BAIBOLO ILAALULA ABANTU

“Natendeke Ukutontonkanya Sana pa fyo Ubumi Bwandi Bwali no Kuba”

Abashimika ili lyashi ni ba Allan Hancock

UMWAKA BAFYELWE: 1941

ICALO: AUSTRALIA

IFYO BALI: BALEPEEPA NO KUNWA SANA UBWALWA

INKULILO YA NDI: Nakuliile mwi tauni ilinono ilya Warialda, mu citungu ca New South Wales. Muli ili tauni mwaliba sana ubusaka, tamwaba sana imisoka kabili balateka impaanga ne ng’ombe e lyo balalima ne fya kulya ifyalekanalekana.

Twafyelwe 10 kabili apo nine nali umukalamba, natendeke ukubomba ninshi ndi ne myaka 13 pa kuti ndeafwa ulupwa. Apantu nshali uwasambilila, nalebomba fye mu ma farmu. Ilyo nali ne myaka 15, natendeke ukubomba incito ya kusakamana no kusambilisha bakabalwe.

Nalitemenwe sana ukubomba mu ma farmu. Limo naleikala pa nse ubushiku ndeonta no mulilo e lyo ndelolesha intanda no mweshi, ninshi na kamwela akasuma kalepupa, kaleleta ne cena cisuma. Ndebukisha ukutontonkanya ukuti kufwile kwaliba uwapangile ifintu fyonse ifisuma. Lelo umo nalebombela, mwalecitika ne fyabipa, ilingi line abantu balepeepa sana fwaka kabili naleumfwa no ko baletukana insele. Tapakokwele na ine nalitendeke ukutukana no kupeepa fwaka.

Ilyo nali ne myaka 18, naile ku musumba wa Sydney. Nalefwaisha ukwingila ubushilika, lelo balinkaniine pantu nshasambilile. Na lyo line nalisangile incito imbi kabili naikele mu Sydney pa mwaka umo. Lintu nali kulya e lyo nakumene ne Nte sha kwa Yehova. Ilyo banjitile ukuyalongana nabo, nalisumiine kabili ifyo naumfwile kulya fyalengele nsumine ukuti ifyo basambilisha fya cine.

Lelo tapakokwele nalifumine ku Sydney no kuya mu kwikala mwi tauni lya Goondiwindi mu Queensland. Nalingiile incito, naupa no kuupa, lelo icabipileko nalitendeke ukunwa sana ubwalwa.

 Ine no mukashi wandi twalikwete abana abaume babili. Pa numa ya kukwata aba bana, natendeke ukutontonkanya sana pa fyo ubumi bwandi bwali no kuba. Nalibukishe ifyo naumfwile ilyo naile ku kulongana na ba Nte mu Sydney kabili natontonkenye ukuti mfwile ukwalula imibele yandi.

Ilyo nasangile Ulupungu lwa kwa Kalinda apaali adresi ya maofeshi ya Nte sha kwa Yehova mu Australia, nalibalembeele kalata ukubeba ukuti ndefwaya aba kunsambilisha. Balintumiine Nte wa cikuuku, uwakwata ukutemwa kabili tapakokwele nalitendeke ukusambilila Baibolo nankwe.

IFYO BAIBOLO YA-ALWILE UBUMI BWANDI: Ilyo nalesambilila Baibolo, e lyo namwene ukuti nalekabila sana ukwalula imibele yandi. Ilembo ilyamfikile sana pa mutima, ni 2 Abena Korinti 7:1. Ili ilembo lilanda ukuti tufwile ‘ukuisangulula kuli fyonse ifikowesha umubili.’

Napingwilepo ukuleka ukupeepa fwaka e lyo no kunwa sana ubwalwa. Lelo calingafishe sana ukuleka pantu nalibeleshe ukucita ifi pa myaka iingi. Na lyo line, ico nalefwaisha kulacita ifyo Lesa afwaya. Icangafwile sana, lilembo lya Abena Roma 12:2, apatila: “Mwipalana no bwikashi buno, lelo mupilibuke pa kwalula amatontonkanyo yenu.” Naishileiluka ukuti pa kwalula imibele yandi, kano napata ifyabipa nge fyo na Lesa afipata. Lesa alingafwile ukuleka ukupeepa no kunwa sana ubwalwa.

Lelo icangafishe sana, kuleka ukutukana. Nalishibe amashiwi yasuma ayaba pa Abena Efese 4:29 apatila: “Mwileka amashiwi yabola yafume mu kanwa kenu.” Na lyo line, palipitile sana inshita pa kuti ndeke ukutukana. Amashiwi yaba pali Esaya 40:26 yalingafwile sana. Ili ilembo lilanda ukuti: “Lolesheni mu muulu no kumona. Nani uwalengele intanda ishi? Ni uyo uutungulula ibumba lya shiko mu mpendwa, shonse alashita amashina. Pa mulandu wa kufula kwa bukose bwakwe, kabili aba na maka ayengi, tapabulila nangu lumo.” Natontonkenye ukuti nga ca kuti Lesa alikwata amaka ya kupanga ifintu ifingi ifyaba mu muulu, ifyo natemwa ukumona, ukwabula no kutwishika kuti ampeela amaka ya kwaluka pa kuti ndecita ifyo afwaya. Ifyalengele ukuti ndeke ukutukana, kupepa lyonse kuli Lesa no kucita ifyo nalesambilila.

IFYO NANONKELAMO: Ilyo nalebomba incito ya kusakamana inama, nshalelanda sana na bantu abengi pantu pa mafarmu paleba fye abantu abanono. Na lyo line, ifyo nasambilile ku kulongana kwa Nte sha kwa Yehova, fyalingafwile ukwishiba ifya kulanshanya na bantu pa mbila nsuma ya Bufumu bwa kwa Lesa.—Mateo 6:9, 10; 24:14.

Ndomfwa bwino ukuti pa myaka iingi naliba eluda mu cilonganino kabili lishuko nga nshi ukwafwa bamunyinane. Ishuko ilikalamba nakwata, kubombela Yehova capamo na bana bandi e lyo no mwina mwandi uo natemwa sana kabili uuntungilila lyonse.

Nangu ca kuti nshafika apatali mu masambililo, ndatasha sana Yehova pa kunsambilisha Icebo cakwe. (Esaya 54:13) Ala amashiwi yaba pa Amapinda 10:22 ayatila: “Ipaalo lya kwa Yehova lilacindamika,” ya cine! Ine no lupwa lwandi tulefwaya ukutwalilila ukusambilila pali Yehova no kulamubombela umuyayaya.

[Amashiwi pe bula 9]

“Naishileiluka ukuti pa kwalula imibele yandi, kano napata ifyabipa”