Evri dei, ol ofis blong ol Witnes blong Jehova oli kasem plante leta long ol prisena long ol defren prisen long Yunaeted Stet, blong askem help blong kasem save long God mo Baebol.

Mifala i ansarem ol leta ya, mo mekem plan blong sam Witnes long ol lokol kongregesen oli visitim olgeta long prisen, blong stadi Baebol wetem olgeta.

Long sam prisen, ol Witnes oli mekem ol miting olsem long kongregesen. Long wan prisen, 32 prisena i lesin long wan pablik tok long tu yad blong prisen.

I gud tumas blong luk olsem wanem ol wok ya i givhan long ol prisena. Wan man long Indiana i mas stap long prisen ful laef blong hem from we hem i kilim wan man i ded. Man ya i mekem ol bigfala jenis long laef mo fasin blong hem, nao hem i kam naf blong baptaes olsem wan Witnes blong Jehova.

Wan Witnes we i stadi Baebol wetem wan prisena long bigfala prisen long California, i se: “Bifo hem i wan rabis man, be mi luk olsem wanem hem i jenis mo i gohed gud taem hem i stadi Baebol. Hem i mekem ol bigfala jenis long fasin blong hem, nao hem i naf blong tekem baptaes.”

Plante prisena oli folem ol trutok blong Baebol we oli lanem, nating se maet samting ya i putum laef blong olgeta long denja. Samfala we oli bin stap long ol rabis grup bifo, oli mas go stap long wan narafala rum o wan narafala prisen blong oli save stap sef.

Olgeta we oli wok long ol prisen, oli sapraes taem oli luk olsem wanem Baebol i jenisim laef blong sam prisena. Sam haeman blong prisen oli givim praes long ol Witnes blong talem tangkiu from gudfala wok we oli mekem olsem ol volontia, blong halpem ol prisena.