Baibolo Ilaalula Abantu

Cinshi calengele ukuti umwaume uwalebomfya sana imiti ikola kabili uwabikile fye amano ku fyangalo no kwensha icitukutuku nelyo Honda, atendeke ukulabombela Lesa inshita yonse? Cinshi calengele ukuti umwaume uwalesangila ubwikalo mu kuteya ifyangalo fya kushitikapo indalama ne fipe aleke no kutendeka ukubomba incito iisuma pa kuti alesunga ulupwa lwakwe? Cinshi calengele umukashana uwakuliile mu lupwa lwa Nte sha kwa Yehova uwalekelepo ukupepa inshita imo, atendeke ukupepa na kabili? Yumfwileni ifyo abene balandile.

ILYASHI LYA KUBALILAPO

ISHINA: TERRENCE J. O’BRIEN

IMYAKA: 57

ICALO: AUSTRALIA

IFYO BALI: BALEBOMFYA IMITI IKOLA KABILI BALITEMENWE SANA UKWENSHA IFITUKUTUKU

INKULILO YANDI: Nakuliile mu musumba wa Brisbane, umusumba ukalamba mu citungu ca Queensland. Bonse mu lupwa twalepepa ku Katolika, lelo ilyo nali ne myaka 8, twalilekele ukupepa kabili twalilekele no kulanshanya ifya mapepo. Ilyo nali ne myaka 10, twakukiile ku Gold Coast mu calo ca Australia. Twaleikala mupepi no lulamba lwa bemba, kabili ilyo nali umwaice nalitemenwe sana ukoowa no kwangala ifyangalo fimbi ifya pa menshi.

Na lyo line, ilyo nalekula nshali ne nsansa. Batata balilekele bamayo ilyo nali ne myaka 8. Bamayo baupilwe ku baume bambi, kabili lyonse pa ng’anda paleba ukunwa ubwalwa no kuumana. Bushiku bumo, inshita ya bushiku, ilyo bamayo na batata baumene sana, naikele pa busanshi kabili nalapile ukuti nga nkoopa, nshakalakepo no mukashi wandi. Nangu ca kutila twalikwete amafya, ukumfwana kwena twaleumfwana. Mu lupwa lwesu twalimo abana 6, e lyo na bamayo na batata.

Ilyo nali umulumendo, abanandi abengi balilekele ukumfwila ubuteko. Balepeepa ibange, fwaka ne miti ikola imbi kabili balekolwa sana ubwalwa. Na ine natendeke ukulacita ifyo ndefwaya nga filya fine abanandi balecita. Na kabili nalitemenwe sana ukwensha ifitukutuku. Nangu ca kutila nalipo mu masanso, nshalekele ukwensha ifitukutuku kabili napangile ukwensha icitukutuku ukufuma uko twaleikala ukulalanya icalo ca Australia ukuyafika ku mpela.

Nangu ca kutila nalikwete ubuntungwa bwa kucita ico ndefwaya, naleumfwa sana ububi nga  natontonkanya pa mibele ya mu calo na fintu abantu abengi bashalebikako amano ku mafya ya bantu. Nalefwaya ukwishiba icine pali Lesa, pa mipepele na pa fyo ifintu fyabipila mu calo. Nomba ilyo naipwishe bashimapepo babili aba ku Katolika, ifyo banjaswike te fyo nale-enekela. Nalipwishe na bashimapepo balekanalekana aba ku macalici yambi, lelo na bo bene balifililwe ukunondolwela bwino bwino. Lyena cibusa wandi umo anjebele ukuti nkepushe Eddie, Inte ya kwa Yehova. Nalanshenye na Eddie imiku 4, kabili lyonse alebomfya Baibolo pa kwasuka amepusho yandi. Pa muku wa kubalilapo fye twalanshenye nankwe, nalishibe ukuti ninsanga icine. Lelo nangu cali fyo nshalemona ukuti mfwile ukwalula imibele yandi.

