Kwaba Ukulemana Ukwingi Pano Calo

CHRISTIAN, uwikala mu calo ca mu Afrika, asendelwe na bashilika balemupatikisha ukuti abe umushilika, lelo pa mulandu wa fyo asambilile mu Baibolo, alikeene. Lyene abashilika bamutwele ku kamba ka bashilika uko bamupumine inshiku shine, lyene umushilika umo amulashile imfuti ku kulu. Christian aile ku cipatala, lelo bailemuputula ukulu mwi samba lye kufi. Mu calo na cimbi ica mu Afrika, na bana fye abanono baliputulwako amolu kuli bacisanguka. Kabili ukufuma ku Cambodia ukufika ku Balkans, ukufuma ku Afghanistan ukufika ku Angola, utupata tucili tulecena no kulemanika abaice na bakalamba ukwabula ukusalulula.

Fimbi na fyo ifilemanika sana masanso na malwele, pamo nga ubulwele bwa shuga. Nangu fye ni sumu iipooswa na yo kuti yalemanika. Ku ca kumwenako, mu mishi yapalamana mu musumba wa ku Kabanga ka Bulaya, abana abengi bafyalwa no kuboko kumo ukutuntulu kumo ukwapelela fye pa nkonkoni. Bakwata fye akaboko akepi ukufuma pa nkonkoni. Casangwa ukuti icilenga miti bapoosa icipoosepoose. Abantu abengi nga nshi balikwata amolu lelo balilemana pa mulandu wa bulebe nelyo amalwele yambi. Ca cine ukuti kwaba ukulemana kwa misango misango pano calo.

Ukulemana kwalibipa te mulandu ne calenga ukulemana. Junior aputwike ukulu kwa ku kuso mwi samba ilyo ali ne myaka 20. Pa numa atile: “Inshita ishingi nalebipilwa sana. Nalelila sana pa kwishiba ukuti nshakatale nkwata na kabili ukulu. Nshaishibe ica kucita. Nalipelenganishiwe.” Lelo, mu kupita kwa nshita, Junior alyalwike icine cine. Atendeke ukusambilila Baibolo kabili asambilile ifya mwafwile, ukushipikisha ubulema no ku mulenga ukuba ne subilo lyawama ilya nshita ya ku ntanshi pano pene pe sonde. Bushe na imwe kuti mwatemwa ukukwata ili subilo, nga mwalilemana?

Nga kuti mwatemwa, mukwai belengeni icipande cikonkelepo. Kuti cawama mulebelenga na Malembo muli Baibolo wenu pa kutila mwaimwena ifyo Kabumba ateyanisha abasambilila pa bufwayo bwakwe kabili abaalula imikalile yabo ukulingana no kufwaya kwakwe.