1. Mibele nshi iikalamba iya kwa Lesa, kabili ukwishiba iyi mibele kulenga mwalaumfwa shani pali Lesa?

BAIBOLO itweba ukuti “Lesa kutemwa.” (1 Yohane 4:8) Bushe aya mashiwi yalola mwi? Ukutemwa takwaba fye pa mibele iisuma iyo Yehova akwata, lelo e mibele iikalamba iyo akwata. Taba fye no kutemwa, lelo Yehova kutemwa. Muli fyonse ifyo Lesa acita mwaliba ukutemwa. Tulatasha Yehova pa fyo aba no kutemwa ukwalengele abumbe umuulu ne sonde e lyo ne fya mweo fyonse!

2. Bushe ukutemwa kwa kwa Lesa kwalenga twacetekela finshi? (Moneni icikope pa muulu.)

² Yehova aliba ne cikuuku, kabili wa nkumbu ku fibumbwa fyakwe. Ukutemwa kwakwe kulalenga twacetekela ukuti ubufwayo bwakwe ku bantunse bukafikilishiwa. Ne ci cikalenga abamumfwila bakabe ne nsansa nga nshi. Ku ca kumwenako, apo Yehova aliba no kutemwa “alibika ubushiku umo akapingwila abantu ba pano isonde mu bulungami ku muntu uo asonta,” Yesu Kristu. (Imilimo 17:31) Twalicetekela ukuti nangu  cikabe shani akapingula abantu. Abamumfwila akabapeela umweo wa muyayaya.

3. Bushe ifintu nga fyaba shani Lesa akanaatemwa abantunse?

³ Bushe ifintu nga fyali shani nga ca kuti Lesa tatemenwe abantunse? Abantunse nga balitwalilile ukuiteka no kulatungululwa na Satana, lesa uushaba no kutemwa kabili uwaba no lupato. (2 Abena Korinti 4:4; 1 Yohane 5:19; belengeni Ukusokolola 12:9, 12.) Ifintu nga fyalibipisha nga ca kuti Yehova tatutemwa!

4. Mulandu nshi Yehova asuminishishe Satana ukulateka abantu?

⁴ Ilyo Satana apondokele imitekele ya kwa Lesa, asongele na bafyashi besu aba kubalilapo ukupondokela Lesa. Satana atwishike nga ca kuti Lesa e walinga ukuteka umuulu ne sonde. Satana aleitunga ukuti ena kuti ateka bwino abantu ukucila Lesa. (Ukutendeka 3:1-5) Yehova alisuminishe ukuti Satana ateke abantu pa nshita iinono pa kuti alange nga kuti ateeka abantu bwino. Ifyacitika filanga fye apabuuta tuutu kuti abantunse na Satana te kuti bateke bwino abantu.

5. Bushe ifyacitika kale filanga finshi?

⁵ Muno nshiku ifintu mu calo fibipilako fye. Mu myaka 100 iyapita abantu ukucila pali 100 millioni balifwa mu nkondo. Baibolo ilanda pa “nshiku sha kulekelesha” ukuti: “Ababifi kabili incenjeshi bakaya balebipilako fye.” (2 Timote 3:1, 13) Baibolo yalanda no kuti: “Mwe Yehova, ninjishiba ukuti umuntu te kuti ayendele umwine. Takwata amaka ya kutungulula intampulo shakwe.” (Yeremia 10:23) Ifyacitika kale filanga fye apabuuta tuutu ukuti aya mashiwi ya cine. Yehova tabumbile abantu na maka ya kuti baleiteka abene.

