Petro na Anania Balibepele Ubufi Finshi Twingasambililako?
FUNDENI ABANA BENU
Petro na Anania Balibepele Ubufi Finshi Twingasambililako?
Nga fintu waishiba, ukubepa ubufi kulanda icintu ico wishibe ukuti te ca cine. Bushe walibepapo ubufi?— * Nangu fye bakulu abatemwa Lesa balibepapo. Nalimo walishibako umuntu umo uwalembwa mu Baibolo uwa bepelepo ubufi. Ishina lyakwe ali ni Petro. Ali mutumwa wa kwa Yesu. Yesu akwete abatumwa 12. Natubelenge ilyashi pa kuti tumfwe icalengele ukuti abepe.
Ilyo Yesu bamwikete, bamutwele ku ng’anda ya kwa shimapepo mukalamba. Iyi inshita cali ni pa kati ka bushiku. Ilyo Petro aingile mu lubansa lwa ng’anda ya kwa shimapepo, takwali uwamwishibe. Apo balyashishe umulilo, kwalibuutile, ne ci calengele umukashana umubomfi wa kwa shimapepo mukalamba uwaingishe Petro amwishibe. Uyu umukashana atile: “Na iwe wine wali pamo na Yesu.” Pa mulandu wa kuti alyumfwile umwenso, Petro alikeene.
Baibolo itila ilyo papitile inshita, “umukashana na umbi alimumwene.” Atile: “Uyu muntu ali na Yesu.” Petro na kabili alikeene. Ilyo papitile inshita iinono, abantu bambi na bo baebele Petro ati: “Ca cine na iwe wine wali na bo.”
Petro alyumfwile umwenso sana, ne ci calengele ukuti no muku walenga butatu wine, abepe. Atile: “Nshimwishibe uyo muntu!” Awe apopene na mukolwe alililile. Yesu aloleshe Petro, kabili Petro alibukishe ukuti tapapitile ne nshita iitali apo Yesu amwebeele ukuti: “Ilyo mukolwe talalila, ulenkaana imiku itatu.” Petro alyumfwile ububi sana kabili alililile nga nshi!
Bushe icintu ca musango yu kuti ca kucitikila?— Nalimo kuti uli ku sukulu e lyo waumfwa abanobe balelanda pa Nte sha kwa Yehova. Umo kuti atila: “Inte sha kwa Yehova tabapika salyuti kuli flagi.” Umbi na o kuti atila: “Tabaya ku nkondo.” Lelo umbi na o kuti atila: “Te bena Kristu ba cine pantu tabasefya Krisimasi.” Umbi na o kuti akulolesha no kukweba ati, “Bushe na iwe uli Nte ya kwa Yehova?” Kuti wayasuka shani?—
Ilyo icintu ca musango yu tacilacitika, ulekabila ukuipekanya pa kuti ukasuke bwino. Petro taipekenye. Ilyo ali mu bwafya, alibepele. Na lyo line alyumfwile ububi sana pa fyo acitile kabili Lesa alimwelele.
Anania, umusambi na umbi uwa kwa Yesu, na o alibepele. Lelo, Lesa taelele Anania no mukashi wakwe, Safira. Safira alisuminishenye no mulume wakwe ukubepa ubufi. Natumone icalengele Lesa ukukanabelela.
Pa numa ya nshiku 10 ukutula apo Yesu ashiilile abasambi bakwe no kubwelelamo ku muulu, abantu nalimo 3,000 balibatishiwe mu Yerusalemu. Abengi bafumine ku fyalo fya kutali ukwisa mu kusefya Umutebeto wa Pentekoste, kabili pa numa ya kuba abasambi ba kwa Yesu, tabalefwaya ukubwelelamo bwangu ku mwabo pa kuti basambilile ifingi pa buKristu. E ico abasambi ba kwa Yesu bamo balibomfeshe indalama shabo pa kuti basakamane aba Abena Kristu abapya.
Anania no mukashi wakwe balishitishe ibala pa kuti basange indalama sha kwafwilamo Abena Kristu abapya. Ilyo Anania atwele indalama ku batumwa, abebele ukuti e shonse isho bashitishe ibala. Lelo ubu bwali bufi ubwafita fititi! Balifumishepo indalama shimo! Lesa asokolwelele Petro ifyacitike e co Petro aile kuli Anania no kumweba ukuti: “Te bantu ubepele iyo, ubepele Lesa.” Pa kumfwa aya amashiwi Anania awile pa nshi no kufwa! Pa numa ya ma-awala yatatu, umukashi wakwe alishile. Apo umukashi taishibe ifyacitike ku mulume wakwe na o alibepele ubufi, kabili aliwile pa nshi no kufwa afwa.
Ili lisambililo ilisuma sana. Ala ukulanda icishinka kusuma! Bonse tufwile ukusambililako kuli ifi ifyacitike. Na lyo line, bonse tulapanga ifilubo, maka maka ilyo tuli abaice. Bushe tautemenwe ukuti Yehova alikutemwa kabili kuti akwelela nga filya aelelele Petro?— Lelo uleibukisha ukuti tufwile ukulalanda icishinka lyonse. Nga twabepa ubufi tufwile ukupaapata Lesa pa kuti atwelele. Ifi e fyo Petro acitile kabili Lesa alimwelele. Nga twaesha sana na maka ukukaanalabepa, Lesa akatwelela!
Belenga muli Baibolo yobe
Imilimo 2:38-42; 4:32-37; 5:1-11
[Futunoti]
^ para. 3 Nga ca kuti mulebelengela capamo na bana, apo mulesanga akashilwa ninshi mufwile mwalolelako pa kuti abana balandepo.
