Tim we i wok afsaed mo ol mekanik, oli yusum tu bigfala masin blong putum wan bigfala paep blong wota long stret ples blong hem. Haos we i stap biaen, hemia ofis bilding.

Ol man we oli wok blong wan kampani oli putum ol wol afsaed. Kala blong ol wol ya i sem mak long ol samting raonabaot.

Afta we oli putum simen long floa, tu wokman blong wan kampani i yusum tu masin blong smutum, polisim, mo mekem simen i strong.

Wan foto we oli tekem long not is blong branj. Long fored, olgeta we oli wok afsaed oli stap karemaot ol samting mo rerem ples blong putum ol trak, klosap long resepsen eria. Long lef saed, oli putumap finis aean frem blong smol haos we i joenem tufala bilding blong ofis. Tufala haos we i stap biaen, hemia not mo saot prodaksen haos.

Klosap long Haos Blong Slip A, wan woman blong sevei i jekem wok blong olgeta we oli wok long yad. From we oli planem ol tri mo flaoa bifo we oli bildim ol haos, bambae oli bigwan taem oli finisim wok blong bildim ol haos.

Tufala i pentem floa blong ples blong paking. Wan long tufala i werem spesel sus we i no save putum mak long pent. Pent ya i strong mo i blokem oel blong i no spolem simen. Hem i wan gudfala pent blong yusum long ples blong putum ol trak.

Tu wokman i katem ol jen blong hangem ol samting blong hotem wan bigfala rum blong wok.

Ol wokman oli stat blong pentem insaed blong Ofis Bilding. Antap long ol wanwan ofis, i gat wan masin (blong hotem ofis, mekem fan, mo ekondisen) we oli blokem long ol blak plastik blong protektem.

Tu woman i stap putum wan aean frem long ples we risepsen bambae i stap long hem.

Tu wokman blong wan kampani i yusum wan bigfala masin, blong leftemap mo putum ol glas afsaed long rum blong kakae mo bigfala rum blong mekem miting.

Tim blong Lektrik Data i joenem ol plag long ol rop blong data. I gat samwe long 50 kilometa blong ol rop ya aninit long floa blong ol fo stori blong Ofis Bilding. Oli wokem floa ya long wan fasin we i no hadwok tumas blong jenisim ol ofis olbaot, sipos oli nidim.

Tim Blong Emejensi i stap tren blong sevem wan man we i foldaon long haos antap, be rop we i joen long strap blong hem i holemtaet hem.

Wan i wok afsaed blong levelem graon long ples blong wokbaot, bifo we oli putum simen. Mo tu, trakta i stap digim ol hol blong oli save planem wan laen blong ol tri blong bus.

Wan foto we oli tekem antap i soem ol sola panel we oli putum long ruf blong tufala prodaksen haos mo Ofis Bilding, blong givim elektrik long olgeta.

Wan long tim blong finisim gud ol samting, i stap putum simen tael long floa blong namba tri stori. Orenj mat we i stap aninit long ol tael, i seraotem olgeta long floa we i stap aninit, mo i protektem ol tael blong oli no brok sipos floa i muvmuv smol.

Ol wokman oli go tekem kakae blong olgeta long rum we oli wokem blong kakae long hem, taem oli stap bildim branj ofis ya. Oli givimaot kakae long tri defren taem long wan dei, long klosap wan taosen man.

Ol trak blong doti oli stap tekemaot ol samting biaen long ofis bilding. Long raetsaed oli putum ol sata, blong blokem san i no go long rum blong kakae mo long bigfala rum we oli save yusum blong mekem ol spesel miting.

Wan woman long tim blong finisim ol samting, i putum kapet long floa, wetem tu volontia we oli stap long Plan Blong Volontia Blong Wan Dei. Long plan ya, oli askem long ol kongregesen long Inglan mo Aealan blong oli sanem ol volontia we oli save givhan blong wan dei. Long en blong Februari, i gat bitim 5,500 we oli joen long plan ya finis.

Ol wokman blong wan kampani oli stap wokem wan longfala wol long medel blong bilding ya. Ol mak long floa oli soemaot ples we i sef blong ol masin oli ron long hem.

Tu wokman i brum blong mekem ples i stap klin taem oli putum floa blong risepsen.