Ifibusa filalanshanya lyonse nga fyakumana, filalanshanya lyonse pa foni, pa intaneti, nelyo mu makalata. Kanshi pa kuti tube ifibusa fya kwa Lesa, tulingile ukulalanshanya nankwe lyonse. Nomba kuti twacita shani pa kuti tulelanshanya nankwe?

Tulanda na Lesa mwi pepo. Lelo ukulanda na Lesa mwi pepo kwalipusana no kushimika ilyashi no munensu. Tufwile ukwibukisha ukuti ilyo tulepepa, ninshi tulelanda na Kabumba, Uwapulamo pano isonde ponse na mu muulu. Pa kuti Lesa akutike ku mapepo yesu, tulingile ukupepa ukulingana ne fyo afwaya. Natulande pa fintu fitatu ifyo tulingile ukucita.

Ica kubalilapo, tufwile ukulungatika amapepo yesu kuli Yehova Lesa fye, te kuli Yesu, ku “batakatifu” nelyo ku fimpashanya. (Ukufuma 20:4, 5) Baibolo itila: “Muli fyonse lekeni ifyo mulelomba fishibikwe kuli Lesa mu kupepa no kupapaata pamo no kutootela.” (Abena Filipi 4:6) Ica bubili, tufwile ukupepela mwi shina lya Mwana wa kwa Lesa, Yesu Kristu. Yesu atile: “Takuli uwisa kuli Tata kano aishila muli ine.” (Yohane 14:6) Ica butatu, tufwile ukupepa ukulingana no kufwaya kwa kwa Lesa. Baibolo itila: “Cikulu fye nacilingana no kufwaya kwakwe, alatumfwa.” *—1 Yohane 5:14.

Nomba, bucibusa te kuti butwalilile nga ca kuti umuntu fye umo e ulelanda lyonse. Nga filya ciba ku fibusa nga filelanshanya, na ifwe tufwile ukulakutika ilyo Lesa alelanda na ifwe. Bushe mwalishiba inshila Lesa alandilamo kuli ifwe?

Muno nshiku, Yehova Lesa abomfya Icebo cakwe Baibolo pa kulanda na ifwe. (2 Timote 3:16, 17) Mulandu nshi twalandila ifyo? Natulangilile: Tutile mwapokelela kalata kuli cibusa mwatemwa sana. Pa numa ya kubelenga, kuti mwaebako bambi ukuti, “naumfwa bwino ifyo anjeba!” Nangu ca kuti apokelele fye kalata kuli cibusa wakwe, ciba kwati nalanda nankwe. E fyo caba na kuli ifwe, nga tulebelenga Baibolo ninshi Yehova alelanda na ifwe. E fyo na Gina uo tulandilepo mu cipande ca kubalilapo alandile, atile: “Naishiba ukuti nga ndefwaya Lesa alemona ukuti nine cibusa wakwe, mfwile fye ukulabelenga Baibolo, kalata iyo atulembela.” Kabili atile: “Ukubelenga Baibolo cila bushiku kwalilenga mpalame sana kuli Lesa.” Bushe mulaleka Yehova alelanda nenu ukupitila mu kubelenga Baibolo cila bushiku? Nga mulecita ifi, mukapalama sana kuli Lesa.