IFYO BAIBOLO YA-ALWILE UBUMI BWANDI: Ilyo nali pa lwendo lwa kuyafika ku mpela ya Australia, nakumene na Nte umbi uo twalanshenye nankwe Icebo ca kwa Lesa. Nomba ilyo nabwelelemo ku Queensland, nshamonenepo na baNte pa myeshi 6.

Bushiku bumo nalefuma ku ncito ndeya ku ng’anda, namwene abaume babili mu musebo abafwele bwino sana, nabasenda ne fyola kabili natile kwena balya bafwile ukuba ni Nte sha kwa Yehova. Nali-ile mupepi kabili ilyo nabepwishe nga ca cine ni Nte sha kwa Yehova, balisumine kabili nabebele ukuti ndefwaya balensambilisha Baibolo. Ilyo line fye, nalitendeke ukusangwa ku kulongana kwa Nte sha kwa Yehova kabili nalisangilwe na ku kulongana kukalamba ukwali mu musumba wa Sydney mu 1973. Lelo, ilyo balupwa lwandi baumfwile ukuti ndasambilila Baibolo no kulongana ne Nte sha kwa Yehova, balifulilwe sana, maka maka bamayo. Pa mulandu na balupwa ne fintu na fimbi, nalilekele ukusambilila no kulongana na baNte. Pa mwaka umo uutuntulu, nabikile fye amano ku kuteya ubwangalo natemenwe sana ubo beta ati cricket.

Nomba naishilesanga ukuti ilyo fye nali ne nsansa ni lilya nalesambilila Baibolo ne Nte sha kwa Yehova. E ico nalitendeke ukusambilila nabo na kabili, nalitendeke no kuIongana. Nalilekele no kwangala na banandi abalebomfya imiti ikola.

Icalengele sana ukuti njaluke cintu nasambilile pa muntu umo uwalandwapo muli Baibolo, no yu muntu ni Yobo. Nte umo umukoloci uwa cikuuku, lelo uushalepita mu mbali pa kulanda, e walensambilisha Baibolo lyonse. Ishina lyakwe ni Bill. Ilyo twasambilile pa lyashi lya kwa Yobo, ba Bill banjipwishe ukuti, ni bani bambi abo Satana atila tababombela Lesa no mweo onse? (Yobo 2:3-5) Nalumbwile abantu balekanalekana abo naishibe abalembwa mu Baibolo, kabili ba Bill mu mutekatima balenjasuka fye abati, “Ee, ee, ca cine.” Lyena balindoleshe kabili batile, “Ifi fine e fyo Satana alanda na pali iwe wine!” Nalipapile sana. Ilyo tatulasambilila pali ili lyashi, ninshi kale kale nalishibe ukuti ifyo nalesambilila fyali fya cine. Nomba ilyo twasambilile pali Yobo e lyo naishibe umulandu nalingile ukucitilapo cimo pa fyo nalesambilila. Ilyo papitile fye imyeshi 4, nalibatishiwe no kuba Inte ya kwa Yehova.

IFYO NANONKELAMO: Ino nshita ndomfwa no mwenso nga natontonkanya pa fyo ubumi bwandi bwali no kuba nkanasambilila Baibolo. Ukwabula no kutwishika, nga nalifwa kale. Abengi abo naleangala nabo balifwa pa mulandu wa kubomfya imiti ikola no kunwesha ubwalwa. Kabili tabakwete insansa mu fyupo fyabo. Na ine wine ifi fine nge fyo imikalile yandi yali.

Ino nshita nalyupa, kabili ine no mukashi wandi Margaret, tubombela pa maofeshi ya Nte  sha kwa Yehova mu Australia. Tapaba lupwa lwandi nangu umo uupepa Yehova. Na lyo line, mu kupita kwa myaka, ine na Margaret twalisambilila Baibolo na bantu abengi kabili balyalula imibele yabo, kwati fye ni fi fine na ine nacitile. Ici calenga ukuti tukwate ifibusa ifingi ifisuma. Na kabili, Margaret, uwakuliile mu lupwa lwa Bena Kristu alingafwa ukufikilisha umulapo uo nalapile imyaka nalimo 40 iyapita. Pa myaka ukucila 25 iyo twaikala mu cupo, twaba fye aba nsansa. Kwena, te fyonse tusuminishanya, lelo pa nshita yonse iyo twaikala mu cupo tatwatala atumanapo. Ine na Margaret twalishiba ukuti icalenga, ni fi twasambilila Baibolo.

