Nafyalilwe mu musumba wa Ciudad Mante, incende iisuma iya mu Tamaulipas ku Mexico. Abantu abengi aba muli iyi ncende baliba bwino kabili ni bakapekape. Na lyo line, muli uyu musumba mwaliba sana abankalwe.

Twafyelwe abaume 4, kabili nine cikonka ibeli. Nabatishiwe mu Katolika nga fintu abafyashi bandi balefwaya, kabili naishiletampa ukwimba mu calici. Nalefwaya ukulacita ifyo Lesa afwaya pantu naletiina ukupingulwa ukupya mu mulilo wa pe.

Ilyo nali ne myaka 5, batata balibutwike pa ng’anda. Ici calengele ndeumfwa sana ubulanda. Nshaishibe icalengele ukuti batubutuke apo twalibatemenwe sana. Bamayo balebomba inshita iikalamba pa kuti fye batusakamane.

Ifyacitike fyalengele ntendeke ukulofwa ku sukulu pa kuti ndeyangala na baice bambi abalipo abakalamba pali ine. Balinsambilishe ukutukana, ukupeepa, ukwiba, no kulwa ulubuli lwa nkonya. Apo nalefwaya ukulacimfya nga tulelwa, nalisambilile ulubuli lwa kupoosa inkonya, ulwa kufutulana, e lyo na martial arts, kabili nalitendeke no kulabomfya ifyanso. Nali uwa lubuli sana. Nalelwa sana ne mfuti mu misebo, kabili ilingi line balenguma ica kuti umubili onse waleba fye umulopa kabili naleshala fye impondo. Bamayo baleumfwa sana ubulanda nga basanga ndi ifi kabili balembutushisha ku cipatala.

Ilyo nali ne myaka 16, umunandi uo naleyangala nankwe ku bwaice, Jorge alitutandalile. Atwebele ukuti ni Nte ya kwa Yehova kabili alefwaya ukutwebako ubukombe ubwacindama. Alitendeke ukutulondolwela ifyo asuminamo ukubomfya Baibolo. Apo nshatalile belengapo Baibolo, nalitemenwe ilyo anjebele ishina lya kwa Lesa e lyo ne fyo afwaya. Jorge alitwebele ukuti tulesambilila nankwe Baibolo kabili twalisumiine.

Nalitemenwe ukwishiba ukuti Baibolo taisambilisha ukuti abantu balapya mu mulilo wa pe. (Amalumbo 146:4; Lukala Milandu 9:5) Ilyo nasambilile ifi, nalilekele ukumona ukuti Lesa munkalwe, lelo natendeke ukumumona nga Wishi uwaba no kutemwa kabili uufwaya abana bakwe ukulaikala bwino.

 Ilyo natendeke ukumfwikisha ifyo nalesambilila mu Baibolo, namwene ukuti mfwile ukwalula imibele yandi. Nalingile ukuba uwaiceefya no kuleka ukuba umunkalwe. Amashiwi yaba pali 1 Abena Korinti 15:33 yalingafwile. Aya amashiwi yatila: “Ukwampana pamo na babi kulonaula imibele isuma.” Namwene ukuti nga ndefwaya ukwalula imibele yandi, nalingile ukuleka ukwangala na bantu abalelenga ndecita ifyabipa. Kanshi natendeke ukulayangala na ba mu cilonganino ca Bena Kristu, abantu abashilwa pa kupwisha amafya, lelo ababomfya Baibolo pa kuyapwisha.

Ilembo limbi ilyangafwile sana, lilembo lya Abena Roma 12:17-19 apatila, “Mwilabwesesha ububi pa bubi. . . . Mule-esha na maka yenu yonse ukuba aba mutende ku bantu bonse. . . . Mwilalandula. . . . pantu calembwa ati: ‘“Nine mfwile ukulandula, nine nkabweseshapo pa fibi ifyo bacita,” e fyasosa Yehova.’” Naishileishiba ukuti mu nshita yakwe, Yehova akalandula abantu ababa no lufyengo, kabili panono panono nalilekele ukuba umunkalwe.