6. Mulandu nshi Lesa alekela ifyabipa ukulacitika?

⁶ Ifi Yehova aleka ububifi ukutwalilila, calenga caishibikwa ukuti mitekele fye yakwe e ingapwisha ifyabipa. Ku ntanshi Yehova akonaula bonse abacita ifyabipa. Pa numa ya konaula abacita ifyabipa, Lesa takasuminishe umuntu nangu umo ukupondokela imitekele yakwe, onse uukamupondokela akamonaula apopene fye. Icikalenga Yehova akalecita ifi, mulandu wa fintu ifyabipa ifyo bucipondoka bwaleta, kanshi takasuminishe na kabili ububifi ukubako.

7, 8. Bushe Yehova alanga shani ukuti alikwata ukutemwa?

⁷ Yehova alilanga ukuti aliba no kutemwa nga nshi mu nshila ishingi. Tontonkanyeni pa fyo isonde na mapulaneti yambi fyapangwa bwino. Mu myulu mwaba ifipinda bushiku amabilioni ayengi, kabili mu cipinda bushiku cimo mwaba amabilioni aya ntanda na maplaneti. Mu cipinda bushiku ico beta ati Milky Way umwaba ne sonde lyesu, mwaliba intanda ishingi, lumo pali isho ntanda, kasuba. Lesa nga tabikileko akasuba, pe sonde nga tapaba ifya mweo. Fyonse ifya bumbwa filanga ukuti Yehova ni Kabumba wesu, filanga no kuti alikwata imibele pamo  nga amaka, amano, no kutemwa. Ca cine ukuti “imibele yakwe [Lesa], ukutula fye apo abumbile umuntu, bailukila ku fyo abumba, muli ifi e mo belukila amaka yakwe aya pe pamo na buLesa bwakwe.”—Abena Roma 1:20.

⁸ Yehova apangile isonde mu musango wa kuti ifya mweo fileikalamo. Fyonse ifyaba mwi sonde filalenga inama na bantu ukuba no mweo. Lesa apangile ibala ilisuma pa kuti abantu baleikalamo kabili abapangile abapwililika pa kuti baleikala umuyayaya. (Belengeni Ukusokolola 4:11.) Na kabili e “upeela ifya mweo fyonse ifya kulya: Pantu icikuuku cakwe ca muyayaya.”—Amalumbo 136:25.

9. Finshi Yehova Lesa uwaba no kutemwa apata?

⁹ Yehova ni Lesa uwaba no kutemwa, lelo alipata ifyabipa. Ku ca kumwenako, Baibolo pa Amalumbo 5:4-6 yalanda pali Yehova ukuti: “Ni mwe Lesa uushisekelela mu fyabipa . . . Mwapata bonse abacita ifyabipa.” Yalanda no kuti Lesa alipata umuntu “uusumya umulopa kabili incenjeshi.”

10, 11. (a) Cinshi cikacitikila ababifi? (b) Finshi Yehova akacitila abamumfwila?

¹⁰ Pa nshita yakwe umwine, Yehova akafumya ububifi pano isonde pantu ni Lesa uwaba no kutemwa kabili alipata ifyabipa. Lesa alitulaya mu Cebo cakwe ukuti: “Incitatubi shikaloba, lelo abalolela Yehova e bakekala mu calo. Pashala panono no mubifi takabepo.” Abalwani ba kwa Yehova “bakapwila mu cushi.”—Amalumbo 37:9, 10, 20.

¹¹ Lesa na kabili alitulaya mu Cebo cakwe ati: “Abalungama e bakekala mu calo, kabili bakekalamo umuyayaya.” (Amalumbo 37:29) Abantu ababa ne cishinka kuli Lesa “bakasekelela nga nshi pantu umutende ukafula.” (Amalumbo 37:11) Cinshi cikalenga? Pantu Lesa wesu uwaba no kutemwa alacitila abantu bakwe aba cishinka ifintu ifisuma. Baibolo itweba ukuti: “[Lesa] akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.” (Ukusokolola 21:4) Ala Lesa akacitila ifisuma abamumfwila kabili abatasha pa kutemwa kwakwe!

