BAIBOLO ILAALULA ABANTU

“Balefwaya njishibile ne mwine ifyo Baibolo isambilisha”

Abashimika ili lyashi ni ba Luis Alifonso

UMWAKA BAFYELWE: 1982

ICALO: DOMINICAN REPUBLIC

IFYO BALI: BALEPEPA KU CALICI CA BAMORMON

INKULILO YANDI: Nafyalilwe mu musumba wa Santo Domingo, mu calo ca Dominican Republic. Twafyelwe bane kabili nine kasuli. Abafyashi bandi bali abasambilila sana kabili balefwaisha ukutukusha bwino. Mu 1978, abafyashi bandi bakumene na bamishonari ba ku calici lya baMormon. Balitemenwe sana ifyo bafwele bwino ne fyo bali aba busaka e lyo ne mibele yabo. Ne ci calengele ukuti abafyashi bandi bapingulepo ukuti ulupwa lwesu lube ulwa kubalilapo ukulapepa kwi calici lya Church of Jesus Christ of Latter-day Saints nelyo icalici lya baMormon ilyali pa cishi apo twaleikala.

Ilyo nalekula, nalitemenwe ukusangwa ku mangalo ayaleba pa calici kabili nalitemenwe ne fyo baMormon baletufunda ukubika amano ku lupwa no kukwata imibele iisuma. Nalitemenwe sana ukuti nali Mormon kabili nalefwaisha ukuba mishonari.

Ilyo nali ne myaka 18, twakuukiile ku America pa kuti nkaye mu kusambilila pa yuniversiti. Pa numa ya mwaka umo, bamayo mwaice na bena mwabo, Inte sha kwa Yehova, balishile mu kututandalila ku Florida. Balitwitile ukuyasangwa ku kulongana kwabo ukukalamba. Nalyumfwile bwino ukumona abo twaikele na bo mupepi balebelenga amalembo no kulemba ifishinka. Ici calengele ukuti na ine nombe akalembelo ne pepala pa kuti na ine ndelemba ifishinka.

Ilyo uku kulongana kwapwile, bamayo mwaice na bena mwabo banjebele ukuti apo ndafwaisha ukuba mishonari, kuti bangafwa ukwishiba fimo pali Baibolo. Nalyumfwile bwino sana ukumfwa ifi pantu pali ilya nshita nalitemenwe sana ukubelenga Ibuuku lya baMormon ukucila ukubelenga Baibolo.

IFYO BAIBOLO YA-ALWILE UBUMI BWANDI: Ilyo twalelanshanya ifya mu Baibolo na bamayo mwaice na bena mwabo pa foni, lyonse balenkoselesha ukulalinganya ifyo nasumiinemo ku fyo Baibolo isambilisha. Balefwaya ukuti njishibile ne mwine ifyo Baibolo isambilisha.

 Kwali ifisambilisho ifingi ifyo nasambilile kuli baMormon, lelo nshabikileko amano ukumona nga e fyo na Baibolo isambilisha. Bamayo mwaice bantumiine Awake! ya November 8, 1995, iyalembwa ne Nte sha kwa Yehova, umwali ne fipande fyalelanda pa fisambilisho fya baMormon. Nalipapile ukusanga ukuti kanshi nshaishibe ifisambilisho fya baMormon ifingi. Ici calengele ukuti mfwailikishe pa adresi ya pa Intaneti iya baMormon pa kuti njishibe nga ca kuti ifyo Awake! yalandile fyali fishinka. Ilyo naile ku ng’anda ya babenye mu musumba wa Utah, uko baMormon balesungila ifintu fyalekanalekana, nasangile ukuti ifyo Awake! yalandile fyali fya cine.

Lyonse naletontonkanya ukuti Ibuuku lya baMormon lyalelanda pa fintu fimo fine ifyo na Baibolo ilandapo. Lelo ilyo natampile ukubelenga sana Baibolo, natendeke ukumona ukuti kanshi ifisambilisho fya baMormon fyalipusene sana ne fyo Baibolo isambilisha. Ku ca kumwenako Baibolo pali Esekiele 18:4, itila umweo ulafwa. Lelo Ibuuku lya baMormon pali Alma 42:9, litila “Umweo taufwa.”

Naleumfwa ububi nga namona ifyo ifisambilisho fya baMormon fyapusene ne fyo Baibolo isambilisha e lyo ne fyo batemenwe ukusambilisha pa kutemwa icalo cabo. Ku ca kumwenako aba mwi calici lya baMormon ba basambilisha ukuti ibala lya Edeni lyali mu citungu ca Jackson County, mu musumba wa Missouri ku America. Intungulushi she calici lya baMomorn shisambilisha no kuti “ilyo Ubufumu bwa kwa Lesa bukalateka, ubuteko bwa bena America bukacimfya kabili mu calo mukaba ubuntungwa no mulinganya.”

Naleyipusha ukuti, inga icalo nafyalilwemo nelyo ifyalo fimbi bushe fyena tafyacindama? Bushiku bumo ilyo napokelele foni kuli Mormon wacaice uo balesambilisha bumishonari, twalilandilepo pali ili lyashi. Namwipwishe nga kuti alwishanya na baMormon banankwe icalo cabo nga cali pa nkondo ne fyalo fimbi umwikala baMormon bambi. Ala nalipapile ilyo asumiine! Natendeke ukufwaya ukwishibilapo na fimbi pa fisambilisho fya baMormon no kwipushako bashimapepo baMormon. Banjebele ukuti wisakamana, ifipusho fyobe fikasukwa ku ntanshi, pali ino nshita te kuti ufyumfwikishe.

Nshatemenwe ifyo banjebele, ne ci calengele natendeka ukutontonkanya sana pa mulandu nalefwaila ukuba mishonari wa baMormon. Naishilesanga ukuti ico nalefwaila ukuba mishonari, kwafwa abantu. Cimbi ico nalefwaila ukubela mishonari, kufwaya abantu ukumpeela umucinshi. Lelo nangu cibe fyo, nshaishibe ifingi pali Lesa. Nangu ca kuti imiku iingi nalebelengako Baibolo panono, nshamwene ukuti ifyo nalebelenga fyali ifyacindama. Nshaishibe ico Lesa apangiile icalo na bantu.

IFYO NANONKELAMO: Ilyo nalesambilila Baibolo ne Nte sha kwa Yehova, e lyo naishibe ishina lya kwa Lesa, icicitika umuntu nga afwa, e lyo no mulimo Yesu akwata mu kufikilisha ubufwayo bwa kwa Lesa. Naishileishiba ifingi muli Baibolo kabili nalitemenwe ukwebako bambi ifyo nalesambilila. Ukufuma na kale nalishibe ati Lesa eko aba, lelo pali ino nshita ndalanda nankwe mwi pepo pantu ni Cibusa wandi uo natemwisha. Pa July 12, 2004, nalibatishiwe no kuba Inte ya kwa Yehova kabili pa numa ya myeshi 6 natendeke umulimo wa kushimikila inshita iikalamba.

Pa myaka 5 nalibombeeleko pa maofeshi yakalamba aya Nte sha kwa Yehova ku Brooklyn, mu New York. Nalitemenwe sana ukubombako umulimo wa kupulinta ama Baibolo e lyo ne mpapulo ishilanda pali Baibolo ishafwa abantu abengi mu calo conse kabili nalitwalilila ukwafwa bambi ukwishiba Lesa.