Yesu alilandile pa fingatwafwa ‘ukwishiba ukuti Ubufumu bwa kwa Lesa buli mupepi.’ (Luka 21:31) Fimo ifyo Yesu alandilepo ni nkondo, ifinkukuma ifikalamba, ifipowe, e lyo ne fikuko. Ifi Yesu alandilepo filecitika muno nshiku.—Luka 21:10-17.

Baibolo ilanda no kuti mu “nshiku sha kulekelesha,” abantu abengi bakaba ne mibele yabipa. Kuti mwabelenga ifyo Baibolo ilanda pali 2 Timote 3:1-5. Nga mwamona abantu ababa ne mibele iyo balandapo pali ili Ilembo, te kuti mutwishike ukuti ifyo Baibolo yalandile pa nshiku sha kulekelesha fya cine.

Bushe ifilecitika mu calo filelangilila finshi? Filelangilila ukutila nomba line fye Ubufumu bwa kwa Lesa buli no kucita ifikalenga abantunse bakaleikala bwino pe sonde. (Luka 21:36) Baibolo yalilanda pa fisuma ifyo Lesa alaya ukucitila abantunse e lyo ne fyo akawamya isonde. Lekeni tulandeko pali fimo.

“Kabili bamupeele [Yesu] ukuteka no bukata no bufumu, pa kuti abantu na bantu bonse, aba nko ne ndimi bamubombele. Ukuteka kwakwe kuteka kwa muyayaya ukushakapite, no bufumu bwakwe tabwakonaulwe.”—DANIELE 7:14.

Umwalola aya mashiwi: Abantunse bakaba ne nsansa pantu ubuteko ubusuma ubo Lesa abikako ubwacila amabuteko yonse, e bukalateka isonde lyonse, kabili Yesu e o Lesa asonta ukuba Imfumu.

“Takuli umwikashi uukatila: ‘Nindwala.’”—ESAYA 33:24.

Umwalola aya mashiwi: Tatwakulalwala nelyo ukulemana. Kanshi tukalaikala umuyayaya.

“Alelenga inkondo ukupwa ukufika ku mpela sha pano isonde.”—AMALUMBO 46:9.

Umwalola aya mashiwi: Takwakabe inkondo kabili abantu tabakulacula pa mulandu wa nkondo.

“Umubifi takabepo . . . Abafuuka e bakekala mu calo.”—AMALUMBO 37:10, 11.

Umwalola aya mashiwi: Pe sonde tapakabe abantu abacita ifyabipa, lelo pakaba fye abakalaumfwila Lesa.

“Bakakuula amayanda no kwikalamo; bakalima na mabala ya myangashi no kulya ifisabo fya yako.”—ESAYA 65:21, 22.

Umwalola aya mashiwi: Isonde lyonse likalamoneka bwino. Lesa akasuka ipepo lyesu ilya kuti ukufwaya kwakwe kukacitwe “pano isonde.”—Mateo 6:10