Ishiwi lya kuti ukusalapula lipilibula no kuti ukutungulula nelyo ukufunda. Inshita shimo ukusalapula kuti kwaba kulungika umwana nga alufyanya. Na lyo line, ilingi line abafyashi balasalapula abana pa kuti babasambilishe ifya kulapingula bwino pa fintu.

Muno nshiku, abafyashi bamo tabasalapula abana pa mulandu wa kuti bamona kwati abana kuti balaumfwa kwati tabacindama nga babasalapula. Lelo abafyashi abasuma balapeela abana babo amafunde ayalinga e lyo no kubafwa ukulayakonka.

“Pa kuti abana bakakule bwino, abafyashi balingile ukulabeba ifyo bengacita e lyo ne fyo tabalingile ukucita. Nga filya ubwato bwingasendwa na mabimbi nga tabukwete ifya kubupindulula, abana nabo nga tabalebasalapula te kuti balepingula bwino pa fintu kabili te kuti bakule bwino.

Muletwalilila ukusalapula abana. Mulesalapula umwana nga ca kuti takonkele amafunde mwamupeela. Na lyo line, mulingile ukumutasha nga ca kuti aleyakonka.

“Ilingi line ndatasha abana pa fyo baba ne cumfwila mu calo umo abengi bashaba ne cumfwila. Ukutasha abana kulalenga baleumfwila nga nabasalapula.”—E fyalandile ba Christine.

ILEMBO ILINGAMWAFWA: “Ico umuntu alebyala, e co akalobolola.”—Abena Galatia 6:7.

Mwilabasalapula napashilingile. Ilyo mulesalapula abana, muletontonkanya pa mushinku e lyo ne cilubo bapangile. Abana balomfwila nga ca kuti mwabasalapula ukulingana ne cilubo bapangile. Ku ca kumwenako, umwana nga talebomfya bwino foni, kuti mwamupoka foni nelyo ukumulesha ukuibomfya pa nshita imo. Na lyo line, mwilasalapula abana napashilingile.

“Umwana nga alufyanya, ndesha ukumona nga ca kuti acilufyanishisha fye ku mufulo nelyo iyo. Nga ca kuti umwana alebwekeshapo ukucita icilubo cimo cine ndamusalapula. Nomba nga apanga icilubo icinono, mulungika fye.”—E fyalandile ba Wendell.

ILEMBO ILINGAMWAFWA: “Mwilakalifya abana benu, epali baba no bulanda.”—Abena Kolose 3:21.

Muleba no kutemwa. Abana balomfwila abafyashi babo nga balebasalapula, maka maka nga baishiba ukuti ico balebasalapwila ni co balibatemwa.

“Umwana wesu nga alufyanya, twalemutasha pa fintu fimbi ifisuma ifyo alecita. Lyena twalemulondolwela ukutila twalefwaya ukumwafwa no kutila nangu nalufyanya kuti atwalilila ukuba umwana musuma nga ca kuti tabwekeshepo icilubo cimo cine.”—E fyalandile ba Daniel.

ILEMBO ILINGAMWAFWA. “Mu kutemwa mwaba ukushishimisha ne cikuuku.”—1 Abena Korinti 13:4.