Palameni Kuli Lesa

Ukulacita Ifyo Lesa Afwaya Kuli Ifwe

BUSHE mwalibala amutontonkanyapo pa cipusho ca kuti, ‘Mulandu nshi twabela pano calo?’ Yehova tatupeela fye amano ya kutontonkanya pa cipusho ca musango yu, lelo alitupanga na mu nshila ya kuti tulefwaisha no kwishiba icasuko. Icisuma ca kuti Lesa wesu uwatutemwa alitulanga no ko twingasanga icasuko. Icasuko ico tufwaisha ukwishiba caba mu Cebo cakwe, Baibolo. Moneni amashiwi Imfumu Solomone yalandile ayalembwa pali Lukala Milandu 12:13.

Solomone ali muntu uwaibela kabili alilingile ukulanda pa fyo umuntu afwile ukucita pa kuti abe ne nsansa. Solomone alikwete amano nga nshi, ali mukankaala icine cine, kabili ali ni mfumu, kanshi aliceeceetele sana ifyo abantu bafwaisha mu bumi, ukusanshako ne fyuma no kulumbuka. (Lukala Milandu 2:4-9; 4:4) Lyena, umupashi wa kwa Lesa wamutungulwile ukulemba pa fyo asangile, ukuti: “Apo fyonse nafyumfwika, amashiwi ya kulekelesha ni aya: Tiina Lesa wa cine no kusunga amafunde yakwe. Pantu ici e cifwaikwa ku bantu bonse.” Aya amashiwi yalanda pa cintu icacindama nga nshi ico umuntu alingile ukulacita.

“Tiina Lesa wa cine.” Umuntu nga abelenga fye aya mashiwi, nalimo kuti atiina. Lelo uku kutiina Baibolo yalandapo ni kulya ukusuma. Te mwenso nga ulya umusha akwata uwa kutiina ukufulwisha shikulu wakwe umukalushi, lelo mwenso uo umwana uufwaya ukusekesha wishi uwamutemwa akwata. Icitabo cimo citila ukutiina Lesa “mucinshi uukalamba nga nshi uo abantu bakwe bamupeela pa mulandu wa kuti balimutemwa kabili balishiba ukuti alikwata amaka kabili alikulisha.” Umucinshi wa musango yu e ulenga ukuti tulecita ifyo Lesa afwaya pantu twalimutemwa kabili twalishiba ukuti na o alitutemwa. Uku kutiina Lesa te kwa pa kanwa fye; kumonekela mu ncitilo shesu. Ni mu ncitilo nshi kumonekela?

“Ukusunga amafunde yakwe.” Ukutiina Lesa kulalenga ukuti tulemumfwila. Calilinga ukulaumfwila Yehova. Apo e watupangile, alishiba ifyo tufwile ukucita pa kuti tuleikala bwino, nga filya fine uwapangile mashini eshiba bwino bwino ifya kuibomfya. Na kabili, Yehova alitutemwa. Afwaya ukuti tube ne nsansa, kabili amafunde yakwe yabelako ukuti ifintu filetuwamina. (Esaya 48:17) Umutumwa Yohane atile: “Uku e kutemwa Lesa, ukuti tulekonka amafunde yakwe; kabili amafunde yakwe taya-afya.” (1 Yohane 5:3) Nga tuleumfwila Lesa e lyo tulanga ukuti twalimutemwa, kabili amafunde atupeela yalanga ukuti alitutemwa.

“Ici e cifwaikwa ku bantu bonse.” Aya mashiwi yalalanga umulandu wacindama uo tulingile ukutiinina Lesa no kulamumfwila. Ukutiina Lesa no kulamumfwila e cifwaikwa kuli ifwe. Yehova e Kabumba wesu, kanshi e ntulo ya mweo wesu. (Amalumbo 36:9) Na kabili twalilinga ukulamumfwila. Kanshi nga tuleumfwila Lesa ninshi tulecita ifyo afwaya kuli ifwe.

Ninshi kuti twatila, mulandu nshi twabela pano calo? Twabelapo ukulacita ukufwaya kwa kwa Lesa. Takwaba icintu cimbi icingamuletela insansa ukucila pa kulacita ukufwaya kwa kwa Lesa. Bushe te kuti mutemwe ukwishiba ifyo Yehova afwaya ne fyo mwingacita pa kuti mulecita ukufwaya kwakwe? Inte sha kwa Yehova bakatemwa sana ukumwafwa ukwishiba ukufwaya kwa kwa Lesa.

Amalembo ya kubelenga mu November:

◼ Amapinda 22-31; Lukala Milandu 1-12–Ulwimbo lwa Nyimbo 1-88