Ababelenga Ino Magazini Balepusha Ukuti . . .

Bushe Abantu Bonse Cikabangukila Ukwishiba Lesa?

▪ Ilyo Yesu bamwipwishe ukuti lifunde nshi ilikalamba mu Mafunde yonse, atile: “Uletemwa Yehova Lesa obe no mutima obe onse, no mweo obe onse, no kutontonkanya kobe konse.” (Mateo 22:37) Lelo, ilyo abantu bashilatemwa Lesa, bafwile ukumwishiba bwino bwino. (Yohane 17:3) Bushe abantu bonse cikabangukila ukwishiba Lesa?

Icitabo ico abantu balingile ukusambilila nga balefwaya ukwishiba Lesa, ni Baibolo. (2 Timote 3:16) Abantu abengi bekala ku ncende ukusangwa Baibolo. Aba bene bantu nalimo kuti babatandalila imiku iingi ukutila balesambilila Baibolo pa kuti beshibe Lesa bwino bwino. (Mateo 28:19) Bamo bakulila mu ndupwa sha Bena Kristu, kabili cila bushiku abafyashi babo balabasambilisha pali Lesa.—Amalango 6:6, 7; Abena Efese 6:4.

Lelo kuli bambi calyafya ukusambilila pali Lesa. Bamo bafuma mu ndupwa umo abafyashi bashisunga bwino abana pa mulandu wa kuti tababatemwa. (2 Timote 3:1-5) Abakulila mu ndupwa sha musango yu cilabakosela ukusumina ukuti Shifwe wa ku muulu, ni Lesa wakwato kutemwa. Abengi tabasambilila, kabili ici cilenga ukuti belabelenga Baibolo. Bambi na bo balibapofwisha ku mipepele ya bufi, nelyo baba mu ndupwa, incende, nangu icalo umo bashibasuminisha ukusambilila Baibolo. (2 Abena Korinti 4:4) Bushe ifya musango yu kuti fyalenga abantu ukukanakwata ishuko lya kusambilila pali Lesa no kumutemwa?

Yesu alilandilepo ukuti ifyo abantu bamo bapitamo kuti fyalenga cibakosele ukutemwa Lesa no kulamumfwila. (Mateo 19:23, 24) Na lyo line, Yesu acinkwileko abasambi bakwe ukuti nangu ca kutila amafya yamo yalamoneka ayakalamba sana ku bantu, “Lesa kuti acita ifintu fyonse.”—Mateo 19:25, 26.

Taleni tontonkanyeni pali ifi fishinka: Yehova Lesa alilenga ukuti Icebo cakwe, Baibolo, cisabankanishiwe ukucila ifitabo fyonse. Baibolo yasobele ukuti imbila nsuma pali Lesa ne fyo afwaya isonde ukuba ikashimikilwa “ku bantu bonse aba pe sonde.” (Mateo 24:14) Muno nshiku, Inte sha kwa Yehova balashimikila iyi mbila nsuma mu fyalo ukucila pali 230 kabili balalemba impapulo ishilanda pali Baibolo mu ndimi nalimo 500. Nangu fye ni balya bene abashakwata ishuko lya kubelenga Baibolo na bo kuti basambilila pali Lesa wa cine nga bamona ifyo abumba.—Abena Roma 1:20.

Na kabili, Icebo ca kwa Lesa citila: “Yehova alafwaya mu mitima yonse, kabili aleluka na matontonkanyo yonse. Nga wamufwaya, akaleka ukamusange.” (1 Imilandu 28:9) E ico, nangu ca kutila Yehova talaya ukuti abantu bonse cikabangukila ukumwishiba, alashininkisha ukuti bonse abafumacumi bakwata ishuko lya kumwishiba. Na kuba, akashininkisha no kuti bonse abashakwete ishuko lya kusambilila pali ena bakabuushiwe mu calo cipya umukaba ubulungami pa kuti bakamwishibe.—Imilimo 24:15.