Nangu ca kuti Abena Kristu balacita fimo pa kuicingilila, balakonka amashiwi ya kwa Lesa ayatutungulula. Amashiwi ya kwa Lesa tayasuminisha Abena Kristu ukubomfya imfuti ishinono ne shikalamba pa kuicingilila ku bantu banabo. Natulande pa mashiwi ya kwa Lesa yamo ayatutungulula:

Yehova amona ukuti ubumi bwa bantu bwa mushilo. Davidi uwaimbile amalumbo alishibe ukuti Yehova e “ntulo ya mweo.” (Amalu. 36:9) Kanshi Umwina Kristu nga alefwaya ukuicingilila no kucingilila ifipe fyakwe, alingile ukwesha na maka pa kuti tepeye umuntu no kuba no mulandu wa mulopa.—Amala. 22:8; Amalu. 51:14.

Nangu ca kuti ukubomfya ifyanso ifyalekanalekana kuti kwalenga umuntu aba no mulandu wa mulopa, ukubomfya imfuti kwena kuti kwalenga cayanguka ukwipaya umuntu, nampo nga ni ku mufulo nelyo nga ni mu kukanaishiba. * Na kuba, icipondo nga camona ukuti uo cilefwaya ukusansa nakwata imfuti, ifintu kuti fyabipilako ica kutila kuti kwaba no kwipayana.

Ilyo Yesu aebele abasambi bakwe ukusenda impanga pa bushiku alekelesheko ukuba no mweo pano calo, taletontonkanya pa kuicingilila. (Luka 22:36, 38) Ico Yesu abebeele ukusenda impanga ni co alishibe ukuti ali no kubasambilisha isambililo lya kuti tabalingile  ukubomfya ifyanso nangu fye ni lintu ibumba ilili ne fyanso lyabemina. (Luka 22:52) Ilyo Petro akomene no kumuputula ukutwi kwa musha wa kwa shimapepo mukalamba, Yesu amwebele ati: “Bwesesha ulupanga umo lwikala, pantu bonse ababomfya ulupanga bakafwa ku lupanga.”—Mat. 26:51, 52.

Ukulingana na mashiwi yaba pali Mika 4:3, abantu ba kwa Lesa ‘balafula impanga shabo ukuti shibe baplao, na mafumo yabo ukuti yabe ifya kutungwilako imiti.’ Ifi Abena Kristu bacita filalingana ne fyo umutumwa Paulo alembele, atile: “Mwilabwesesha ububi pa bubi. . . . Mule-esha na maka yenu yonse ukuba aba mutende ku bantu bonse.” (Rom. 12:17, 18) Nangu ca kuti Paulo alikwete amafya ayengi ukubikako fye no ‘kusanswa ku fipondo,’ alekonka amashiwi ayo alandile ukucila ukucita ifyo amalembo yakaanya pa kuicingilila. (2 Kor. 11:26) Ukwabula no kutwishika alicetekele Lesa na mano ayaba mu Cebo cakwe, pantu aya mano ‘yaliwama ukucila ifyanso fya bulwi.’—Luk. Mil. 9:18.

Abena Kristu balishiba ukuti ubumi bwalicindama sana ukucila pa fyo bakwata. Pali Luka 12:15 patila: “Ubumi [bwa muntu] tabwaba mu fintu akwata.” Nga ca kuti muli abanakilila pa kulanda ne cipondo ilyo cilefwaya ukumusansa lelo tacilebwelela inuma, mulingile ukukonka amashiwi Yesu aebele Abena Kristu aya kuti: “Mwilakaanya umubifi.” (Mat. 5:39, 40; Luka 6:29)  * Lelo kwena icacindama kukanacita ifingalenga ifipondo fya musansa. Nga ca kuti ‘tamuleitakishisha pa fyo mwakwata,’ kabili abena mupalamano bamwishiba ukuti muli Nte sha kwa Yehova isha mutende, nalimo te kuti ifipondo fimusanse.—1 Yoh. 2:16; Amapi. 18:10.

Abena Kristu balicindika kampingu ya bantu bambi. (Rom. 14:21) Nga caishibikwa ukuti uwa bwananyina alikwata imfuti ya kuicingilila ku bantu banankwe, aba bwananyina bamo mu cilonganino nalimo kuti bapapa sana nelyo fye ukupunwishiwa. Pa mulandu wa kuti twalitemwa abantu, tatucita ifya kutuwamina nangu ca kuti amafunde ya mu calo twikala yalasuminisha ukucita ifintu fimo.—1 Kor. 10:32, 33; 13:4, 5.

Abena Kristu balingile ukulacita ifingalenga abantu bambi balafwaya ukubapashanya. (2 Kor. 4:2; 1 Pet. 5:2, 3) Nga ca kuti Umwina Kristu bamufunda pa fyo Amalembo yalanda lelo atwalilila fye ukusunga imfuti iya kuicingilila ku bantu banankwe, aba bwananyina te kuti bafwaye ukulamupashanya. Na kabili te kuti afikepo no kubomba imilimo imo mu cilonganino. Ifi fine e fyo cilingile ukuba na ku wa bwananyina uwaingila incito ya kubomfya imfuti. Kuti cawama afwayako incito imbi! *

Kwena Umwina Kristu umwine e ulingile ukusalapo ifya kucita pa kuicingilila, pa kucingilila ulupwa lwakwe nelyo ifyo akwata, nga filya fine caba na pa kusala incito ya kubomba. Na lyo line, amashiwi ya kwa Lesa ayatutungulula yalanga ukuti Lesa alikwata amano kabili alitutemwa. Abena Kristu abacindika ifyo Baibolo ilanda basalapo ukukanakwata imfuti ya kuicingilila ku bantu banabo. Balishiba ukuti abalanga ukuti balicetekela Lesa ukupitila mu kukonka ifyo Baibolo ilanda e bo Lesa acingilila.—Amalu. 97:10; Amapi. 1:33; 2:6, 7.