IFYO ABANTU BALANDA

Abantu abengi batila, pa kuti umuntu abe ne nsansa alingile ukuba umukankaala. Batila umuntu te kuti abe ne nsansa nga ca kuti tasambilila, takwata indalama sha kuila ku fipatala ifya mutengo, kabili takwata ne fintu fimbi ifyo abantu abakwata indalama bengakwata.

IFYO BAIBOLO ISAMBILISHA

Baibolo isambilisha ukuti ifyuma te filenga umuntu ukuba ne nsansa, lelo umuntu kuti aba ne nsansa nga ca kuti alabika amano ku fya kwa Lesa. Baibolo itila: “Balipaalwa abaishiba ukuti balakabila ifya kwa Lesa.” (Mateo 5:3) Abantu ababika amano ku fya kwa Lesa baleshiba ifyo Baibolo isambilisha, e ico tabasakamikwa sana nangu ca kuti tabakwata indalama. Apo tabasakamikwa sana, balaba ne nsansa sha cine.

Abantu abasambilila Baibolo kabili abacita ne fyo ilanda, baleshiba ifya kucita nangu ca kuti bapiina. Ku ca kumwenako, Baibolo ilanda ukuti tatufwile ukulapeepa fwaka no kunwesha ubwalwa. Umuntu uunwesha ubwalwa no kupeepa fwaka alonaula indalama kabili kuti alwala na malwele ayengalenga alapoosa indalama ishingi ku cipatala.—Amapinda 20:1; 2 Abena Korinti 7:1.

Baibolo ilatweba no kuti ubufunushi no kutemwisha ifyuma tafyawama. (Marko 4:19; Abena Efese 5:3) Ukukonka ifyo Baibolo ilanda kulalenga umuntu ukukanaonaula indalama ku fyangalo fya kushitikapo kabili Baibolo ilatweba no kuti tatufwile “ukutemwa indalama” pantu “e ntulo ya bubi bwa misango yonse.” (1 Timote 6:10) Baibolo itila: “Umuntu nangu akwate shani ifingi, ubumi bwakwe tabwaba mu fintu akwata.” (Luka 12:15) Na kuba, nangu umuntu akwate shani indalama te kuti ashite ubumi. Kanshi umuntu nga alecita ifyo Baibolo ilanda alaba ne nsansa.

Nangu ca kuti abashakwata indalama balacula pa kusanga ifya kulya, ifya kufwala, no mwa kwikala, balaba ne nsansa pantu tababika amano ku fyuma, lelo balacita ifyo Lesa afwaya. Balishiba ifyo Baibolo yatulaya ukuti, “ipaalo lya kwa Yehova lilacindamika, kabili talundako ukucululuka.”—Amapinda 10:22.

ILEMBO ILINGAMWAFWA: “Balipaalwa abaishiba ukuti balakabila ifya kwa Lesa.”—Mateo 5:3.

IFYO BAIBOLO ILANDA

Nangu ca kuti abantu balifilwa ukupwisha ubupiina, nomba line, Lesa ali no kufumyapo icilenga kuleba ubupiina, e kutila abantunse abaitemwa, na ba mu mabuteko ababa na bukaitemwe. (Lukala Milandu 8:9) Kabumba wesu akafumyapo amabuteko ya bantunse umwaba abantu ababa na bukaitemwe. Ubufumu bwakwe nelyo ubuteko bwa mu muulu, bukalapeela abantu bonse ifyo bakabila ukwabula akapatulula. Baibolo itila Imfumu ya Bufumu bwa kwa Lesa ikafumyapo fyonse ifilenga ubupiina. Itila: “Akapususha umulanda uulekuuta mutuule . . . Akomfwila ubulanda umulanda no mupiina, kabili akapususha imyeo ya bapiina.”—Amalumbo 72:12-14.

Isonde likaba paradaise, abantu bonse bakakwata umwa kwikala ne fya kulya, kabili takwakabe abapiina. Mwi buuku lya muli Baibolo ilya kwa Esaya, Lesa alilaya ababomfi bakwe ukuti “bakakuula amayanda no kwikalamo, bakalima na mabala ya myangashi no kulya ifisabo fya yako. . . . Umulimo wa minwe yabo abasalwa bandi bakasekelamo nga nshi.” (Esaya 65:21, 22) Tamwakabe ubwafya bwa kufwaya ifyo tukabila mu mikalile, lelo mukaba “umutebeto wa fyanona,” ne fintu fimbi ifisuma ifyo Yehova akalatupeela.—Esaya 25:6.

CINSHI CACINDAMINA?

Nga tuletontonkanya pa fyo Lesa alaya ukuti akafumyapo ubupiina, tulamona ukuti Lesa alibika amano ku bapiina kabili tuleshiba no kuti nomba line ubupiina buli no kupwa. Ukulatontonkanya pa malayo ya kwa Lesa kuti kwalenga twalashipikisha amafya tukwata pali nomba.

ILEMBO ILINGAMWAFWA: “Akapususha umulanda uulekuuta mutuule . . . Akomfwila ubulanda umulanda no mupiina, kabili akapususha imyeo ya bapiina.”—Amalumbo 72:12, 13.