Jeremaea 19:1-15
19 Hemia samting we Jehova i talem, i se: “Yu go mo yu pem wan jag we oli wokem long graon, long wan man blong wokem graonpot.+ Yu tekem sam elda blong ol man mo sam elda blong ol pris,
2 mo yufala i go long Vali Blong Boe Blong Hinom,+ long fored blong Get Blong Ol Pis Graonpot. Mo long ples ya, yu talemaot ol tok we mi talem long yu.
3 Bambae yu talem se: ‘Yufala i harem tok blong Jehova, yufala ol king blong Juda mo yufala we i laef long Jerusalem. Hemia samting we Jehova komanda blong ol ami we i God blong Isrel i talem, i se:
“‘“Klosap nao bambae mi tekem wan trabol i kam long ples ya, mo eni man we i harem, bambae i mekem sora blong hem i narakaen.
4 Hemia from we oli lego mi+ mo oli mekem se mi no moa luksave ples ya.+ Oli stap mekem sakrefaes long ples ya, i go long ol narafala god we olgeta mo ol olfala blong olgeta, mo ol king blong Juda oli neva save, mo oli mekem ples ya i fulap long blad blong ol man we oli no gat fol.+
5 Oli wokem ol hae ples blong Bal, blong bonem ol boe blong olgeta long faea blong givim i go long Bal, olsem ol ofring we oli bon fulwan.+ Hemia wan samting we mi no bin talem long olgeta blong mekem, mo samting olsem i neva kam long hat blong mi.”’*+
6 “‘“Jehova i talem se: ‘!Taswe, luk! i gat ol dei i stap kam, we bambae oli no moa singaot ples ya se Tofet o Vali Blong Boe Blong Hinom, be bambae oli singaotem se Vali Blong Kilim Man i Ded.+
7 Bambae mi spolem ol plan blong Juda mo Jerusalem long ples ya, mo bambae mi mekem oli ded long naef blong faet stret long fored blong ol enemi blong olgeta, mo oli ded long han blong olgeta we oli stap lukaot rod blong tekemaot laef* blong olgeta. Mo bambae mi givim ol dedbodi blong olgeta i go long ol pijin long heven mo long ol wael animol long wol olsem kakae.+
8 Mo bambae mi mekem taon ya i kam olsem wan samting blong fraet long hem, mo wan samting blong wesil from. Ol las man we oli pas long ples ya, bambae oli stap lukluk we oli fraet tumas mo oli stap wesil from bigfala trabol i kasem hem.+
9 Mo bambae mi mekem olgeta oli kakae bodi blong ol boe mo ol gel blong olgeta, mo olgeta wanwan bambae oli kakae bodi blong ol fren blong olgeta, from we ol enemi oli raonem olgeta mo oli harem nogud taem ol enemi blong olgeta oli blokem olgeta mo olgeta we oli stap lukaot rod blong tekemaot laef* blong olgeta.”’+
10 “Nao stret long fes blong ol man ya we oli go wetem yu, yu brekem jag ya,
11 mo yu talem long olgeta se: ‘Hemia samting we Jehova komanda blong ol ami i talem, i se: “Hemia nao olsem wanem bambae mi brebrekem taon ya mo ol man ya, olsem we man i brebrekem wan pot blong man blong wokem graonpot, nao man i no save wokem gud bakegen, mo bambae oli berem ol dedman long Tofet gogo i no moa gat naf ples blong berem olgeta.”’+
12 “Jehova i talem se: ‘Hemia nao samting we bambae mi mekem long ples ya mo long ol man we oli laef long hem, blong mekem taon ya i kam olsem Tofet.
13 Mo ol haos long Jerusalem mo ol haos blong ol king blong Juda bambae oli kam doti olsem ples ya Tofet,+ yes, olgeta haos ya we antap long ol ruf blong olgeta, oli stap mekem sakrefaes i go long ol ami blong heven,+ mo oli kafsaedem ol dring ofring i go long ol narafala god.’”+
14 Taem Jeremaea i aot long Tofet long ples we Jehova i sanem hem blong talemaot profet tok, i gobak, hem i go stanap long yad blong haos blong Jehova mo i talem long olgeta man se:
15 “Hemia samting we Jehova komanda blong ol ami we i God blong Isrel i talem, i se: ‘Naoia bambae mi mekem olgeta trabol we mi bin talemaot agensem taon ya, i kam kasem hem mo olgeta smol taon blong hem, from we oli mekem stronghed oli no wantem* obei long ol tok blong mi.’”+
Ol futnot
^ NT: “fasin ya i neva kam insaed long tingting blong mi.”
^ NT: “sol.”
^ NT: “sol.”
^ PT: “oli mekem nek blong olgeta i strong, oli no.”