Nshakalabe ifyacitike bushiku bumo ilyo naleya ku ng’anda icungulo. Abacaice bamo abali mwi bumba lya bantu abali abankalwe abo twalelwishanya nabo balinsashile, kabili uwali intungulushi yabo alingumine mu numa no kulanda ati “Ipokolole!” Nalipepele ipepo ilipi kuli Yehova ukuti angafwe ukushipikisha pali filya balenguma. Nangu ca kuti nalifwaishe ukuti mbabwekeshemo, nshababwekeshemo. Ubushiku bwakonkelepo nalikumenye uwali intungulushi ya muli lilya ibumba ninshi ali fye eka. Nalifwaile ukulandula, lelo na kabili nalipepele mu mutima kuli Yehova ukuti angafwe ukuilama. Icampapwishe ca kuti ulya mulumendo aishilenjeba ati: “Unjeleleko pali filya twacitile ubushiku bwafumineko. Na ine ndefwaya ukulasambilila Baibolo pa kuti nkabe nga iwe.” Nalitemenwe pa fyo nailamine! Ne cawamishe ca kuti nalitendeke ukusambilila Baibolo nankwe.

Icabipile ca kuti ba lupwa wandi bambi tabatwalilile ukusambilila Baibolo pali ilya nshita. Nangu cali ifi, ine nalitwalilile ukusambilila Baibolo kabili nalipangile ukuti nshakaleke icili conse ukunenga ukuleka ukusambilila. Nalishibe ukutila kuti naleka ukumfwa sana ububi nga ndesangwa na bantu ba kwa Lesa kabili nalishibe no kuti aba bene e balupwa wandi. Nalitwalilile ukulongana, kabili mu 1991 nalibatishiwe no kuba Inte ya kwa Yehova.

Kale nali umunkalwe, cumbu munshololwa kabili nali uwa lubuli. Lelo Icebo ca kwa Lesa calilenga nayalula imibele yandi. Pali ino nshita ndebako abantu abalefwaya ukumfwa ifyo Baibolo ilanda. Pa myaka 23 iyapita, ndabomba ama awala ayengi cila bushiku mu mulimo wa kwa Lesa.

Pa nshita imo nalibombeleko pa maofeshi ya Nte sha kwa Yehova mu Mexico. Ilyo nalebombela pali aya amaofeshi, nalishibene na Claudia, umwanakashi umwina Kristu uwacincila, kabili mu 1999 twalyupene. Ndatasha sana pa fyo Yehova ampaala pa kumpeela uyu cibusa wa cishinka.

Twaile mu kubombela mu cilonganino umo babomfya ululimi lwa ba nkomamatwi ulwa ku Mexico, pa kuti tuleyafwa bankomamatwi ukwishiba Yehova. Pa numa, balitutumine ukuya ku Belize mu kusambilisha abantu Baibolo. Nangu ca kuti tatwakwata sana icuma, tulakwata fyonse ifyo tukabila pa kuti tube ne nsansa kabili teti tuleke ukusambilisha abantu Baibolo pa kuti fye tukwate icuma.

Mu kuya kwa nshita, bamayo balitendeke ukusambilila Baibolo na kabili, kabili balibatishiwe. Umukalamba wandi na bena mwakwe, ukubikako na bana babo nomba ni Nte sha kwa Yehova. Abanandi bamo abo nashimikileko imbila nsuma iya Bufumu nabo balabombela Yehova.

Icabipako ca kuti balupwa wandi bamo balifwa pantu tabalekele ukuba abankalwe. Nga nalitwalilile ukuba umunkalwe, na ine nga nalifwa. Ndatasha Yehova pa fyo ampalamike kuli ena e lyo na ku bantu bakwe, abatenkanishishe no kunanga icikuuku ilyo balensambilisha ukukonka ifyo Baibolo ilanda.