Ababelenga Ino Magazini Balepusha Ukuti . . .

Bushe Lesa Alikwata Intendekelo?

▪ Baibolo yasuka ukuti Lesa takwata intendekelo. Ukufuma fye na kale, Lesa e ko ali. Ifi tatumfwikisha ukutila Lesa abako ku ciyayaya, te cingalenga tukaane ukuti takwata intendekelo.

Bushe kuti twaenekela ukwishiba fyonse fye pali Lesa? Umutumwa Paulo alandile ukuti: “Iye amapaalo ubwingi ayafuma kuli Lesa! Yangu ifyo akwatisha amano! We fintu ubwingi ifyo aishibisha! Takuli nangu umo uwingeluka ubupingushi bwakwe ne mibele yakwe!” (Abena Roma 11:33) Te kuti tumfwikishe amano ubwingi ayo Lesa akwata ne fyo aishiba nga filya fine umwana umunono ashingeshiba fyonse pa bafyashi bakwe. Nangu ca kutila aya mashiwi ayafumine kuli Lesa ayo Paulo alandile yalanda sana pa fyo amano ya kwa Lesa no luse lwakwe fyaibela, yalanga no kuti kwaliba ifintu fimo ifyo tushingomfwikisha pali Yehova Lesa ne fyo acita ifintu. Pa fintu ifyo tushingomfwikisha paba ne cishinka ca kuti Lesa takwata intendekelo. Lelo kuti twacetekela umupwilapo ifyo Baibolo isambilisha pali Lesa. Yesu Kristu alandile pa malembo ya mushilo ukuti: “Icebo cenu e cine.”—Yohane 17:17.

Ilyo Mose alepepa kuli Yehova, alandile ukuti: “Ukufuma umuyayaya no kuya umuyayaya ni mwe Lesa.” (Amalumbo 90:2) Mose alandile ifintu fibili pali Lesa. Ica kubalilapo ca kuti Yehova ‘abako umuyayaya.’ (Ukusokolola 4:10) Kanshi Lesa akabako ku ciyayaya. Ica bubili ca kuti, Lesa abako ukufuma umuyayaya. Kanshi tapangilwe kabili takwata intendekelo. Lelo Lesa e ko aali ukufuma fye ku kale sana.

Ifintu fimo fyalyafya nga nshi ukumfwikisha. Inshita shimo, kulaba ifitwafya ifyo tulingile fye ukusumina pamo nga, ukupenda amanambala. Ukupenda amanambala takupela, nampo umuntu pa kupenda aleya pa muulu nelyo pa nshi. Bushe ica kumwenako ca musango yu tacingatwafwa ukusumina ukuti na Kabumba kuti akwata imyaka ya ciyayaya?

Kanshi Lesa fye epela e walinga ilumbo lya kutila “Imfumu ya muyayaya.” (1 Timote 1:17) Tontonkanyeni pali ici: Yesu Kristu, iminshipendwa ya bamalaika mu muulu, e lyo na bantunse pe sonde, bonse balikwata intendekelo pantu balipangilwe. (Abena Kolose 1:15, 16) Lelo Lesa ena takwata intendekelo. Ukupampamina fye pa kuti Lesa afwile alikwata intendekelo kuti kwalenga umuntu atampa ukulatontonkanya ifishilingile ifya kufwaya ukwishiba uwapangile Kabumba. Yehova fye e wabako “ukufuma umuyayaya no kuya umuyayaya.” (Amalumbo 90:2) Nangu tutile, Yehova abako “ukufuma ku nshita pe.”—Yuda 25.

Mulingile no kwishiba ukuti icishinka ca kuti Lesa abako umuyayaya calicindama. Ukumfwikisha amashiwi yaba mwi pepo Mose apepele, kulanga ukuti ifi Lesa abako umuyayaya, ninshi ubulayo bwakwe ubusuma nga nshi ubwa kuti tukekale umuyayaya bukafikilishiwa. Ukupusanako ne fi twikala imyaka iinono pa calo, Lesa ena bamulondolola ukutila aba “bwikalo bwesu ubwa cine cine ku nkulo ne nkulo.” Apo Yehova ni Shifwe uwatutemwa, ukufuma fye na kale alafwa abantu bakwe, na ino ine nshita alabafwa, kabili akatwalilila ukubafwa. Shi ukwishiba ici cine pali Lesa nakulemusansamusha!—Amalumbo 90:1.