ILYASHI LYA BUBILI

ISHINA: MASAHIRO OKABAYASHI

IMYAKA: 39

ICALO: JAPAN

IFYO BALI: BALETEYA IFYANGALO FYA KUSHITIKAPO INDALAMA

INKULILO YANDI: Nakuliile mu mushi uunono uwa Iwakura, kabili ukufuma mu musumba wa Nagoya ukufika ku Iwakura, kwenda nalimo amamineti 30 nga muninine ishitima. Bamayo na batata bali ne mitima iisuma sana. Lelo naishileishiba pa numa ukuti batata bali mwi bumba lya yakuza, ibumba lya bantalamisoka kabili inshita imo indalama baleleta pa ng’anda shali sha kwiba fye. Cila bushiku balenwa sana ubwalwa kabili ilyo nali ne myaka 20, amabu yabo yalyonaike ku bwalwa kabili balifwile.

Batata bali bena Korea, kanshi mu mushi twaleikala baletukankamba. Ubu bwafya na mafya yambi fyalengele ukuti inkulilo yandi ibipe sana. Nalitendeke ukuya kwi sukulu lya ku sekondari lelo naleyako fye limo limo kabili pa numa ya mwaka umo nalilekele. Calyafishe sana ukusanga incito pantu nalicitilepo umulandu ica kuti na bakapokola balinjishibe, e lyo cimbi ca kuti batata bali bena Korea. Umuye nshiku, nasukile nasanga incito nomba nali-icenene mu makufi kabili ukutule lyo nshibomba incito yakosa.

Natendeke ukuteya icangalo cimbi ica kushitika indalama, kabili umu mwine e mo nalesanga indalama sha kubomfya. Pali iyi nshita, naleikala no mwanakashi uwanjebele ukuti pa kuti tukopane kano nasanga incito yalondoloka. Lelo nalepanga indalama ishingi sana kuli ici cine cangalo, kabili nshalefwaya ukuleka.

IFYO BAIBOLO YA-ALWILE UBUMI BWANDI: Bushiku bumo, Nte umo aishile pa ng’anda pa mwesu kabili anshilile icitabo citila Life—How Did It Get Here? By Evolution or by Creation? Nshatalile ntontonkanyapo pali ici cipusho. Lelo ilyo nabelengele ici citabo, nalisumine ukusambilila na fimbi ifya mu Baibolo. Lyonse naletontonkanya pa cicitika umuntu nga afwa. Ifyasuko nasangile muli Baibolo pa bafwa na pa malyashi yambi, fyalyumfwikike bwino sana kabili naumfwile kwati amamba ye sabi yapona mu menso yandi ica kuti natendeka no kumona.

Nalimwene ukuti mfwile ukulacita ifyo ndesambilila mu Baibolo. E ico, nalilembeshe icupo  candi, nalekele ukupeepa fwaka, nalibeyele ne imishishi yandi iitali, kabili nalitendeke no kulamoneka bwino. Nalilekele fye no kuteya ifyangalo fya kushitikapo indalama ne fipe.

