Ifyo Twaishiba Ukuti Lesa Cine Cine Alatusakamana

KWALIBA icipusho icacindama nga nshi ico abantu bepusha ukufuma fye na kale, ici cipusho ca kutila: Nga ca kutila Lesa alitutemwa, mulandu nshi mu calo mwafulila ukucula? Napamo mulesumina ukuti nga mwalitemwa umuntu umo, teti mutemwe ukumona uyo muntu alecula, kabili nga ca kutila ali mu bwafya kuti mwamwafwa. Apo ici ca cine, abengi bamona ukuti ifi mu calo mwaba sana ukucula, ninshi Lesa tatusakamana. Kanshi nacicindama ukuti tubale tulande pa filanga ukuti Lesa alitutemwa kabili alatusakamana.

Ifyo Lesa Abumba Filatulanga Ukuti Alitutemwa

Yehova Lesa e ‘wapangile umuulu ne sonde na bemba na fyonse ifyabamo.’ (Imilimo 4:24) Nga twatontonkanya pa fyo Yehova apanga, ukwabula no kutwishika kuti twasumina ukuti alatusakamana. Taleni tontonkanyeni pa fintu ifyo apanga ifitulenga ukumfwa bwino no kusansamuka. Bushe mwalitemwa ifya kulya ifisuma? Yehova afwaya nga atupeele fye umusango umo uwa fya kulya pa kuti tutwalilile ukuba aba mweo. Lelo apangile imisango  yalekanalekana iya fya kulya ifisuma ifingi pa kuti tuleumfwa bwino nga tulelya. Na kabili, Yehova alimesha imiti na maluba ayalekanalekana ayasuma, alipanga ne mpili ne mimana e lyo ne mpanga ishimoneka bwino pa kuti tuleipakisha.

Tontonkanyeni na pa fyo twapangwa. Tulaseka, tulomfwa bwino ukukutika ku nyimbo, na kabili tulatemwa sana ukutamba ifintu ifyayemba. Nangu ca kuti ifi fyonse tafitupeela ubumi, Lesa alitupeela pa kuti tuleipakisha ubumi. Kabili tontonkanyeni pa fyo mumfwana na bantu bambi. Bushe kwaliba ushiipakisha ukuba ne fibusa ifisuma nelyo ukukumbatilwa ku muntu uwamutemwa? E ico, ukutemwa bambi bupe ubo Lesa uwakwata ukutemwa atupeela! Lesa apangile abantu ukuti baletemwana, kanshi ici cilanga ukuti na Lesa wine alikwata ukutemwa.

Baibolo Ilatulanga Ukuti Lesa Aliba no Kutemwa

Baibolo itweba ukuti Lesa kutemwa. (1 Yohane 4:8) Ukutemwa kwakwe takumonekela fye mu fyo abumba lelo kulamonekela na mu Cebo cakwe, Baibolo. Ku ca kumwenako, muli Baibolo mwaliba ifya kukonka ifingalenga umo ukuba no bumi ubusuma, ilatukoselesha ukulinga muli fyonse, kabili ilatusoka ukutaluka kuli bucakolwa na ku buliili.—1 Abena Korinti 6:9, 10.

Baibolo na kabili ilatufunda ifyo tufwile ukulaumfwana na bambi, ilatufunda ukutemwana e lyo no kucindika bambi no kuba no luse. (Mateo 7:12) Yalikaanya imisango ne mibele iingatuletelela, pamo nga, ubufunushi, ulwambo, umufimbila, ubucende e lyo no kwipaya. Nga ca kutila bonse bale-esha ukukonka uku kupanda mano ukusuma ukwaba mu Baibolo, ukwabula no kutwishika mu calo te kuti mube sana ukucula.

Lelo, Lesa alanga ukuti alitutemwa sana pa kutupeela Umwana wakwe, Yesu, uwatulubula. Yohane 3:16 itila: “Lesa atemenwe nga nshi aba pano calo ica kuti apeele Umwana wakwe uwafyalwa eka, ukuti onse uumutetekela ekonaika lelo akabe no mweo wa muyayaya.” Kanshi Yehova alipekanya kale ukufumyapo imfwa umupwilapo no kucula konse apo kwapela.—1 Yohane 3:8.

Kanshi, fingi ifilanga ukuti Yehova alitutemwa. Ici calanga fye apabuuta ukuti tomfwa bwino nga tulecula. Akafumyapo ukucula. Tatulekabila no kulatunganya pa fyo akacita, pantu Baibolo ilatweba ifyo Lesa akacita pa kupwisha ukucula.

[Icikope pe bula 4]

Ukutemwa bambi bupe ubwafuma kuli Lesa uwakwata ukutemwa