“LESA mupashi,” te kuti tumumone na menso yesu aya buntunse. (Yohane 4:24) Lelo, Baibolo itila abantu bamo balimonapo Lesa. (AbaHebere 11:27) Bamumwene shani? Bushe cine cine kuti mwamona “Lesa uushimoneka”?—Abena Kolose 1:15.

Caba kwati muntu uwafyalwa impofu. Bushe ukukanamona kuti kwamulenga ukufilwa ukwishiba fyonse ificitika mu calo? Te fyonse engafilwa ukwishiba. Kwaliba ifintu ifyalekanalekana ifilenga umuntu uushimona ukwishiba ifilecitika mupepi na ena na bantu abali mupepi e lyo ne fintu fimbi ifili mupepi na ena. Umwaume umo impofu atile, “Amenso te yalenga umuntu ukumona. Umuntu kuti amona ukubomfya fye umuntontonkanya.”

E fyo caba na kuli Lesa. Nangu ca kuti te kuti mumone Lesa na menso yenu aya buntunse, kuti mwamumona na “menso ya mitima yenu.” (Abena Efese 1:18) Moneni inshila shitatu isho mwingamwenamo Lesa.

Pa kuti umuntu uushimona eshibe ifintu fimo, kano aumfwa nangu apampanta no kwikata. Na imwe bene kuti mwailuka ifyo Lesa apanga nga mwafimona. “Imibele yakwe, ukutula fye apo abumbile umuntu, bailukila ku fyo abumba.”—Abena Roma 1:20.

Natulande nomba pe sonde. Lyalipangwa bwino sana pa kuti tuleba ne nsansa, te pa mulandu fye wa kuti tube no mweo. Tulatemwa sana nga twaumfwa akamwela kalepuupa, tuleontela akasuba, tulelya icisabo icisuma na lintu tuleumfwa uko akoni kalelila busaka busaka. Ifi fyonse filanga fye ukutila Kabumba wesu wa mano nga nshi, wa cikuuku kabili ni kapekape!

Finshi mwingasambilila pali Lesa nga mwamona ifyo apanga? Icintu cimo ico tufwile ukwishiba ca kuti, imyulu ilanga ukuti Lesa alikwata amaka. Ifyo basayantisiti basanga muno nshiku filanga ukuti ulwelele lulekula lubilo lubilo! Nga mwalolesha mu muulu ubushiku, kuti mwayipusha amuti: Ni kwi ukufuma amaka ayalenga ulwelele lulekulilako? Baibolo itweba ukuti Kabumba ‘wa bulamba.’ (Esaya 40:26, Baibolo ya Diocese of Mbala) Ifyo Lesa apanga filanga ukuti “Wa Maka Yonse,” kabili “Alisumbuka pa mulandu wa maka yakwe.”—Yobo 37:23.

Umufyashi umwanakashi uwakwata abana babili abashimwenesha atile: “Cimo icacindamisha sana icibafwa ukusambilila, kulanda. Nga ulefwaya ukubebako fyonse fye ifyo ulemona no kumfwa, ulingile ukuipekanya ukulalondolola. Amenso yabo ni we.” E fyo caba na kuli Lesa. Nangu ca kuti “takwaba umuntu nangu umo uwatala amona Lesa,” Umwana wa kwa Lesa, Yesu, “uuli pa cifuba ca kwa Wishi, e wamulondolwele.” (Yohane 1:18) Apo e o Lesa abalilepo ukubumba kabili Mwana wa kwa Lesa uwafyalwa eka, e kutila, Yesu e waishileba “amenso” yesu aya kutwafwa ukwishiba ifyaba ku muulu. E wingatweba icishinka pali Lesa uushimoneka.

Moneni fimo fimo ifyo Yesu uwaikele imyaka iingi nga nshi na Wishi, alondolwele pali Lesa:

• Lesa alabombesha. “Tata acili alebomba, na ine ncili ndebomba.”—Yohane 5:17.

