Lesa ali no Kufumyapo Ukucula Konse Nomba Line
Habakuki umubomfi wa cishinka kabili uo Lesa atemenwe alandile ukuti: “Kufika lilali, mwe Yehova, ndelila ukuti mungafwe, na imwe ukuumfwa iyo? Kufika lilali ndebilikisha kuli imwe ukuti mumpusushe ku bunkalwe, na imwe ukupususha iyo?” (Habakuki 1:2, 3) Bushe ifi alandile fyalelanga ukuti takwete icitetekelo? Awe nakalya. Lesa aebele Habakuki ukuti ali no kufumyapo ukucula pa nshita iyo ali no kumona ukuti nacilinga.—Habakuki 2:2, 3.
Nga ca kuti mulecula nelyo cibusa wenu alecula, kuti mwalatontonkanya ukuti Lesa alakokola ukufumyapo amacushi. Lelo Baibolo ilanda ukuti: “Yehova tashingashinga ku kufikilisha ubulayo bwakwe, filya bamo batila alashingashinga, lelo alamutekanishisha pantu tafwaya umuntu nangu umo ukonaika lelo afwaya ukuti bonse bakalapile.”—2 Petro 3:9.
NI LILALI LESA AKAFUMYAPO UKUCULA?
Ni nomba line fye! Yesu alandile ukuti inkulo imo yali no kumonako ifishibilo ifyali no kulacitika mu nshiku sha kulekelesha isha cino “calo.” (Mateo 24:3-42) Ifyo Yesu alandile filefikilishiwa muno nshiku kabili filelanga fye ukuti nomba line Lesa alafumyapo ukucula. *
Nomba bushe Lesa akafumyapo shani amacushi? Ifyo Yesu alecita ilyo ali pano isonde fyalelanga ukuti Lesa alikwata amaka ya kufumyapo amacushi. Moneni fimo ifyo acitile.
Utuyofi Nelyo Amasanso: Ilyo Yesu na batumwa bali mu bwato pali Bemba wa Galili, kwaishile icikuuku ca mwela icikalamba ica kuti ubwato bwalefwaya ukubunda. Na lyo line, ifyo Yesu acitile fyalilangile ukuti ena na Wishi balikwata amaka pali fyonse ifyabumbwa. (Abena Kolose 1:15, 16) Yesu alandile fye ati: “Talala! Ba tondolo!” Cinshi cacitike ilyo alandile aya mashiwi? “Umwela walilekele, awe kwatalele na tondolo.”—Marko 4:35-39.
Amalwele: Abantu abengi balimwene uko Yesu aleposha impofu, abalemana, abalwele amalwele pamo nga cipumputu, ifibashi na malwele yambi. Baibolo itila Yesu ‘aleundapa bonse abalwele.’—Mateo 4:23, 24; 8:16; 11:2-5.
Ifipowe: Yesu alibomfeshe amaka Wishi amupeele ku kufusha ifya kulya ifinono. Baibolo itila Yesu alilishishe amabumba ayakalamba, imiku ibili ilyo aleshimikila.—Mateo 14:14-21; 15:32-38.
Imfwa: Filya Yesu abuushishe abantu batatu abalembwa mu Baibolo filanga ukuti Yehova alikwata amaka ya kubuusha abafwa. Pa bantu abuushishe pali no wafwile pa nshiku shine.—Marko 5:35-42; Luka 7:11-16; Yohane 11:3-44.
^ para. 5 Nga mulefwaya ukwishibilapo na fimbi pa nshiku sha kulekelesha, belengeni isambililo 32 mu citabo citila Kuti Mwaba ne Nsansa Umuyayaya! Ici icitabo calembwa ne Nte sha kwa Yehova kabili kuti mwacikopolola pa www.mr1310.com/bem.
Nalimo Kuti Mwatemwako ne fi
ULUPUNGU LWA KWA KALINDA
Ifyo Mwinganonkelamo nga Mwaishiba Ukuti Lesa Alimubikako Amano
Amalembo yalatwafwa ukucetekela amalayo ya kwa Lesa ayalanda pa fyo ifintu fikaba ku ntanshi.
AMASUKO KU MEPUSHO YA MU BAIBOLO
Finshi Ubufumu bwa kwa Lesa Bukacita?
Sambilileni ifyo ubuteko bwa kwa Lesa bukacita ilyo bukalateka aba pa calo.
AMALYASHI AYALEKANALEKANA
Isubilo lya Kuti Ifintu Fikawama ku Ntanshi lya Cine
Mulandu nshi ifyo amalayo yaba mu Baibolo yapusana ne fyo abantunse balaya no kusobela?
AMASAMBILISHO YA MU BAIBO AYACINDAMA
Bushe Ubufumu bwa kwa Lesa ni Cinshi?
Ilyo Yesu ali pano isonde alesambilisha sana pa Bufumu bwa kwa Lesa ukucila pa lyashi ili lyonse. Pa myaka iingi abantu abengi balapepa ukuti ubu Bufumu bwise.
PA NTE SHA KWA YEHOVA
Lombeni Ukumutandalila
Lanshanyeni icipusho ca mu Baibolo, nelyo ishibilenipo na fimbi pa Nte sha kwa Yehova.
