IFYO ABANTU BAMO BALANDA

Abena Israele balepepa “kalesa akatemenwe inkondo.”

IFYO BAIBOLO ISAMBILISHA

Abantu ba mu fyalo ifyo abena Israele bacimfishe bali sana no bunkalwe, balitemenwe ukulaala ne finama, ukulaala na balupwa wabo e lyo no kutuula abana babo amalambo. Pa numa ya kubapeela inshita iikalamba iya kwalula imibele yabo, Lesa atile: “Ni muli ifi fyonse inko isho ndetamfya ku cinso cenu shaikowesha.”—Ubwina Lebi 18:21-25; Yeremia 7:31.

“Ni pa mulandu wa fyabipa ificita ishi nko e co Yehova Lesa wenu aleshitamfisha ku cinso cenu.”—Amalango 9:5.

NALIMO MWALIMONA UKUTI

Nga kuli inkondo bashimapepo abengi balanda ukuti Lesa ali nabo. Icitabo citila The Causes of War, cilanda ukuti: “Bashimapepo balatungilila inkondo shonse isho abantu balwa.”

IFYO BAIBOLO ISAMBILISHA

Abena Kristu tabalingile ukulwa na balwani babo. Umutumwa Paulo alembeele Abena Kristu banankwe ukuti: “Mule-esha na maka yenu yonse ukuba aba mutende ku bantu bonse. Mwe batemwikwa, mwilalandula.”—Abena Roma 12:18, 19.

Mu nshita ya kutuma abasambi bakwe ku nkondo, Yesu abebele ukuti: “Muletemwa abalwani benu kabili mulepepelako abamucusha; pa kuti mulange ukuti muli bana ba kwa Shinwe uwaba mu muulu.” (Mateo 5:44, 45) Nga ca kuti mu calo Abena Kristu baleikala mwaba inkondo, tabalingile ukulwako pantu ‘tabali ba muli ici calo.’ (Yohane 15:19) Nga ca kuti Lesa alafwaya bakapepa bakwe mu calo ukutemwa abalwani babo no kukanaba aba muli ici calo, cinshi engalabatungilila ukulwako inkondo nelyo ukulwa ulubuli?

“Ubufumu bwandi te bwa pano calo. Ubufumu bwandi abuba bwa pano calo, ababomfi bandi nga balwa ukuti nipeelwa ku baYuda. Lelo Ubufumu bwandi te bwa pano calo iyo.”—Yohane 18:36.

IFYO ABANTU BAMO BALANDA

Takuli uwingapwisha inkondo. Icitabo ca War and Power in the 21st Century citila: “Inkondo tayakatale aipwa. Na kabili takwaba ifingalenga mu calo conse mwatwalilila fye ukuba umutende muno nshiku.”

IFYO BAIBOLO ISAMBILISHA

Inkondo ikapwa ilyo abantu bonse abafwaya ukulwa inkondo bashakabeko. Ubufumu bwa kwa Lesa, ubuteko bwa cine cine ubwa ku muulu, bukasambilisha abantu ukuba aba mutende kabili tabakalelwa inkondo. Baibolo itukoselesha ukuti Lesa “akalungika imilandu ya nko sha maka isha kutali. Kabili bakafula impanga shabo ukuti shibe baplao, na mafumo yabo ukuti yabe ifya kutungwilako imiti. Kabili uluko talwakemishe uluko lunankwe ulupanga, nangu ukusambilila inkondo na kabili.”—Mika 4:3.

Baibolo itusambilisha ukuti mu Bufumu bwa kwa Lesa, tamwakabe ama buteko ayakulafwaya fye ifintu ukulabawamina, lelo mukaba umulinganya, kabili tamwakabe ifintu ifingaleta akapatulula pa bantu. Nga ca ba ifi, inkondo ikapwa. Lesa alilaya ukuti: “Tafyakacite ububi nangu ubonaushi. . . . pantu isonde likesulamo ukwishiba Yehova filya amenshi yaisula muli bemba.”—Esaya 11:9.

“Alelenga inkondo ukupwa ukufika ku mpela sha pano isonde. Ubuta abukontola kabili aputaula ne fumo, aoca na maceleta mu mulilo.”—Amalumbo 46:9.