Maggie: Muli shani ba Sharon? Nalitemenwe ukumimona ku cibukisho ca mfwa ya kwa Yesu Kristu uyu mulungu. * Bushe mwalitemenwe ifyo mwaumfwile?

Sharon: Nalitemenwe sana ukusangwako, nomba ukulanda fye icishinka, te fyonse naumfwile. Ndamona uko abantu abengi basefya ukufyalwa kwa kwa Yesu pa Krisimasi, kabili balasefya ukubuuka kwakwe pa Isita, lelo nshatalaumfwapo ukuti kwaliba abebukisha imfwa yakwe.

Maggie: Ca cine, abantu abengi balitemwa sana ukusefya Krisimasi na Isita. Lelo Inte sha kwa Yehova bena bamona ukuti ukwibukisha imfwa ya kwa Yesu e kwacindama sana. Nga namukwata inshita, kuti natemwa ukumulondolwelako ico ba Nte bebukishisha imfwa ya kwa Yesu.

Sharon: Kuti natemwa ukunondolwelako.

Maggie: Kwena, ico ba Nte bebukishisha imfwa ya kwa Yesu ni co Yesu aebele abasambi bakwe ukulaibukisha imfwa yakwe. Tontonkanyeni icacitike pa bushiku bwa kuti mailo akafwa. Bushe muleibukisha ifyo alandile ilyo balelya ica kulya caibela na basambi bakwe aba cishinka?

Sharon: Mulelanda pa Mulalilo wa kwa Shikulu?

Maggie: Ee. Ilyo balelya umulalilo, Yesu alilondolwele bwino ifyo bali no kulacita. Bushe kuti mwatemwa ukubelenga ifyo Yesu abebele ifyalembwa pali Luka 22:19?

Sharon: Kuti nabelenga. Paleti: “Kabili, abuulile umukate, apepa, aumokaula, no kubapeela, ati: ‘Uyu mukate cimpashanya ca mubili wandi uulepeelwa pa mulandu wenu. Mulecita ici ku kunjibukisha.’”

Maggie: Cawama. Moneni amashiwi ya kulekelesha ayo Yesu alandile muli ici cikomo: “Mulecita ici ku kunjibukisha.” Kabili ilyo talaeba abasambi bakwe aya mashiwi, Yesu alibebele bwino bwino ico bali no kulaibukisha. Abebele ukuti ali no kupeela umweo wakwe pa mulandu wabo. Yesu alilandile pa cishinka cimo cine pali Mateo 20:28. Pali ili ilembo patila: “Umwana wa muntu taishile ukuti balemubombela, lelo aishile mu kubombela abantu no kupeela umweo wakwe icilubula pa kuti alubule abengi.” Ici e calenga ukuti Inte sha kwa Yehova balelongana pamo cila mwaka ku kwibukisha imfwa ya kwa Yesu. Imfwa ya kwa Yesu ikalenga ababa ne cumfwila ukuba no mweo wa muyayaya.

Sharon: Abantu balanda ukuti Yesu alifwile pa kuti tukakwate umweo wa mayayaya. Nomba ukulanda fye icishinka, nshaishiba umo calola.

Maggie: Te imwe mweka mwebashaiba, ba Sharon. Ili ilyashi ililanda pa cilubula  talyayanguka ukumfwa. Nomba icawamako fye ca kuti, Icebo ca kwa Lesa calilondolola bwino bwino. Bushe mucili namukwata inshita ya kuti tutwalilile ukulanshanya?

Sharon: E mukwai, kuti twatwalilila.

Maggie: Cawama. Nacilabelenga pali ili line lyashi ililanda pa cilubula, nalaesha ukumulondolwelako mu nshila iyayanguka pa kuti mumfwikishe.

Sharon: Calawama sana.

Maggie: Pa kuti tumfwikishe umulandu icilubula cacindamina, intanshi tufwile ukwishiba ifyacitike mu Edeni, ilyo Adamu na Efa babembwike. Pa kuti tumfwikishe ili lyashi, lekeni tubelenge Abena Roma 6:23. Bushe kuti mwatemwa ukubelengapo?

Sharon: E mukwai, paleti: “Icilambu ca lubembu ni mfwa, lelo ubupe bwa kwa Lesa mweo wa muyayaya muli Kristu Yesu Shikulwifwe.”

Maggie: Natasha. Lekeni tulanshanye ici cikomo, amashiwi yabalilepo yaleti: “Icilambu ca lubembu ni mfwa.” Ifi e fyo Lesa alandile ukuti e fyo cakulaba ukutula fye pa kutendeka. Na kuba, pa kutendeka bonse bali abapwililika. Apo Adamu na Efa bali abapwililika, na bana babo bali no kuba abapwililika, kanshi na bantu bonse nga tabafwa. Adamu na Efa kumo na bana babo bali no kuba ne nsansa umuyayaya. Nomba ifi te fyo cali.

Sharon: Ca cine, pantu Adamu na Efa baliliile ku cisabo ico babakenye.

Maggie: Ca cine ifyo mwalanda, ilyo Adamu na Efa baliile kuli ulya muti, balibembwike pantu balikeene ukumfwila Lesa. Ici calengele beba abapwililika. Ifi bacitile fyalengele Adamu na Efa kumo na bana babo ukulakwata amafya.

Sharon: Mwalosha mwi?

Maggie: Pa kuti mumfwikishe, lekeni imwipusheko, bushe mwalishiba ukupanga umukate?

Sharon: Nalishiba kabili nalitemwa sana uku-upanga.

Maggie: Tutile mwashita pani iya kupangilamo umukate. Nomba ilyo tamulapangilamo, yapona pa nshi e lyo yaongama. Bushe umukate mwingapangila muli iyi pani kuti waba shani?

