LESEN 10
Jisas i Obei Oltaem
?Yu yu luk se i isi oltaem blong obei long papa mo mama?— Samtaem i no isi. ?Be yu yu save se Jisas i obei long Jehova mo long papa mo mama blong hem tu?— Stori blong Jisas i save givhan long yu blong yu obei long papa mo mama blong yu, nating se samtaem i no isi. I gud yumi save moa long stori blong Jisas.
Bifo, taem Jisas i no stap long wol yet, hem i stap wetem Papa blong hem long heven, Jehova. Be Jisas i gat papa mo mama blong hem tu long wol ya. Nem blong tufala, Josef mo Meri. ?Yu yu save se tufala i kam papa mo mama blong hem olsem wanem?—
Jehova i tekem laef blong Jisas long heven, mo i putum insaed long bel blong Meri. Olsem nao, Jisas i save bon olsem wan bebi mo laef long wol ya. !Hemia i wan nambawan samting we God nomo i save mekem! Jisas i gru long bel blong Meri sem mak olsem ol narafala bebi we oli gru long bel blong mama blong olgeta. Ale, samwe long naen manis afta, Jisas i bon. Samting ya nao i mekem se Josef mo Meri tufala i kam papa mo mama blong Jisas long wol ya.
Taem Jisas i gat 12 yia nomo, hem i mekem wan samting we i soemaot se hem i lavem tumas Papa blong hem, Jehova. Samting ya i hapen taem Jisas mo famle blong hem oli go long Jerusalem blong mekem lafet blong Pasova. Oli mas wokbaot plante dei blong go long Jerusalem mo blong kambak. Taem oli stap kambak, Josef mo Meri tufala i lukaotem Jisas be tufala i no faenem hem. ?Yu yu save se hem i stap wea?—
?From wanem Jisas i stap long haos blong God?
Josef mo Meri tufala i gobak long Jerusalem, mo tufala i lukaotem Jisas long evri ples. Tufala i wari tumas from we tufala i no save faenem hem. !Be afta long namba tri dei, tufala i faenem hem insaed long haos blong God! ?Yu yu save from wanem Jisas i stap long haos blong God?— From we long ples ya nao, hem i save harem plante moa stori blong Papa blong hem, Jehova. Hem i lavem Jehova tumas mo i wantem save se hem i mas mekem wanem blong Papa blong hem i glad long hem. Taem Jisas i kam wan bigman, hem i obei oltaem long Jehova. Nating se i had long hem mo hem i save se bambae hem i mas harem nogud long bodi blong hem, be hem i obei. ?Be yu ting se Jisas i obei long Josef mo Meri tu?— Yes, Baebol i talem se hem i obei long tufala.
?Yu yu lanem wanem long stori blong Jisas?— Yu mas obei long papa mo mama blong yu, nating se samtaem i no isi. ?Yu tu bambae yu mekem olsem?—