12. Bushe umuntu “uwa kaele” aba shani?

¹² Baibolo itweba ukuti: “Lolesha uwa kaele kabili mona uwaololoka, pantu inshita ya ku ntanshi iya ulya muntu ikaba iya mutende. Lelo bampulamafunde bakalofiwa; Ababifi tabakekale imyaka iingi.” (Amalumbo 37:37, 38) Umuntu “uwa kaele” alishiba Yehova no Mwana wakwe, kabili alacita ukufwaya kwa kwa Lesa. (Belengeni Yohane 17:3.) Alishinkisha no kuti “icalo cileya pamo no lunkumbwa lwa ciko, lelo uucita ukufwaya kwa kwa Lesa akekalilila umuyayaya.” (1 Yohane 2:17) Apo impela ya cino calo naipalama, tulingile ukubika sana amano ku ‘kulolela Yehova no kusunga inshila yakwe.’—Amalumbo 37:34.

13. Ni nshila nshi iikalamba umo Lesa alangila ukuti aliba no kutemwa?

¹³ Nangu ca kuti tatwapwililika, Lesa kuti twamumfwila. Kuti twaba ne fibusa fyakwe pa mulandu we lambo lya kwa Yesu ilyo atupeela, kabili iyi e nshila iikalamba umo Lesa alangila ukutemwa. Yehova apeele icilubula pa kuti abantunse abacumfwila balubulwe ku lubembu ne mfwa. (Belengeni Abena Roma 5:12; 6:23.) Ilyo Yesu ali ku muulu ali uwa cishinka kuli Lesa pa myaka iingi, kanshi Yehova alishibe ukuti na lintu Umwana wakwe akaba pe sonde akatwalilila ukuba uwa cishinka. Apo Yehova ni Shifwe uwaba no kutemwa, alyumfwile sana ububi ilyo amwene abantu balecusha Umwana wakwe. Yesu ali uwa cishinka kabili alecita ifyalelanga ukuti Lesa e walinga ukuteka, alilangile no kutila umuntu uwapwililika kuti atwalilila ukuba uwa cishinka kuli Lesa nangu ali na mafya ayakalamba.

14, 15. Bushe abantunse banonkelamo shani mu mfwa ya kwa Yesu?

¹⁴ Yesu alikwete amafya ayakalamba, lelo alitwalilile ukuba uwa cishinka, kabili aletungilila imitekele ya kwa Yehova. Tufwile ukulatasha pa fyo Yesu atufwiliile no kulipila umutengo wa cilubula pa kuti abantu bakekale umuyayaya mu calo cipya ica kwa Lesa! Umutumwa Paulo alondolwele ifyo Yehova na Yesu balanga ukutemwa ukupitila mu cilubula, atile: “Cine cine, ilyo twali tucili abanaka, e lyo Kristu afwilile abashipepa ilyo inshita yafikile. Pantu tacaseeka umuntu ukufwila uwalungama; lelo umuntu umusuma, napamo umo kuti apama ukumufwila. Lelo Lesa alitulanga ukutemwa kwakwe pantu ilyo twali tucili ababembu, Kristu alitufwilile.” (Abena Roma 5:6-8) Umutumwa Yohane alembele ukuti: “Kuli ici e ko ukutemwa kwa kwa Lesa kwamonekele muli ifwe, pantu Lesa atumine Umwana wakwe uwafyalwa eka ukwisa muli ici calo ukuti tukwatile umweo muli ena. Uku e kutemwa, te mu kuti ni fwe twatemenwe  Lesa, lelo ni mu kuti ena e watutemenwe no kutuma Umwana wakwe ku kuba ilambo lya kufuta pa membu shesu.”—1 Yohane 4:9, 10.

