Ol Witnes blong Jehova oli givim Baebol Long Niu Wol Translesen long eni man we i wantem ridim.

Ol Baebol sosaeti oli bin printim plante milian defdefren translesen blong Baebol. Nating se i olsem, plante man oli no gat wan Baebol yet long prapa lanwis blong olgeta, from we oli pua, o oli no wantem Baebol we narafala jos i printim. Taswe, ol Witnes blong Jehova oli printim Baebol Long Niu Wol Translesen long bitim 115 lanwis.

Ridim ol stori ya:

• Ruwanda: Silvestre mo Venantie, we tufala i gat fo pikinini, i talem se: “Mifala i pua, taswe mifala i no naf blong pem wan Baebol blong evriwan long famle. Be naoia, mifala wanwan i gat Baebol Long Niu Wol Translesen long lanwis Kinyarwanda, mo mifala i joen wanples evri dei blong ridim.”

  Wan pasta blong Anglikan long kantri ya, i talem se: “Mi kasem save gud long Baebol ya. I moa gud i bitim ol narafala Baebol we mi bin ridim. !Ol Witnes blong Jehova oli rili kea long ol man!”

• Demokratik Ripablik Blong Kongo: Sam jos oli no wantem salem Baebol long ol Witnes blong Jehova long lanwis Lingala, nating se plante man long kantri ya oli toktok Lingala.

  Taswe, yumi no sapraes se, taem Baebol Long Niu Wol Translesen i kamaot long Lingala, ol Witnes blong Kongo oli yusum Baebol ya mo seremaot long ol narafala tu. Taem oli soemaot Baebol ya fastaem long wan asembli blong ol Witnes blong Jehova, evriwan oli glad bitim mak, mo sam polis tu we oli stap long stadium long taem ya, oli joenem laen blong ol man we oli wet blong kasem wan Baebol.

• Fiji: Ol Baebol long Fiji oli sas tumas, taswe long ol yia we i pas, plante Witnes blong Jehova oli yusum Inglis Baebol Long Niu Wol Translesen. Be long 2009, oli kasem Kristin Grik haf (Niutesteman) blong Baebol Long Niu Wol Translesen, long prapa lanwis blong olgeta.

  Wan man we i luk se Baebol Long Niu Wol Translesen long lanwis blong Fiji i klia gud, i askem sipos hem i save kasem wan kopi blong hem. Be ol Witnes oli eksplenem se hem i mas wet wan manis blong sip i kam long taon blong hem wetem sam moa Baebol. Man ya i no wantem wet, ale hem i wokbaot i go blong mitim wan Witnes long ples we i 35 kilometa longwe long hem, blong kasem wan Baebol Long Niu Wol Translesen. Man ya i talem se: “Translesen ya i moa gud i bitim hemia we mifala i yusum. Hem i klia mo i isi blong kasem save.”

• Malawi: Taem Davide i stat blong stadi wetem ol Witnes blong Jehova, samfala blong Baptis Jos i go insaed long haos blong hem mo tekemaot Baebol we oli bin givim long hem. Taswe Davide i glad we i glad taem Baebol Long Niu Wol Translesen i kamaot long lanwis Chichewa.

  Taem Davide i lusum faswan Baebol blong hem, hem i ting se bambae hem i neva kasem wan bakegen, from we ol Baebol oli sas tumas long Malawi. Be taem hem i kasem Baebol Long Niu Wol Translesen, hem i talem se: “!Naoia mi gat wan Baebol we i moagud i bitim faswan we mi gat!”

Bitim 60 yia bifo, taem brata i soemaot fashaf blong Baebol Long Niu Wol Translesen long Inglis long wan bigfala asembli long New York, hem i talem long ol man se: “Ridim Baebol ya fulwan. Stadi long hem . . . Putum i go long han blong ol narafala man.” Blong mekem samting ya i kamtru, ol Witnes blong Jehova oli printim bitim 175 milian kopi blong Baebol Long Niu Wol Translesen. Mo tu, naoia yu save ridim Baebol ya long intenet long 50 lanwis.