutapa amenshi. Lyena apepele kuli Yehova ati: ‘Umukashana nalalomba amenshi nga alampeela amenshi e lyo anwenshe ne ngamila, ninshi nalaishiba ukuti e o mwasala ukuupwa kuli Isaki.’
Lyena Rebeka alishile ku cishima mu kutapa amenshi. Baibolo itila Rebeka alemoneka bwino sana. Ilyo Eliesere amulombele amenshi ya kunwa, Rebeka atile: ‘Nalamupeela amenshi e lyo ne ngamila shenu na sho ndeshitapila.’ Ingamila shilanwa sana amenshi nga shili ne cilaka, kanshi Rebeka afwile alibweleleko imiku iingi ku cishima ku kutapa amenshi. Bushe naumona pa cikope ifyo Rebeka alebombesha?— Eliesere alipapile sana pa kumona ifyo Yehova ayaswike ipepo apepele.
Eliesere apeele Rebeka ifya bupe ifingi kabili ifisuma nga nshi. Lyena Rebeka aebele Eliesere na babomfi bambi ukuti baye nankwe ku ng’anda. Ilyo bafikile, Eliesere alilandile ifyo Abrahamu amutumine e lyo ne fyo Yehova ayaswike ipepo lyakwe. Balupwa lwa kwa Rebeka balitemenwe sana ukuti opwe kuli Isaki.
Rebeka aliile na Eliesere ku Kanaani kabili alyupilwe kuli Isaki
Bushe Rebeka alitemenwe ukuupwa kuli Isaki?— Rebeka alishibe ukuti Yehova e watumine Eliesere. Kanshi ilyo balupwa lwakwe bamwipwishe nga kuti atemwa ukuya ku Kanaani no kuyaupwa kuli Isaki, Rebeka atile: “Ee ndeya.” Ilyo line, Rebeka aliile na Eliesere. Ilyo bafikile ku Kanaani, Rebeka alyupilwe kuli Isaki.
Yehova alipaalile Rebeka pantu alicitile filya fine Yehova alefwaya. Ilyo papitile imyaka iingi, Yesu aishilefyalilwa mu lupwa lwa kwa Rebeka. Na iwe wine Yehova kuti akupaala nga ulecita ifyo afwaya.
