Long 1 Februari 1943, faswan klas blong wan spesel skul i stat long apstet New York. Skul ya we naoia yumi singaotem se Wajtaoa Baebol Skul Blong Gilead, i trenem finis bitim 8,000 man mo woman we oli kam long ol defdefren ples long wol.

Jonathan, we i tren long Gilead i no longtaem i pas, i talem se: “Tijing we mifala i kasem i stanap long Tok blong God, mo bambae i givhan long mifala blong mekem wok we i gud moa long eni ples mo kalja.” Waef blong hem Marnie, i talem se: “Naoia, bitim olgeta yia bifo, mi wantem halpem ol man blong oli luksave se fasin blong laef we i beswan, hemia rod we Krieta blong yumi i talem. Mi bilif fulwan se sipos mi halpem ol narafala blong oli save Jehova, laef blong olgeta bambae i kamgud moa.”

Skul blong Gilead i wan kos blong faef manis, long saed blong Baebol mo impoten wok ya blong ol ivanjelis. Kos ya i blong halpem ol studen blong givhan long ol narafala man blong God blong oli stanap strong, mo blong wokem ol fasin we oli nidim blong fesem ol hadtaem tede. Long kos ya, klas i spenem taem blong tokbaot ol stamba trutok blong Baebol we oli save halpem ol studen blong oli fren moa wetem Jehova God.

Ol kapol we oli tren long Gilead, oli mekem wok blong God fultaem. Afta long graduesen, maet oli gobak long ples we oli stap long hem bifo, o maet oli go long wan narafala kantri. Samfala oli go wok long wan long ol 90 branj ofis blong ol Witnes blong Jehova. Bighaf blong ol studen oli go long ol ples we i gat plante man, olsem nao, oli save talemaot gud nius blong Kingdom long plante moa man.

Fastaem, Skul Blong Gilead i stap long Kingdom Fam, South Lansing, New York. Long 1961, oli muvum skul ya i go long wol hedkwota blong ol Witnes blong Jehova long Brooklyn, New York. Stat long 1988 go kasem 1995, skul ya i stap long Wajtaoa Fam, long Wallkill, New York. Long 1995, oli muvum skul ya i kam long ples we hem i stap naoia, long Wajtaoa Edukesen Senta, long Patterson, New York. Long Maj 2013, i gat graduesen blong klas namba 134.

Long ol 70 yia we i pas, olgeta we oli tren long Wajtaoa Baebol Skul Blong Gilead oli soemaot wan nambawan eksampol blong holemstrong long wok blong Jehova.