Jeremaea 22:1-30
22 Hemia samting we Jehova i talem, i se: Yu go long haos* blong king blong Juda mo yu talemaot mesej ya.
2 Yu mas talem se: ‘O king blong Juda we yu stap sidaon long tron* blong Deved, yu harem tok blong Jehova. Yu wetem ol man blong wok blong yu mo ol man blong yu, hemia olgeta we oli stap pastru long ol get ya.
3 Hemia samting we Jehova i talem, i se: “Yufala i mas mekem se i gat jastis mo stret fasin oltaem. Yufala i mas tekemaot man we i stap long han blong man we i stap giaman blong stilim olting blong hem. Yufala i no mas tritim nogud wan man blong narafala kantri, mo yufala i no mas spolem eni pikinini we i no gat papa,* no ol wido.+ Mo yufala i no mas mekem blad blong ol gudfala man i ron long ples ya.+
4 From sipos yufala i obei gud long tok ya, ale ol king we oli stap sidaon long tron* blong Deved,+ oli save go insaed tru long ol get blong haos ya, oli ron long ol jariot mo ol hos. Olgeta wetem ol man blong wok blong olgeta mo ol man blong olgeta.”’+
5 “‘Be sipos yufala i no obei long ol tok ya, mi mi mekem promes long nem blong mi wan se haos ya bambae i kam wan ples we i nogud olgeta.’+ Hemia nao tok blong Jehova.
6 “From hemia nao samting we Jehova i talem blong tokbaot haos blong king blong Juda, i se:‘Long lukluk blong mi, yu yu olsem Gilead,Yu olsem top blong hil blong Lebanon.
Be bambae mi mekem yu kam wan draeples,Bambae i no gat man nating i stap laef long ol taon blong yu.+
7 Mo bambae mi putumap ol man blong distroem samting* blong oli kam agensem yu,Olgeta wanwan wetem ol tul blong faet blong olgeta.+
Bambae oli katemdaon ol nambawan sida blong yuMo oli mekem olgeta oli foldaon i go long faea.+
8 “‘Mo plante nesen bambae oli stap pas klosap long taon ya mo oli stap taltalem long olgeta se: “?From wanem Jehova i mekem olsem long bigfala taon ya?”+
9 Nao bambae oli ansa se: “From we oli lego kontrak blong Jehova God blong olgeta, mo oli bodaon long ol narafala god mo oli wok blong olgeta.”’+
10 Yufala i no mas krae from man we i ded,Mo yufala i no mas soemaot se yufala i sore long hem.
Be yufala i mas krae bigwan from man we i stap go,From bambae hem i no moa save kambak blong luk kantri ya we hem i bon long hem.
11 “From hemia samting we Jehova i talem long saed blong Salum*+ boe blong Josaea, king blong Juda we i stap rul long taem ya, we papa blong hem Josaea nao i sud rul,+ mo we i aot finis long ples ya, i se: ‘Bambae hem i no moa gobak long ples ya.
12 From bambae hem i ded long kantri ya we oli tekem hem i go stap long hem, mo bambae hem i no moa luk kantri ya.’+
13 Sore tumas long man we i no folem stret fasin, taem i bildim haos blong hem,Mo i no gat jastis taem i wokem ol rum blong hem antap,Mo i stap mekem ol fren blong hem oli wok blong hem, we oli no kasem wan samting,Mo i no wantem givim pei blong olgeta.+
14 Man we i stap talem se: ‘Bambae mi bildim wan haos blong mi we i gat bigfala spesWe ol rum blong hem antap oli bigbigwan.
Bambae mi putum ol windo long hemMo mi flasem ol wol blong hem long sida mo mi pentem long vemilion.’*
15 ?Bambae yu gohed nomo blong rul, from we yu yu yusum plante moa sida i winim ol narafala?Papa blong yu tu i kakae mo i stap dring,Be hem i mekem se i gat jastis mo stret fasin oltaem,+Mo evri samting we hem i mekem i go gud.
16 Hem i difendem raet blong ol man we oli stap harem nogud mo ol puaman,Mekem se evri samting i go gud.
‘?Yu no ting se hemia nao fasin blong man we i talem se i save mi?’ Hemia nao tok blong Jehova.