• Lesa alishiba ifyo tukabila. “Shinwe alishiba ifyo  mukabila na lintu fye tamulamulomba.”—Mateo 6:8.

• Lesa alatupeela ifisuma ifyo tufwaya. “Shinwe uwaba mu muulu . . . alenga akasuba ukubalikila ababifi na basuma kabili alenga imfula ukulokela pa balungama na pa bashalungama.”—Mateo 5:45.

• Lesa amona ukuti bonse twalicindama ngo muntu umo umo. “Bushe tabashita inseba shibili mu kandalama akanono sana? Na lyo line takuli nangu lumo ulwingapona pa nshi ukwabula Shinwe ukwishiba. Lelo ne mishishi ya ku mitwe yenu yonse yalipendwa. E ico mwilatiina; Mwalicindama ukucila inseba ishingi.”—Mateo 10:29-31.

Ilingi line inshila abantu abashimona beshibilamo ifintu yalipusana ne nshila abamona beshibilamo. Umuntu uwapofula te kuti alondolole ifyaba icintelelwe lelo kuti alanda fye ukuti napatalala. Nga filya fine umuntu uushimona nangu fye panono te kuti amone icinshingwa nelyo ulubuuto, na ifwe pa lwesu te kuti twishibe Yehova. E mulandu wine Yehova atumiine umuntu uwali icipasho cakwe icapwililika ica fyo aba ne mibele yakwe.

Uyo umuntu aali ni Yesu. (Abena Filipi 2:7) Yesu talelanda fye pali Wishi lelo alilangilile ne fyo Lesa aba. Filipi, umusambi wa kwa Yesu aipwishe ati: “Mwe Shikulu, tulangeni Shinwe.” Yesu amwaswike ati: “Uwamona ine, ninshi amona na Tata.” (Yohane 14:8, 9) Finshi “mwingamona” muli Wishi ukupitila mu fyo Yesu alecita?

Yesu taali muntu uwaifinya lelo ali uwasansamuka kabili uwaicefya. (Mateo 11:28-30) Imibele yakwe iisuma yalelenga abantu balepalama kuli ena. Yesu aleumfwa ububi nga ifyabipa fyacitikila abantu lelo alesekelela nga ca kuti ifisuma fyacitika. (Luka 10:17, 21; Yohane 11:32-35) Nga mulebelenga amalyashi ya kwa Yesu mu Baibolo, mule-elenganya ifyo cali pa kuti ifyo mulebelenga fyaumfwika ifya cine cine. Nga muletontonkanya pa fyo Yesu alebomba na bantu, mukamona bwino bwino ifyo Lesa aba kabili mukalafwaya ukupalama kuli ena.

Umwanakashi umo uulemba ifitabo alandile pa fyo umuntu uushimona eshiba ifintu, atile: “Pa kuti umuntu uushimona eshibe bwino ifintu, kano apampanta no kwikata, anunsha, aumfwa e lyo na fimbipo.” E fyo caba na kuli ifwe. Nga twamona ifyo Lesa apanga, twabelenga na pa fyo Yesu alandile pali Wishi, e lyo twabebeta ne fyo Yesu alangile imibele iyo Lesa akwata, kuti twamwishiba bwino Yehova kabili tukashininkisha ukuti cine cine Yehova eko aba.

Ifi twalandapo e fyo cali na kuli Yobo. Pa kubalilapo, ‘tailwike.’ (Yobo 42:3) Nomba pa numa ya kutontonkanya sana pa fyo Lesa apanga, Yobo alandile ati: “Namumfwilile mu fya kumfwaumfwa fye, lelo nomba amenso yandi yamumona.”—Yobo 42:5.

E fyo cingaba na kuli imwe bene. ‘Nga mwamufwaya [Yehova], akaleka mukamusange.’ (1 Imilandu 28:9) Inte sha kwa Yehova bakatemwa nga nshi ukumwafwa ukufwaya no kusanga Lesa uushimoneka.