2 Bushe Amafya Tukwata Malibu Ya Kuilombela?
Umulandu Cacindamina Ukwishiba Icasuko
Nga ca kuti amafya tukwata malibu ya kuilombela, ninshi twalikwata amaka ya kuyacefyako.
Tontonkanyeni Pali Ifi
Bushe abantu balikwatapo amaka pa mafya yakonkapo?
-
Ukucusha Abantu.
Akabungwe ka World Health Organization (WHO) kalanda ukuti pa bakalamba 4 mu calo, ninshi umo balimucushishepo ilyo ali umwaice, kabili pa banakashi batatu mu calo, ninshi umo balimucushishepo nelyo ukumucenda, nangu fyonse fibili fyalimucitikilapo.
-
Ukufwilwa.
Ukulingana na lipoti ya ba World Health Organization (WHO) iyo beta ukuti World Health Statistics iya mu 2018, “abantu abo baipeye mu calo conse mu 2016 bali nalimo 477,000.” Kabili kwali na bambi nalimo 180,000 abo baipeye mu nkondo.
-
Amalwele.
Ba Fran Smith balembele mu cipande cimo icali muli magazini beta ukuti National Geographic ukuti: “Abantu ukucila pali bilioni imo, balapeepa fwaka. Na kuba fwaka yaba pa fintu ifilenga abantu ukulwala amalwele 5 ayepaya abantu abengi sana. Pali aya amalwele 5 paba amalwele ya ku mutima, ubulwele bwa lupuma (stroke), amalwele ayalenga umuntu ukufilwa ukulapema bwino, ubulwele bwa kuli bapwapwa ubulenga umuntu kulakoola sana no kulafilwa ukupeema bwino, e lyo na kansa ya kuli bapwapwa.”
-
Ukukanaba no Mulinganya.
Ba Jay Watts abasambilila ifyo bongobongo ibomba batile: “Ubupiina, akapatulula ka mushobo, akapatulula akaba pa banakashi na baume, ukutamfya abantu uko bekala, e lyo no kucimfyanya, fyonse ifi filalenga abantu ukulacula sana.”
ISHIBILENIPO NA FIMBI
Tambeni vidio itila Mulandu Nshi Lesa Apangiile Icalo? pa jw.org/bem.
Ifyo Baibolo Ilanda
Abantu e balenga amafya ayengi ayaba mu calo.
Icalenga abantu abengi ukulacula ni co amabuteko ayaba mu calo cabo yalabatitikisha nangu ca kuti yatila yalababombela.
Baibolo itila: “Umuntu atekela umuntu munankwe ku kumucusha.”—LUKALA MILANDU 8:9.
Kuti mwacefyako amafya mukwata.
Ifyo Baibolo ilanda filatwafwa ukuba no bumi ubusuma no kulaumfwana bwino na banensu.
“Umutima uwatekanya e bumi bwa mubili, lelo ubufuba bulwele bwa mu mafupa.”—AMAPINDA 14:30.
“Mwilaba ne mpatila ku banenu, muleke icipyu no bukali no kootoka no musaalula pamo no bubi bonse.”—ABENA EFESE 4:31.