Tacali icayanguka ukuleka ifi fyonse. Ku maka yandi ne mwine nga nshalekele ukupeepa fwaka. Lelo ukupepa lyonse kuli Yehova Lesa no kushintilila pali ena, kwalingafwile ukuleka. Na kabili, ilyo nalekele ifyangalo fya kushitikapo indalama, nalingile incito, nomba nalefola fye indalama ishinono. Nga kulinganya ku ndalama nalepanga kale, isho natendeke ukufola shali fye ni hafu, kabili incito yali iyakosa kabili yalenasha sana. Ilembo limo ilya mu Baibolo ilyangafwile pali ilya nshita ya mafya, lilembo lya Abena Filipi 4:6, 7. Litila: “Mwisakamikwa nangu kamo, lelo muli fyonse lekeni ifyo mulelomba fishibikwe kuli Lesa mu kupepa no kupapaata pamo no kutootela; no mutende wa kwa Lesa uwacila amatontonkanyo yonse ukalinda imitima yenu na matontonkanyo yenu muli Kristu Yesu.” Nalishininkisha ukuti aya mashiwi ya cine pantu ifyalembwa pali ili lembo fyalincitikila imiku iingi.

IFYO NANONKELAMO: Ilyo fye natendeke ukusambilila Baibolo ne Nte sha kwa Yehova, abena mwandi tabatemenwe. Lelo ilyo bamwene ifyo imibele yandi ya-alwike, na bo balitendeke ukulasangwapo nga balensambilisha Baibolo kabili na bo balitendeke no kulasangwa ku kulongana kwa Nte sha kwa Yehova. Ino nshita bonse babili tuli Nte sha kwa Yehova. Ala lishuko nga nshi ukubombela Lesa pamo no mukashi wandi!

Ilyo nshilatendeka ukusambilila Baibolo, nalemona kwati nali ne nsansa. Nomba ino nshita e lyo naishiba icilenga umuntu ukukwata insansa sha cine cine. Ukulakonka ifyo Baibolo ilanda takwayanguka, lelo nalishininkisha ukuti ukucita ifi e kwawamisha.

ILYASHI LYA BUTATU

ISHINA: ELIZABETH JANE SCHOFIELD

IMYAKA: 35

ICALO: UNITED KINGDOM

IFYO BALI: ICO BALEFWAYA FYE KWANGALA PA MPELA YA MULUNGU

INKULILO YANDI: Nakuliile mwi tauni ilinono ilya Hardgate, ilyabela mupepi no musumba wa Glasgow mu Scotland. Ilyo nali ne myaka 7, bamayo abaishileba Inte ya kwa Yehova, batendeke ukulansambilisha Baibolo. Lelo ilyo nali ne myaka 17, nalitemenwe sana ukwangala na banandi aba ku sukulu, ukuya ku fikuulwa fya bwalwa, ukukutika ku nyimbo sha congo sana e lyo no kunwa ubwalwa. Ifya kwa Lesa fyena nshalefibikako amano nangu panono. Ico nabikileko amano kuya mu kwangala pa mpela ya mulungu. Lelo fyonse ifi fyalyalwike ilyo nali ne myaka 21.

Naile mu kutandalila balupwa lwandi ku  Northern Ireland. Ilyo nali kulya, nalitambileko ukusefya kumo ukwa ba Protestanti uko beta ati Orange Walk. Pali uku kusefya, ba Protestanti abengi balendela capamo mu musebo. Ifyo namwene fyalimponeshe pa musao, ba Protestanti na ba Katolika balipatene icine cine kabili balepontelana. Ifyo namwene fyalengele ukuti ntontonkanye pa mikalile yandi. Nalibukishe ifyo bamayo bansambilishe mu Baibolo kabili nalishibe ukuti Lesa te kuti atemwe abantu abasuula amafunde yakwe. Lyena nalikutulwike ukuti nalecita fye ifya kuisekesha kabili nalisuulile ku fyo Lesa alefwaya ukuti ndecita. Napingwilepo ukuti nga nabwelelamo ku Scotland, nkabikako amano ku kwishiba ico Baibolo isambilisha.

