Pa numa ya kushimikila akasuba konse, Yesu alinakile. Mu cungulo, aebele abasambi bakwe ati: “Natwabukile kwi shilya,” ku lubali lumbi ulwa musumba wa Kapernahumu.—Marko 4:35.

Ku kabanga ka lulamba lwa Bemba wa Galili, kwali icitungu ca bena Gerasa. Iyi incende baleyita no kuti Dekapoli. Mu misumba ya mu Dekapoli mwali sana intambi sha baGriki kabili e mwaleikala abaYuda abengi.

Abantu balishibe ukuti Yesu nafuma mu Kapernahumu. Kwali amato na yambi ayatendeke ukuya kwi shilya lya bemba. (Marko 4:36) Kwi shilya lya bemba takwalepele sana. Muli Bemba wa Galili mwaba amenshi ayashakwata umucele kabili iyi bemba yaba amakilomita mupepi na 21 mu butali, e lyo mu bwipi yaba amakilomita nalimo 12. Na lyo line, iyi Bemba yalishika.

Nangu ca kuti Yesu ali uwapwililika, alinakile pantu alishimikile sana. E ico ilyo ubwato ubo banininemo bwatendeke ukwenda, aile ku numa ya bwato no kulaala, asaila na pa musao.

Abatumwa ba kwa Yesu abengi balishibe sana ukwensha amato, lelo ubu bulendo bwali no kuba ubwayafya. Mu mbali ya Bemba wa Galili mwaliba impili kabili ilingi line pa muulu wa menshi palaba icikabilila. Inshita shimo umwela uwatalala ulafuma mu mpili no kupuupa pa menshi, ne ci cilenga pali bemba paba icikuuku ca mwela icikalamba. Ifi fine e fyacitike ilyo bali pali bemba. Amabimbi yatendeke ukuuma ku bwato ica kuti “amenshi yalaingila mu bwato, kabili ubwato bwalafwaya ukubunda.” (Luka 8:23) Ilyo ifi fyalecitika ninshi Yesu acili mu tulo.

Apo abatumwa bakwe balishibe sana ifya kucita nga kwaima amabimbi, balyeseshe na maka ukupindulula ubwato. Lelo uyu muku balifililwe. Balitiinine ukuti balafwa, e ico baile kuli Yesu no kumubuusha abati: “Shikulu, tupususheni, twalafwa!” (Mateo 8:25) Abasambi bali no mwenso wa kuti balanwena!

Ilyo Yesu abuukile, aebele abatumwa ati: “Cinshi muletiinina, mwe ba citetekelo icinono?” (Mateo 8:26) Lyena Yesu aebele umwela na bemba ati: “Talala! Ba tondolo!” (Marko 4:39) Awe icikuuku calilekele na pali bemba pali tondolo. (Marko na Luka balilandilepo pali ici icipesha amano, babalilepo ukulanda ukuti Yesu alitalalike icikuuku ca mwela mu cisungusho, e lyo pa numa balandile pa fyo abebele ukuti icitetekelo cabo cali cinono.)

Elenganyeni ifyo abasambi baumfwile! Balimwene uko amabimbi ayakalamba yaleima pali bemba e lyo ne fyo bemba yatalele tondolo. Baali no mwenso icine cine ica kuti batendeke ukwipushanya abati: “Nga kanshi uyu nani, uwa kuti no mwela na bemba filamuumfwila?” Awe bafikile kwi shilya lya bemba umutende. (Marko 4:41–5:1) Nalimo amato yambi ayali pali bemba yalibwelelemo uko yafumine.

Icitetekelo cesu cilakoshiwa nga twaishiba ukuti Umwana wa kwa Lesa alikwata amaka pa miceele! Ilyo akatendeka ukuteka isonde, abantu bonse bakekala mu mutende pantu takwakabe amasanso ayafuma ku fyabumbwa ayatiinya abantu!