Lesa Alomfwa Ububi—Ifyo Twingalenga Lesa Ukusekelela
Fundeni Abana Benu
Lesa Alomfwa Ububi—Ifyo Twingalenga Lesa Ukusekelela
Bushe balikucenapo ica kuti walila no kulila?— * Bonse nalimo balitucenapo. Lelo te lyonse tucenwa ica kuti ne cilonda camoneka. Limo kuti twacenwa nga ca kuti umuntu alanda ifibi pali ifwe. Ica musango uyu kuti catukalifya, bushe te ifyo?— Lesa na o alacenwa, tomfwa bwino abantu nga balelanda ifya bufi pali ena. Natulande pa fyo twingalenga Lesa ukusekelela ukucila ukumukalifya.
Baibolo itila abantu bamo abaleti balitemwa Lesa, ‘balemulungulusha’ kabili ‘balemukalifya.’ Ici tacilepilibula ukuti Yehova Lesa aba kwati muntu uwa kuti nga bamucena aumfwa no bukali. Lesa, ni Lesa wa maka yonse. Natulande pa filenga Yehova ukumfwa ububi nga tatulecita ifyo atweba.
Abantu babili abo Yehova abalilepo ukupanga pa calo balimukalifye sana. Lesa ababikile muli Paradaise pano calo iyaleitwa ati “ibala lya Edeni.” Bali ni bani aba bene?— Ni Adamu na Efa. Natulande pa fyo bacitile ifyakalifye Yehova.
Ilyo ababikile muli lilya ibala, Yehova abebele ukuti bafwile ukulalisakamana. Alibebele no kuti bakakwata abana kabili baali no kulaikala muli lilya line ibala ukwabula ukufwa. Lelo ilyo Adamu na Efa bashilakwata abana, icintu icabipa calicitike. Bushe nawishiba icacitike?— Malaika alengele ukuti Efa na Adamu bapondokele Yehova. Natumfwe ifyo ici cacitike.
Malaika alengele insoka nelyo icisoka ukumoneka kwati cilalanda. Efa alitemenwe ifyo insoka yamwebele. Yamwebele ukuti ali no kuba “nga Lesa.” Efa takeene ukucita ifyo insoka yamwebele. Bushe nawishiba ifyo acitile?—
Efa aliliile ku muti uo Yehova aebele Adamu ukuti tabafwile ukulyako. Ilyo Lesa ashilabumba Efa, aebele Adamu ukuti: “Ku muti onse uwa mwi bala ukulya ulelyako no kwikuta. Lelo ku muti wa kulenga ukwishiba ubusuma no bubi kwena wilalyako, pantu mu bushiku ukalyako ukufwa ukafwa.”
Efa alishibe ili ifunde. Lelo atwalilile ukulolekesha ulya muti kabili amwene ukuti “muti usuma ukulyako, kabili muti uwawama ukumona. . . . Awe e pa kusabako ifisabo fya uko no kulya alya.” Lyena apeeleko Adamu, “na o e fyo aliile.” Cinshi uletontonkanya ukuti e calengele Adamu acite ifi?— Ni co Adamu alitemenwe sana Efa ukucila ifyo atemenwe Yehova. Asalilepo ukusekesha Efa ukucila ukusekesha Lesa. Ukumfwila Yehova kwalicindama sana ukucila ukumfwila uuli onse.
Bushe uleibukisha insoka nelyo icisoka icalandile kuli Efa? Filya fine umuntu engalenga icilubi ukumoneka kwati cilelanda, e fyo na umo alengele ukuti insoka imoneke kwati yalelanda. Ni nani walelandila mu cisoka?— “Cisoka ca pa kutendeka, iciitwa Kaseebanya kabili Satana.”
Bushe walishiba ifyo ulingile ukucita pa kuti ulesekesha Yehova?— Ufwile ukulamumfwila lyonse. Satana amona kwati kuti alenga abantu bonse ukulacita ifyo afwaya. E mulandu wine Yehova atukonkomesesha ukuti: “We mwana wandi, ube na mano, kabili ulenge umutima wandi ukusekelela, pa kuti njasuke uulenseebanya.” Satana alaseebanya nelyo ukusaluula Yehova. Alanda ukutila, kuti alenga abantu bonse ukuleka ukubombela Lesa. Kanshi ufwile ukulaumfwila Yehova no kulamubombela pa kutila ulemusekesha. Bushe wakulabikako amano ukulamumfwila no kumubombela?—
Belenga muli Baibolo yobe
Ukutendeka 1:26-28; 2:15-17; 3:1-6
Ukusokolola 12:9; Amapinda 27:11
[Futunoti]
^ para. 3 Nga ca kuti mulebelengela capamo na bana, apo mulesanga akashilwa ninshi mufwile mwalolelako pa kuti abana balandepo.
