Fas Buk Blong Kronikel 28:1-21
28 Nao Deved i singaot olgeta prins blong Isrel oli kam wanples long Jerusalem: ol prins blong ol traeb, ol lida blong ol grup+ we oli mekem minista wok blong king, ol lida blong taosen man mo ol lida blong handred man,+ ol lida we oli lukaot long olting, ol animol,+ mo ol boe blong king,+ ol haeman wetem evri strong man mo ol gudfala man blong wok.+
2 Biaen King Deved i stanap mo i talem se:
“Ol brata blong mi mo ol man blong mi, yufala i lesin long mi. Mi mi wantem tumas long hat blong mi, blong wokem wan haos blong i olsem ples blong spel blong bokis blong kontrak blong Jehova, mo blong i olsem stul blong leg blong God blong yumi.+ Mo mi mi mekemrere finis ol samting blong wokem haos ya.+
3 Be tru God i talem long mi se: ‘Bambae yu yu no wokem wan haos blong nem blong mi i stap long hem,+ from we yu yu wan man blong faet, mo yu mekem blad i ron.’+
4 Be nating se i olsem, long olgeta haos blong papa blong mi, Jehova we i God blong Isrel i jusumaot mi blong mi kam king blong olwe long Isrel.+ Hem i jusumaot Juda blong i kam lida.+ Mo long haos blong Juda, hem i jusumaot haos blong papa blong mi.+ Mo long ol boe blong papa blong mi, hem i glad long mi, nao i mekem mi mi kam king long olgeta ples long Isrel.+
5 Jehova i givim plante boe long mi,+ mo long ol boe ya, hem i jusumaot Solomon+ blong i sidaon long tron* blong Jehova mo rul long Isrel.+
6 “Hem i talem long mi se: ‘Boe blong yu Solomon, hem nao bambae i wokem haos blong mi mo ol yad blong mi, from we mi mi jusum hem blong i kam boe blong mi, mo mi bambae mi kam papa blong hem.+
7 Mo bambae mi mekem rul blong hem i stap strong blong olwe+ sipos hem i gat strong tingting blong obei long ol komanmen mo ol desisen blong mi,+ olsem we hem i stap mekem naoia.’
8 Long fored blong olgeta man Isrel, hemia kongregesen blong Jehova, mo long fored blong God blong yumi, mi mi talem long yufala se: Yufala i mas folemgud mo lukaot olgeta komanmen blong Jehova we i God blong yufala, olsem nao bambae yufala i save tekem gudfala graon ya+ i blong yufala olwe, mo pasem long ol boe we bambae oli kamaot biaen long yufala.
9 “Mo yu, boe blong mi Solomon, yu mas save God blong papa blong yu, mo yu mekem wok blong hem long fulhat blong yu,+ mo we sol* blong yu i glad* blong mekem. Hemia from we Jehova i stap jekemgud hat blong olgeta man,+ mo hem i save evri tingting blong ol man.+ Taswe sipos yu lukaotem hem, bambae hem i mekem se yu faenem hem,+ be sipos yu lego hem, bambae hem i tanem baksaed long yu blong olwe.+
10 Yu luk, Jehova i jusumaot yu blong yu wokem wan haos blong i kam wan tabu ples. Yu mas gat strong tingting mo yu mekem ol wok ya.”
11 Biaen Deved i givim plan blong haos ya+ long boe blong hem Solomon, hemia plan blong rum long doa,+ ol haos blong hem, ol storum, ol rum antap long ruf, ol rum we oli stap insaed olgeta, mo haos blong lid blong Bokis.*+
12 Deved i givim plan blong evri samting we spirit blong God i soem long hem.* Hemia plan blong ol yad+ long haos blong Jehova, olgeta rum blong kakae we oli stap raonabaot long yad ya, mo ol rum blong putum ol sas samting blong haos blong tru God mo ol rum blong ol sas samting we oli mekem i kam tabu.*+
13 Mo tu, hem i givim plan blong ol defdefren grup blong ol pris+ mo ol Livaet, mo blong olgeta wok we bambae oli mekem long haos blong Jehova, mo blong olgeta samting we bambae oli yusum blong mekem ol wok long haos blong Jehova.
14 Mo tu, hem i givim plan blong ol wet blong gol, gol we i blong wokem olgeta samting we bambae oli yusum long ol defdefren wok, wet blong olgeta samting we oli wokem long silva, mo blong olgeta samting we oli yusum long ol defdefren wok.
15 Mo tu, hem i givim plan blong ol wet blong gol we bambae oli yusum blong wokem ples blong putum laet+ wetem ol laet blong olgeta, ol wet blong ol defdefren ples blong putum laet mo ol laet blong olgeta, mo wet blong silva we bambae oli yusum blong wokem ples blong putum laet, mo ol wanwan ples blong laet mo ol laet blong olgeta we i stret long ol wanwan wok blong olgeta,
16 mo tu, wet blong gol we bambae oli yusum blong wokem wanwan long ol tebol blong putum bred we oli stakemap,*+ mo silva we bambae oli yusum blong wokem ol tebol,
17 mo gol we i klin gud we bambae oli yusum blong wokem ol fok, ol bol, ol jag, mo wet blong gol we bambae oli yusum blong wokem wanwan long ol smol bol,+ mo wet blong silva we bambae oli yusum blong wokem wanwan long ol smol bol.
18 Mo tu, Deved i givim wet blong gol we oli bonem i kam klin, blong bambae oli wokem olta blong insens long hem,+ wetem ol jerubim+ we oli representem jariot.+ Ol jerubim ya oli stretem ol wing blong olgeta nao oli kavremap bokis blong kontrak blong Jehova.
19 Deved i talem se: “Han blong Jehova i stap long mi, mo hem i mekem se mi mi gat hed, blong mi raetemdaon+ evri samting long plan ya.”+
20 Biaen Deved i talem long boe blong hem Solomon, se: “Yu mas gat strong tingting mo yu mas strong, mo yu go mekem ol wok ya. Yu no mas fraet o seksek from we Jehova, God blong mi, i stap wetem yu.+ Bambae hem i no livim yu o gowe long yu,+ be bambae hem i stap wetem yu go kasem we yu finisim olgeta wok we yu mas mekem long haos blong Jehova.
21 Mo hemia ol grup blong ol pris+ mo ol Livaet+ we bambae oli mekem olgeta wok long haos blong tru God. Yu yu gat ol man we oli gat gudhan mo oli rere blong mekem enikaen wok,+ mo i gat ol prins tu+ wetem olgeta man we bambae oli mekem olgeta samting we yu talem.”
Ol futnot
^ NT: “jea blong king.”
^ NT: “rere.”
^ NT: “haos blong atonmen.”
^ NT: “tabu spirit i putum long tingting blong hem.”
^ NT: “ol samting we oli dediketem.”
^ Hemia sobred.
