Long Sarede, 1 Maj 2014, i gat 823 man oli kam wanples long wan miting long Haos Asembli blong ol Witnes blong Jehova long taon blong Benin long Naejeria, blong makem wan impoten samting. Stat long 1999, ol Witnes blong Jehova oli mekem plan blong bildim ol Haos Kingdom long ol ples we i pua, mo oli bildim 3,000 Haos Kingdom long Naejeria.

Long miting ya, oli tokbaot smol long saed blong histri blong wok blong bildim ol ples blong miting long ol kongregesen long Naejeria, stat long ol yia 1920. Fastaem, oli mekem miting long haos blong ol brata mo sista, mo tu oli rentem ol rum. Wan olfala haos we ol Witnes blong Jehova long Naejeria oli yusum blong mekem miting long hem, i stap long taon blong Ilesa. Haos ya oli wokem samwe long yia 1935. Bitwin long yia 1938 mo 1990, namba blong ol kongregesen i kam antap bigwan. Fastaem i gat 14 kongregesen mo biaen i gat 2,681, be yet ol brata mo sista oli faenem i had blong gat wan ples blong mekem wosip. Long sam ples, sikis kongregesen oli serem wan Haos Kingdom. Long sam narafala ples, Haos Kingdom i fulap mo ol man oli stanap afsaed long saed blong windo mo oli lesin long ful miting. Mo tu, i gat sam kongregesen we oli gat miting long haos blong ol brata mo sista mo samfala long ol skul.

Long 1990, branj ofis blong ol Witnes blong Jehova i stat blong givim mane blong sapotem wok blong bildim ol Haos Kingdom. Long 1997, Komiti Blong Bildim Ol Haos Wosip i givhan long 105 kongregesen blong bildim no riperem Haos Kingdom blong olgeta. Long ol yia 1997 kasem 1999, oli wokem 13 niufala Haos Kingdom mo i tekem 7 kasem 15 dei blong bildim wan Haos Kingdom.

Nating se oli bildim plante Haos Kingdom, be namba blong ol Witnes blong Jehova long Naejeria i stap kam antap. Long Eprel 1998, branj ofis i talemaot se i gat samwe long 1,114 Haos Kingdom long kantri ya we oli nidim blong bildim.

Long miting we i stap long taon blong Benin, Don Trost, wan memba blong Branj Komiti long Naejeria, i talemaot long ol man se: “!Hem i wan bigfala wok! Mifala i stap tingbaot se, ‘?Olsem wanem bae yumi finisim wok ya?’” Stat long 1999, i gat ol grup blong sikis kasem eit man we oli givhan long ol kongregesen, blong wokem ol Haos Kingdom blong olgeta. Hemia i olsem ansa blong kwestin blong olgeta. Ol brata oli folem ol plan we i isi blong bildim ol Haos Kingdom, from samting ya oli wokem samwe long 17 Haos Kingdom long wan manis long ol 14 yia we oli pas.

Brata Trost i talem ol gudfala tok from wok blong bildim ol Haos Kingdom we i hapen long ol yia we oli pas, be hem i talem se i gat plante moa wok blong mekem. Long 2013, i gat bitim 8,000 Witnes blong Jehova long Naejeria. Hem i talem se: “Yumi nidim 100 Haos Kingdom evri yia from namba blong ol Witnes bambae i kam bigwan moa long fiuja.” Long 2013, i gat samwe long 351,000 Witnes blong Jehova long bitim 5,700 kongregesen long Naejeria.