IFYO BAIBOLO YA-ALWILE UBUMI BWANDI: Nalitampile ukulongana ne Nte sha kwa Yehova na kabili, nomba umuku wa kubalilapo naile ku kulongana ilyo nabwelele ku Scotland, nalyumfwile sana insoni. Lelo bonse balimpokelele bwino. Ilyo natendeke ukulacita ifyo nalesambilila muli Baibolo, nkashi umo uo twalelongana nankwe alintemenwe sana. Alingafwile sana ukanalaimona kwati nshalingile ukuba mu cilonganino na kabili. Abo naleangala nabo kale balitwalilile ukulafwaya ukuti ndeya nabo ku fikuulwa fya bwalwa, lelo nalibebele ukuti nomba amano yandi yonse yali ku kulacita ifyo Baibolo isambilisha. Balisukile baleka ukulantandalila.

Kale, nalemona kwati Baibolo citabo ca kubelengamo fye amafunde yeka yeka. Lelo te fyo caba. Natendeke ukumona ukuti abantu abalembwamo ba cine cine kabili bantu fye nga ine, limo balebipilwa e lyo limo balesangalala kabili limo balelufyanya. Nabo bene balebembuka, lelo Yehova Lesa alebelela nga balapila ukufuma pa nshi ya mutima. Nalicetekele ukuti nangu ca kutila nalilekele ukupepa Lesa ilyo nali umwaice, akambelela uluse no kulaba ku fyo nalufyenye nga ca kutila nde-esha na maka ukucita ifyo afwaya.

Imibele ya bamayo na yo yalinkoseleshe sana. Nangu ca kutila nalilekele ukupepa Lesa, bena tabalekele. Ifi batwalilile fye ukuba aba cishinka, canengele ukwiluka ukuti ukubombela Yehova takuya fye mu menshi. Ilyo nali umwaice, nshaletemwa nga naya na bamayo mu kushimikila mu mayanda ya bantu kabili nshaletontonkanyapo ukuti nkalapoosa inshita iikalamba ukushimikila ku bantu. Nomba nalefwaya ukumona ifyo Yesu alaile nga fya cine, ifyalembwa pali Mateo 6:31-33. Atile: “Mwisakamikwa amuti, ‘Tulelya nshi?’ nelyo, ‘Tulenwa nshi?’ nelyo, ‘Tulefwala nshi?’ . . . Pantu Shinwe wa mu muulu alishiba ukuti mulakabila ifi fyonse. E ico, intanshi mulefwaya ubufumu no bulungami bwakwe, na fyonse ifi ifyo mukabila akamupeela.” Tapakokwele ukutula apo nabatishiwilwe ukuba Inte ya kwa Yehova, nalilekele incito nalebomba no kwingila incito ya kubomba fye ama-awala yanono kabili natendeke no kulabilisha imbila nsuma inshita yonse.

IFYO NANONKELAMO: Ilyo nali umwaice nalefwaya fye ukula-angala pa mpela ya mulungu, nomba nshali ne nsansa. Nali fye cimbi cimbi. Nomba apo ndabombela Yehova inshita yonse, naliba ne nsansa icine cine. Nalishiba umulandu nabela pano calo. Nomba nalyupwa, kabili cila mulungu ine na bena mwandi tulatandalila ifilonganino fyalekanalekana ifya Nte sha kwa Yehova no kukoselesha aba bwananyina. Mona ukuti lishuko nga nshi ukubomba uyu mulimo. Ndatasha sana Yehova pa kumpeela ishuko lya kumubombela na kabili!

[Amashiwi pe bula 27]

“Pa muku wa kubalilapo fye twalanshenye nankwe, nalishibe ukuti ninsanga icine. Lelo nangu cali fyo nshalemona ukuti mfwile ukwalula imibele yandi”

[Amashiwi pe bula 29]

“Ku maka yandi ne mwine nga nshalekele ukupeepa fwaka. Lelo ukupepa lyonse kuli Yehova Lesa no kushintilila pali ena, kwalingafwile ukuleka”

[Amashiwi pe bula 30]

“Kale, nalemona kwati Baibolo citabo ca kubelengamo fye amafunde yeka yeka. Lelo te fyo caba.Natendeke ukumona ukuti abantu abalembwamo ba cine cine kabili bantu fye nga ine, limo balebipilwa e lyo limo balesangalala kabili limo balelufyanya”