“Mulelomba, Kabili Bakamupeela”
PALAMENI KULI LESA
“Mulelomba, Kabili Bakamupeela”
“Mwe Shikulu, tusambilisheni ifya kupepa.” (Luka 11:1) Umusambi wa kwa Yesu, e walandile aya amashiwi. Pa kumwasuka, Yesu alandile pa filangililo fibili ifitusambilisha ifya kupepa e lyo ne fyo twingacita pa kuti Lesa aleasuka amapepo yesu. Nga mulatwishika nga ca kuti Lesa alomfwa amapepo yenu, mwalatemwa ukwishiba ifyo Yesu ayaswike.—Belengeni Luka 11:5-13.
Icilangililo ca kubalilapo, calelanda pa fyo umuntu uulepepa afwile ukucita. (Luka 11:5-8) Muli ici cilangililo, Yesu alandile pa mwaume uwapokelele umweni pa kati ka bushiku, ninshi ne fya kulya fya kumupeela takwete. Ulya mwaume alipamfiwe ukufwaila umweni wakwe ifya kulya. Nangu ca kuti bwali bushiku, aile ku munankwe mu kulomba umukate. Pa kubala, umunankwe alishimunwike ukubuuka pantu ninshi nabalaala. Lelo pa mulandu wa mupampamina, uwapokelele umweni atwalilile fye ukukonkonsha mpaka umunankwe abuuka amupeela ne fyo alefwaya. *
Finshi ici cilangililo citusambilisha pa lwe pepo? Yesu aloseshe mu kuti tufwile ukuba abamukoosha ilyo tulelomba, ilyo tulefwaya, na lintu tulekonkonsha. (Luka 11:9, 10) Mulandu nshi? Bushe Yesu aloseshe mu kuti Lesa alawayawaya ukwasuka amapepo yesu nga twapepa? Awe iyo. Ico Yesu alelandapo ca kuti, Lesa taaba ngo muntu wa mu cilangililo uwalewayawaya ukwafwa umunankwe, lelo alafwaisha ukupeela ifintu ku bantu abamutetekela kabili abamulomba ukulingana no kufwaya kwakwe. Tulalanga ukuti twalitetekela Lesa, nga tulemulomba mu mukoosha. Kabili nga twacita ifi, tulalanga ukuti tulefwaisha ifyo tulelomba no kuti natucetekela ukuti Lesa akatupeela, kulila fye ifyo tulelomba nafilingana no kufwaya kwakwe.—Marko 11:24; 1 Yohane 5:14.
Mu cilangililo calenga bubili, Yesu alandile pa “Umfwa ipepo,” Yehova. (Amalumbo 65:2) Yesu atile: “Mufyashi nshi pali imwe, uo umwana wakwe nga alomba isabi, engamupeela insoka ukucila ukumupeela isabi? Nelyo nga alomba ilini, nani engamupeela kaling’ongo?” Ukwabula no kutwishika takuli umufyashi uwatemwa umwana uwingamupeela icintu icibi. Lyena Yesu alondolwele umwalolele ici cilangililo. Atile: Nga ca kuti abafyashi abashapwililika balishiba ukupeela “ifya bupe ifisuma” ku bana babo, “ninshi Shinwe wa mu muulu ena akacishapo ukupeela umupashi wa mushilo,” ica bupe icisuma nga nshi ku bamulomba!—Luka 11:11-13; Mateo 7:11.
Finshi ici cilangililo citusambilisha pali Yehova, ‘uumfwa amapepo’? Yesu alefwaya ukuti twishibe ukuti Yehova ni Shifwe uwakwata ukutemwa uufwaisha ukupeela abana bakwe fyonse ifyo bakabila. Kanshi ababomfi bakwe bafwile ukumulomba fyonse ifyo balefwaya. Kabili ukwishiba ukuti Lesa alapeela abana bakwe ifisuma, kufwile ukulenga abantu ukupokelela fyonse ifyo abapeela, nangu te fyo bale-enekela. *
Amalembo ya kubelenga mu April
[Amafutunoti]
^ para. 4 Muli ici cilangililo, Yesu alandile pa fintu ifyalecitika mu mikalile ya baYuda. AbaYuda balemona ukuti ukupokelela abeni no kubatangata cali cintu icacindama sana. Cila lupwa, lwalepanga umukate uwakulya ubo bwine bushiku, kanshi caliseekele ukulomba umukate nga ca kuti uo bakwete naupwa. Kabili ulupwa nga lupina, bonse balelaala pa nshi mu muputule umo wine.
^ para. 7 Nga mulefwaya ukwishibilapo na fimbi pa fyo mufwile ukulapepa e lyo ne fyo Lesa engasuka amapepo yenu, belengeni icipandwa 17 mu citabo citila Bushe Cinshi Baibolo Isambilisha? icalembwa ne Nte sha kwa Yehova.
Lesa alafwaisha ukupeela ifintu ku bantu abamutetekela kabili abamulomba ukulingana no kufwaya kwakwe
