Pa numa ya kwikala inshiku 40 mu matololo, ilyo ashilabwelelamo ku Galili, Yesu abalile aya kuli Yohane, uwamubatishe. Ilyo apaleme, Yohane aebele abalipo ati: “Moneni, Umwana wa Mpaanga uwa kwa Lesa, uulesenda ulubembu lwa ba mu calo! Uyu e o nalelandapo ilyo natile, ‘Ku numa yandi kuleisa umuntu uwancila, pantu ilyo ine nshilabako, ninshi ena e ko aba.’” (Yohane 1:29, 30) Nangu ca kuti Yohane ali umukalambako pali Yesu, alishibe ukuti Yesu ali ku muulu ilyo ashilaisa pano calo.

Ilyo Yesu aile ku kubatishiwa, Yohane taishibe bwino bwino nga ca kuti Yesu e wali no kuba Mesia. Yohane atile: “Na ine wine nshamwishibe, lelo naishile mu kubatisha mu menshi pa kuti abena Israele bamwishibe.”—Yohane 1:31.

Yohane ashimikiile abalipo icacitike ilyo abatishe Yesu. Atile: “Namwene umupashi uleika mu muulu nge nkunda, kabili waikele pali ena. Na ine wine nshamwishibe, lelo ulya Wine uwantumine ku kubatisha mu menshi anjebele ati, ‘Nga wamona umupashi waikila no kwikala pa muntu umo, ninshi uyo wine muntu e ukalabatishisha ku mupashi wa mushilo.’ Kabili nalimwene, no kushininkisha ukuti uyu e Mwana wa kwa Lesa.”—Yohane 1:32-34.

Ubushiku bwakonkelepo, ilyo Yesu aile uko Yohane na basambi bakwe babili bali, Yohane atile: “Moneni, Umwana wa mpaanga uwa kwa Lesa!” (Yohane 1:36) Ilyo line fye, aba abasambi babili aba kwa Yohane Kabatisha balikonkele Yesu. Umo pali aba ali ni Andrea, e lyo umbi na o ali ni Yohane. Afwile e walembele lino line lyashi. Cimoneka kwati uyu wine Yohane ali ni lupwa lwa kwa Yesu pantu ali mwana wa kwa Salome na Sebede. Salome afwile ali ni nkashi inankwe ya kwa Maria.

Ilyo Yesu apilibwike no kumona Andrea na Yohane balemukonka abepwishe ati: “Cinshi mulefwaya?”

Nabo bamwipwishe abati: “Rabi, ni kwi mwikala?”

Yesu na o abaswike ati: “Iseni mumone.” —Yohane 1:37-39.

Inshita yali ku ma 4 koloko ya cungulo, kabili Andrea na Yohane baikele na Yesu mpaka bwaila. Andrea alitemenwe nga nshi ica kuti ailefwaya munyina Simone, uo baleita ati Petro, no kumweba ati: “Natusanga Mesia.” (Yohane 1:41) Andrea atwele Petro kuli Yesu. Ifyacitike pa numa filanga ukuti Yohane afwile na o ailefwaya Yakobo, munyina no kumutwala kuli Yesu, lelo Yohane talanda ifyo acitile pa kuti Yakobo abe umusambi wa kwa Yesu.

Ubushiku bwakonkelepo, Yesu asangile Filipi, uwaleikala ku Betsaida. Uyu umusumba wabelele mupepi na ku kapinda ka ku kuso aka lulamba  lwa Bemba wa Galili kabili e mwaleikala Andrea na Petro. Yesu aebele Filipi ati: “Nkonka, ube umusambi wandi.”—Yohane 1:43.

Lyena Filipi asangile Natanaele, uo baleita ati Bartolomeo, no kumweba ati: “Natusanga uo Mose alembelepo mu Mafunde, uo na Bakasesema balembelepo, ni Yesu, uwa ku Nasarete, umwana wa kwa Yosefe.” Natanaele alitwishike ifyo bamwebele kabili aebele Filipi ati: “Bushe mu Nasarete kuti mwafuma icisuma?”

Filipi alimukoseleshe ati: “Isa umone.” Ilyo Yesu amwene Natanaele aleisa uko ali, atile: “Moneni, umwina Israele wine wine, uushaba na bucenjeshi.”

Natanaele amwipwishe ati: “Nga mwanjishiba shani?”

Yesu amwaswike ati: “Ilyo Filipi ashilakwita, ilyo waciba mwi samba lya mukunyu, nacikumona.”

Natanaele alipapile kabili ayaswike Yesu ati: “Rabi, ni mwe Mwana wa kwa Lesa, muli Mfumu ya kwa Israele.”

Yesu atile: “Pantu nakweba ati nacikumona mwi samba lya mukunyu e co wasuminina? Ukamona ifyacila pali ifi.” Lyena Yesu abebele ati: “Ndemweba icine cine, nati, mukamona umuulu naucenama, na bamalaika ba kwa Lesa balenina ukuya ku muulu no kwikila ukwisa ku Mwana wa muntu.”—Yohane 1:45-51.

Lyena Yesu na aba abasambi bakwe aba kubalilapo bafumine mu Mukonko wa Yordani no kuya ku Galili.