17 ‘Be ae blong yu mo hat blong yu i fasgud long fasin ya we yu stap giaman blong kasem samting,Mo yu stap mekem blad blong ol gudfala man i ron,Mo yu stap ravem man blong kasem samting mo yu stap fosem ol man blong karemaot olting blong olgeta.’
18 “Taswe, hemia samting we Jehova i talem long saed blong Jehoeakim+ boe blong Josaea, king blong Juda se:‘Bambae ol man oli no krae from hem se:“!O no, brata blong mi! !O no, sista blong mi!”Bambae oli no krae from hem se:“!O no, masta blong mi! !O no, king!”
19 Bambae oli mekem long yu olsem wan dongki we i ded,+We oli dragem hem i go olbaot mo oli sakem hemI go aotsaed long ol get blong Jerusalem.’+
20 Yu go antap long Lebanon mo yu singaot bigwan,Yu stap long Basan, yu leftemap voes blong yu,Mo yu stap long Abarim, yu singaot bigwan,+From olgeta we oli lavem yu tumas, ol man oli smasem olgeta finis.+
21 Long taem ya we yu stap gud nomo, mi bin toktok long yu.
Be yu talem se: ‘Bambae mi no obei.’+Hemia nao fasin blong yu, stat taem yu yangfala kam kasem naoia,From yu no bin obei long voes blong mi.+
22 Wan win bambae i stap lukaot long evri man blong yu blong lukaot long sipsip,+Mo olgeta we oli lavem yu tumas, bambae oli go long kalabus.
Biaen ol man bambae oli mekem yu yu sem mo oli daonem yu from olgeta trabol we i kasem yu.
23 !O yu we yu stap long Lebanon,+Long nes blong yu antap long ol sida,+Bambae yu krae, taem ol trabol oli kasem yu,Yu harem nogud tumas* olsem wan woman we i stap bonem pikinini!”+
24 “Mo Jehova i talem se: ‘!Long nem blong mi we mi laef i stap, mi talem se, nating sipos Konia*+ boe blong Jehoeakim,+ king blong Juda, hem i olsem spesel ring long raethan blong mi, be yet, bambae mi pulumaot yu long ples ya!
25 Bambae mi putum yu long han blong olgeta we oli stap lukaot rod blong tekemaot laef* blong yu, yes long han blong olgeta we yu fraet long olgeta, long han blong King Nebukadnesa* blong Babilon, mo long han blong ol man Koldia.+
26 Mo bambae mi slingim yu mo mama blong yu we i bonem yu, i go long wan narafala kantri we yufala i no bon long hem, mo long ples ya nao bambae yufala i ded long hem.
27 Mo bambae oli neva gobak long kantri ya we oli wantem tumas.*+
28 ?Olsem wanem? ?Man ya Konia, hem i olsem wan rabis samting nomo, wan graonpot we i brok finis,No wan narafala samting olsem, we i no gat man i wantem hem??From wanem oli slingim hem mo olgeta we oli kamaot biaen long hem,Mo oli sakem olgeta i go long wan kantri we oli no save?’+
29 O wol,* wol, wol, yu harem tok blong Jehova.
30 Hemia samting we Jehova i talem, i se:‘Yu raetemdaon nem blong man ya olsem se hem i no gat pikinini,Olsem wan man we bambae i no save win long eni samting, long ful laef blong hem,From bambae i no gat wan long olgeta we i kamaot biaen long hem i tekem ples blong hem,I sidaon long tron* blong Deved mo i rul bakegen long Juda.’”+
Ol futnot
^ NT: “pales.”
^ NT: “jea blong king.”
^ NT: “pikinini we i no gat papa mo mama.”
^ NT: “jea blong king.”
^ PT: “bambae mi mekem ol man blong distroem samting oli tabu.”
^ Narafala nem blong hem Jehoahas.
^ NT: “pentem i red.”
^ PT: “Bak blong yu i soa.”
^ Narafala nem blong hem Jehoeakin mo Jekonia.
^ NT: “lukaot sol.”
^ PT: “Nebukadresa,” narafala rod blong spelem.
^ NT: “long kantri ya we sol blong olgeta i gruap long hem.”
^ NT: “kantri.”
^ NT: “jea blong king.”
