Long Ogis 2014, ol Witnes blong Jehova long fulwol, oli seremaot wan traket we i pulum man blong save Websaet ya jw.org. Samting ya i mekem se long manis ya i gat samwe long 65 milian man oli go long Websaet ya. Long fulwol, klosap 10,000 man we oli go long Websaet ya blong askem Baebol stadi. Spesel wok blong tokbaot jw.org, i givhan long plante man.

Long Kanada, wan Witnes i mitim wan woman nem blong hem Madeline. Tufala i stap long wan eleveta mo Witnes ya i soem traket ya, ?Weples Yu Save Faenem Ansa Blong Ol Impoten Kwestin? Madeline i talem se las naet, taem hem i stap long haos blong hem, hem i prea long God blong givhan long hem blong faenem ansa blong ol impoten kwestin. Hem i bin askem sam jos blong oli mekem Baebol stadi wetem hem, be oli no kam luk hem. Biaen, hem i stadi Baebol wetem ol Witnes blong Jehova.

Wan Witnes long Filipin nem blong hem Rowena, i storian wetem wan Jaenis man long wan ples blong kakae. Hem i givim traket long man ya mo i eksplenem se ol Witnes blong Jehova oli wantem halpem ol man blong save Baebol.

Man ya i talem se, hem i neva luk wan Baebol. Tufala i storian gud mo samting ya i pulum man ya blong kam long wan asembli blong ol Witnes blong Jehova. Biaen, hem i talem se hem i wantem savegud Baebol mo bambae hem i daonlodem long jw.org Websaet.

Guillermo wan Witnes long Spen we sora blong hem i fas, i mitim Jorge wan fren blong hem we tufala i bin skul tugeta, we hem tu sora blong hem i fas. Jorge i gat plante kwestin from we mama blong hem i jes ded. Guillermo i givim traket long hem mo i eksplenem olsem wanem Jorge i save go long jw.org blong faenem ansa blong ol kwestin blong hem. Mo tu, Guillermo i askem Jorge blong kam long miting long Haos Kingdom blong ol Witnes. Jorge i kam long miting, mo stat long taem ya hem i neva mestem miting, nating se hem i stap 60 kilometa longwe long Haos Kingdom.

Long Grinlan, sam Witnes i tekem wan bot blong go long wan ples we i stap longwe long taon. I tekem 6 aoa blong bot i kasem ples ya, mo i gat 280 man i stap long ples ya. Oli prij, givimaot traket, mo oli soem wan video we i kamaot long lanwis Grinlan. Mo tu, oli statem Baebol stadi wetem wan man mo woman blong hem. Naoia oli stadi tu taem long wan wik, long telefon.

I gat sam narafala ples bakegen we ol Witnes oli go long hem. Ol Witnes long Nikaragwa oli plan blong go seremaot traket long ol man we oli toktok lanwis Mayangna, we oli stap long medel bus long Karibin. Oli ron long wan olfala bas blong 20 aoa mo rod i nogud, afta oli wokbaot 11 aoa, i gat ol sofmad long rod blong kasem ples we ol man oli stap long hem. Long ples ya, oli seremaot ol traket mo soem ol video long lanwis Mayangna, we i mekem ol man blong ples ya oli sapraes mo oli glad tumas.

Estela i givim traket long wan man we i kam long wan smol taon long Amazon long Brasil. Man ya i tekem traket mo i fulumap long poket blong hem, mo hem i no soem intres. Taem hem i stap gobak, enjin blong bot blong hem i no moa wok, mo hem i stap flot long reva. Hem i stap ridim traket ya, taem hem i stap wet blong ol man oli kam givhan long hem. Hem i yusum telefon blong hem blong go long jw.org, mo ridim sam atikol mo daonlodem sam video. Sam dei biaen, man ya i mitim hasban blong Estela mo i sanem hem blong talem tangkiu long Estela from traket ya. Man ya i talem se: “Ol atikol we mi ridim taem mi stap long bot, oli mekem mi no fraet blong wet kasem taem we wan bot i kam tekemaot mi. Ol pikinini blong mi oli laekem ol video blong Caleb. Bambae mi no stop blong go long jw.org.”