¹⁵ Yesu alandile ukuti, “Lesa atemenwe nga nshi aba pano calo ica kuti apeele Umwana wakwe uwafyalwa eka, ukuti onse uumutetekela ekonaika lelo akabe no mweo wa muyayaya.” (Yohane 3:16) Yehova alipeele Umwana wakwe ukuba icilubula nangu ca kuti calengele aumfwa ububi sana. Ifi acitile filanga ukuti alitemwa abantu nga nshi, kabili akatwalilila fye ukubatemwa. Paulo alembele ati: “Ninshininkisha ukuti nangu ni mfwa nangu mweo nangu ni bamalaika nangu mabuteko nangu fintu ifyabapo nangu fintu ifikesabako nangu fya maka nangu ifya pa muulu nangu ifya pa nshi nangu ifyabumbwa tafyakabe na maka ya kutupaatulako ku kutemwa kwa kwa Lesa ukwaba muli Kristu Yesu Shikulwifwe.”—Abena Roma 8:38, 39.

16. Bushe Ubufumu bwa buMesia ni cinshi? Kabili nani Yehova asonta ukuba Kateka wa ubu Bufumu?

¹⁶ Cimbi icilanga ukuti Yehova alitemwa abantunse, ni fi abikako Ubuteko bwakwe, e kutila Ubufumu bwa buMesia. Mulandu nshi twalandila ifyo? Pantu Yehova alisonta Kateka uwatemwa abantu kabili uwafikapo ukuteka, no yu ni Yesu Kristu. (Amapinda 8:31) Lesa alisala na bantu 144,000 abakateka na Kristu ku muulu. Apo bali bantunse, nga babuushiwa no kuya ku muulu baleshiba ifyo abantunse bapitamo. (Ukusokolola 14:1) Ilyo Yesu ali pe sonde, ico alelandapo sana ilyo alesambilisha abantu, Bufumu kabili alisambilishe abasambi bakwe ifya kupepa, atile: “Shifwe wa mu muulu, ishina lyenu libe ilya mushilo. Ubufumu bwenu bwise. Ukufwaya kwenu kucitwe pano isonde nga mu muulu.” (Mateo 6:9, 10) Tulafwaisha ukumona ifyo ili ipepo tupepa likafikilishiwa, ilyo Ubufumu bwa kwa Lesa bukalenga abantu bakakwate amapaalo ayengi!

17. Bushe imitekele ya kwa Yesu yapusana shani ne mitekele ya bantunse?

¹⁷ Paliba ubupusano ubukalamba nga nshi pa mitekele ya kwa Yesu e lyo ne mitekele ya bantunse. Imitekele ya bantunse yalilenga kwaba inkondo ishalenga amamilioni ya bantu ukufwa. Lelo Yesu Kateka wesu alitutemwa nga nshi kabili apashanya imibele ya kwa Lesa iisuma, maka maka ukutemwa. (Ukusokolola 7:10, 16, 17) Yesu atile: “Iseni kuli ine imwe bonse mwe balecula kabili abafininwa, na ine nalamusansamusha. Sendeni ikoli lyandi no kusambilila kuli ine, pantu nalifuuka kabili nali-icefya, e lyo mwalasanga ukutuusha. Pantu ikoli lyandi talyafina, ne cipe candi calyanguka.” (Mateo 11:28-30) Ala ubu bulayo busuma nga nshi!

18. (a) Cinshi cicitika ukutula mu mwaka wa 1914? (b) Finshi tukalandapo mu cipande cikonkelepo?

¹⁸ Baibolo ilangilila ukuti Ubufumu bwa kwa Lesa bwatendeke ukuteka mu 1914. Ukutula lilya, Lesa alalonganika abashalapo abakateka pamo na Yesu ku muulu, e lyo na ba mwi “bumba ilikalamba” abakapusuka ilyo cino calo cikonaulwa, kabili abakengila mu calo cipya. (Ukusokolola 7:9, 13, 14) Bushe ibumba likalamba lyakula shani? Finshi Lesa afwaya ukuti ababa muli ili bumba balecita? Tukalanda pali ifi fipusho mu cipande cikonkelepo.