Sharon: Kuti waba uwaongama.

Maggie: Ifi e fyo cali na kuli Adamu na Efa ilyo bakeene ukumfwila Lesa, “balyongeme” ku lubembu no kukanapwililika. Filya babembwike ninshi tabalakwata abana, abana babo bonse bali no kulafyalwa “abaongama.” Bonse bali no kulafyalwa ababembu. Muli Baibolo, ishiwi lya kuti “ulubembu” talilanda fye pa fyabipa ifyo tucita, lelo lilalanda na pa fitucitikila pa mulandu wa kuba ababembu. Ifyafumamo fya kuti, nangu ca kuti te ifwe twabembwike, kabili tatwaliko lintu Adamu na Efa babembwike, baliletelela abana babo bonse kumo fye na ifwe. Ici calilenga twaba ababembu kabili tulefwa. Nga fintu ilembo lya Abena Roma 6:23 lilanda, icilambu ca lubembu ni mfwa.

Sharon: Awe tacawama. Cinshi abantu bonse bengalafwila pa mulandu fye wa kuti Adamu na Efa balibembwike?

Maggie: Ca cine, cimoneka kwati tacawama, nomba fingi fyabimbwamo, kabili e calengele Lesa uwa mulinganya alande ukuti Adamu na Efa bafwe pa mulandu wa lubembu bacitile, lelo alilaya ifisuma ku bana babo. Lesa alicitapo cimo pa kutulubula, alitupeela umwana wakwe ukuba icilubula. Moneni na kabili pa Bena Roma 6:23. Ilembo litile “icilambu ca lubembu ni mfwa” kabili ilembo limo line lisosa ukuti: “Lelo ubupe bwa kwa Lesa mweo wa muyayaya muli Kristu Yesu Shikulwifwe.” Kanshi twamona ukuti imfwa ya kwa Yesu e yalenga tukalubulwe ku lubembu ne mfwa. *

Maggie: Pali icishinka na cimbi ico ilembo lilandilepo ico ndefwaya ukumulanga.

Sharon: Cishinka nshi ico?

Maggie: Moneni ifyo ilembo lyalanda, lileti: “Ubupe bwa kwa Lesa mweo wa muyayaya muli Kristu Yesu Shikulwifwe.” Nomba nga ca kuti Yesu e waculile no kutufwila, cinshi ilembo lyalandila ukuti icilubula “bupe bwa kwa Lesa”? Ninshi talyalandila ukuti “bupe bwa kwa Yesu”? *

Sharon: Awe, nshishibe.

Maggie: Kwena, Lesa e wabumbile Adamu na Efa, kabili e o babembukile ilyo bakeene ukumumfwila mu Edeni. Afwile alyumfwile sana ububi ilyo aba bantu ba kubalilapo bamupondokeele. Lilya line fye, Yehova alilandile ifyo ali no kupwisha bulya ubwafya. * Alandile ukuti umwana wakwe uwa ku muulu aali no kwisa pa calo ku kufyalwa ngo muntu no kupeela umweo wakwe icilubula. Kanshi kuti twatila, icilubula bupe ubwafuma kuli Lesa. Kwaliba na cimbi icalenga twishibe ukuti icilubula bupe bwa kwa Lesa. Bushe mwalibala amutontonkanyapo ifyo Lesa afwile aumfwile ilyo baipeye Yesu?

Sharon: Awe nshatontonkanyapo.

Maggie: Nacimona utwakwangasha utwa baice pa nse, bushe mwalikwata abana?

Sharon: Ee, nalikwata babili, umwaume no mwanakashi.

Maggie: Apo muli bafyashi, baleni tontonkanyeni pa fyo Wishi wa kwa Yesu, Yehova Lesa, aumfwile ilyo Umwana wakwe Yesu bamwipeye. Bushe aumfwile shani ilyo amwene uko balecusha no kuuma Umwana wakwe? Bushe Yehova aumfwile shani ilyo amwene Umwana wakwe na bamupoopela pa cimuti, aleshikitika kabili aleya aleleka umweo panono panono?

Sharon: Afwile alyumfwile sana ububi. Nshatala tontonkanyapo pali ifyo.

Maggie: Ca cine, ifwe te kuti twishibe bwino bwino ifyo Lesa aumfwile ilyo ifi fyalecitika. Lelo twalishiba ifyo Lesa omfwa ifyabipa nga filecitika no mulandu asuminishishe ifyabipa ukucitikila Umwana wakwe. Ici cishinka balicilondolola bwino sana mwi lembo abantu abengi baishiba ilya pali Yohane 3:16. Bushe kuti mwatemwa ukubelengapo?

Sharon: Ee, paleti: “Lesa atemenwe nga nshi aba pano calo ica kuti apeele Umwana wakwe uwafyalwa eka, ukuti onse uumutetekela ekonaika lelo akabe no mweo wa muyayaya.”

Maggie: Natasha pa fyo mwabelenga. Moneni na kabili amashiwi ya kubalilapo pe lembo. Yaleti: “Lesa atemenwe nga nshi aba pano calo.” Icishinka cili pali ili ilembo, kutemwa. Ukutemwa e kwalengele Lesa ukutuma Umwana wakwe pa calo ukuti atufwile. Kanshi kuti twatila, inshila Lesa atulangilamo ukuti alitutemwa sana ni pa kutupeela icilubula. Ici e cilenga Inte sha kwa Yehova ukuti balelongana cila mwaka ku kwibukisha imfwa ya kwa Yesu. Nshishibe nga namumfwa ifyo namulondolwela.

Sharon: Ee ning’umfwa. Natasha sana pa kunondolwelako fyonse ifi.