Bamo Bakalateka, E lyo Abengi Bakasekelamo

UKUTULA mu nshita ya batumwa, Lesa alasala Abena Kristu bamo, no kubabuula ukuba abana bakwe. Uku kwaluka ukukalamba nga nshi ica kuti Baibolo ikwita ati ukufyalwa cipya cipya. Ico kwabela ukufyalwa cipya cipya kupekanya ababomfi ba kwa Lesa abafyalwa libili ukuyateka ku muulu. (2 Timote 2:12) Pa kuti babe bakateka, balababuusha ku bafwa no kubapeela ubumi ku muulu. (Abena Roma 6:3-5) Kulya, “bakaba bashamfumu abakalateka isonde” pamo na Kristu.—Ukusokolola 5:10; 11:15.

Lelo, Icebo ca kwa Lesa citila no kuti ukulunda pa bafyalwa libili, bambi nabo bakapusuka. Mu Baibolo (mu Malembo ya CiHebere na ya CiGriki aya Bena Kristu), balilandapo ukuti Lesa akapususha amabumba yabili aya bantu, ibumba linono ilya bakateka ku muulu, ne bumba likalamba ilya bakekala pe sonde. Natulande pa fyo umutumwa Yohane alembeele Abena  Kristu banankwe abafyelwe libili. Alandile pali Yesu ati: “Ena e lambo lya pa membu shesu [ibumba ilinono] ilitubwesesha kuli Lesa, kabili te shesu fye sheka lelo ne sha ba pano calo bonse [ibumba ilikalamba].”—1 Yohane 2:2.

Umutumwa Paulo na o alembele ati: “Ifibumbwa [ibumba likalamba] filalolela nga nshi ukumona ilyo Lesa akasokolola abana bakwe [ibumba linono].” (Abena Roma 8:19-21) Bushe aya mashiwi ya mutumwa Yohane no mutumwa Paulo yalola mwi? Yalola mu kuti abafyalwa libili bakalateka mu muulu. Mulandu nshi? Pa kuti bakalete amapaalo ku bantunse abengi nga nshi, abakalatekwa no buteko bwa kwa Lesa kabili abakalaikala pano calo. E co Yesu asambilishishe abasambi bakwe ukupepa ati: “Ubufumu bwenu bwise. Ukufwaya kwenu kucitwe pano isonde nga mu muulu.”—Mateo 6:10.

Ici cishinka ca kuti kwaba amabumba yabili ayakapusuka e mo caba na mu Malembo ya CiHebere. Moneni ifyo Yehova aebele Abrahamu, uwali icikolwe ca kwa Yesu. Atile: “Mu mwana obe [e kuti ibumba linono] e mo inko shonse isha pe sonde [e kuti ibumba likalamba] shikaimwena amapaalo.” (Ukutendeka 22:18) Ca cine, inko shonse shali no kupaalilwa mu “mwana” wa kwa Abrahamu.

Bushe uyu wine “mwana” nani? Ni Yesu Kristu, pamo na bafyalwa libili, ababa abana ba kwa Lesa. Umutumwa Paulo alondolwele ati: “Nga ca kutila muli ba kwa Kristu, ninshi cine cine muli bana ba kwa Abrahamu.” (Abena Galatia 3:16, 29) Bushe abantu ba mu nko shonse bapaalilwa shani muli uyu “mwana”? Balapokelelwa kuli Lesa kabili bakekala umuyayaya mu paradaise pano pene pe sonde. Davidi, uwaimbileko amalumbo, asobele ati: “Abalungama e bakekala mu calo, kabili bakekalamo umuyayaya.”—Amalumbo 37:29; Esaya 45:18; Ukusokolola 21:1-5.

Ca cine, bantu fye abanono abakateka mu muulu, lelo abantu abengi nga nshi abakekala umuyayaya pano calo bakasekelamo muli uku kuteka na mapaalo bukaleta. Kuti cawama sana nga ca kuti na imwe no lupwa lwenu mwaba pali abo abakaipakisha amapaalo ayo Ubufumu bwa kwa Lesa bukaleta.

[Icikope pe bula 12]

Abantu abengi nga nshi bakapaalwa no kwikala umuyayaya pano calo. Bushe na imwe mukaba pali aba?