IFIPAANGA ifyo utunama twa muli bemba utwaba nga inkola tukwata, filalenga twilafwa nangu ca kuti pali bemba palaba sana amabimbi. Ifi ifipaanga ficingilila utunama twa muli bemba, fyalilenga abapanga ifintu ukufwailisha pa fyo fyapangwa ne fyo fimoneka pa kuti nabo balepanga amamotoka ne fikuulwa ifingalacingilila abantu.

Tontonkanyeni pali ici: Abapanga ifintu balifwailishe pa fipaanga ifya misango ibili, ifikwata imishilwa iingi iifuma pa nshi ya cipaanga no ku kumanina pa kati, e lyo ne fikwata umushilwa ushinguluka icipaanga ukufuma pa kati ukufika pa nshi, nga filya fyaba icipaanga ca nkola.

Basangile ukutila, nga kwaba icauma pa cipaanga icikwata imishilwa iifuma pa nshi no kukumanina pa kati, ubukali buya mu mbali ya cipaanga. Lelo nga kwaba icauma pa cipaanga icikwata umushilwa uushinguluka ukufuma pa kati ukufika pa nshi, ubukali buya pa kati ka cipaanga. Ifipaanga fya misango yonse iibili fitwala ubukali ku ncende uko fyakosa sana, ne ci cilalenga akanama kelaumfwa ubukali.

Abafwailisha pa fintu balilingenye ifyo ifipaanga fya tunama fyakosa ku fipaanga ifyo bapangile ukubomfya kompyuta ukupashanya ifi ifipaanga. Basangile ukuti ifyo ifipaanga fya tunama fipangwa filalenga filekosa sana ukucila ifipaanga fya kupanga fye.

Magazini ya Scientific American, yalandile pali ifi bafwailishe ukutila: “Nga ca kuti mu kuya kwa nshita bakalapanga amamotoka ayakalamoneka nge fipaanga fya utu utunama, yakalamoneka bwino kabili yakalacingilila sana abantu.”

Muletipo shani: Bushe ifipaanga fya tunama twa muli bemba fyaishilebako fye ifine nangu kwali uwa fipangile?