1. ?Olsem wanem blong gat wan famle we i hapi?

JEHOVA GOD i wantem we famle blong yu i hapi. Baebol i givim plante gudfala advaes long wanwan memba blong famle. Hem i soemaot wanem wok we God i wantem se wanwan memba blong famle oli mekem. Taem wanwan famle i mekem wok blong hem folem advaes we God i givim, oli save kasem gudfala frut long laef blong olgeta. Jisas i talem se: “Man we i harem tok blong God mo i obei long hem, hem i save harem gud.”​—Luk 11:28.

2. ?Famle blong yumi i save hapi sipos yumi luksave wanem?

² Be blong famle i hapi, yumi wanwan i mas luksave se Jehova nao i stamba blong famle, hem nao we Jisas i talem se hem i ‘Papa blong yumi.’ (Matiu 6:9) Papa blong yumi long heven i wokem ol famle. Mo hem i savegud wanem i save mekem ol famle oli hapi. (Efesas 3:​14, 15) ?Ale, Baebol i tijim wanem long saed blong wok blong wanwan memba blong famle?

3. ?Baebol i talem se famle blong ol man i stat olsem wanem? ?From wanem yumi save se samting we Baebol i talem hem i tru?

³ Jehova i wokem faswan man mo woman, Adam mo Iv, mo i joenem tufala olsem hasban mo waef. Hem i putum tufala long wan naesfala paradaes long wol ya​garen blong Iden​mo i talem long tufala se tufala i mas karem plante pikinini. Jehova i talem olsem se: “I gud yutufala i gat plante pikinini blong yutufala, blong olgeta we bambae oli kamaot biaen long yutufala, bambae oli save go stap  long olgeta ples long wol.” (Jenesis 1:​26-28; 2:​18, 21-24) Hemia i no wan kastom stori, from we Jisas i soem se olgeta tok we buk blong Jenesis i talem long saed blong stat blong ol famle, hem i tru. (Matiu 19:​4, 5) Nating se yumi kasem plante trabol, mo laef blong yumi naoia i no olsem we God i bin wantem fastaem, be bambae yumi luk from wanem ol famle oli save hapi tede.

4. (a) ?Olsem wanem ol wanwan memba blong famle oli save mekem we famle i hapi? (b) ?From wanem famle i save hapi sipos yumi stadi long laef blong Jisas?

⁴ Wanwan memba blong famle i save givhan blong mekem se laef insaed long famle i hapi, sipos evriwan oli folem lav blong God. (Efesas 5:​1, 2) ?Be olsem wanem yumi save folem fasin blong God, sipos yumi no save luk hem? Yumi save lanem ol fasin blong Jehova from fasbon Pikinini blong hem we hem i sanem i kamdaon long wol ya. (Jon 1:​14, 18) Taem Jisas Kraes i stap long wol ya, hem i folemgud fasin blong Papa blong hem long heven, mekem se taem ol man oli lukluk mo lesin long Jisas i olsem we oli stap wetem Jehova stret, mo i olsem we oli stap lesin long Hem stret. (Jon 14:9) Taswe, taem yumi kasem save lav we Jisas i soem mo taem yumi folem fasin blong hem, yumi wanwan i save wok blong mekem famle laef i hapi moa.

5, 6. (a) ?Olsem wanem fasin we Jisas i mekem long kongregesen i wan gudfala eksampol long ol hasban? (b) ?Yumi mas mekem wanem blong God i fogivim ol sin blong yumi?

⁵ Baebol i talem se ol hasban oli mas mekem long woman blong olgeta olsem we Jisas i mekem long ol disaepol blong hem. Tingbaot advaes ya we i stap long Baebol se: “Yufala ol man we i mared, yufala i mas lavem ol woman blong yufala, olsem we Kraes i lavem [“kongregesen,” NW ] ya. Taswe hem i letem laef blong hem, blong sevem [kongregesen]. . . . Long sem fasin, man i mas lavem woman blong hem, i mas lukaot gud long hem, olsem we i stap lukaot gud long bodi blong hem nomo. Taem man i stap lukaot gud long woman blong hem, i olsem we hem i stap lukaot gud long bodi blong hem nomo. I no gat man we i wantem spolem bodi blong hem. Man i stap kakae gud blong mekem bodi blong hem i strong, mo i stap lukaot gud long bodi blong hem, olsem we Kraes i stap lukaot gud long [kongregesen].”​—Efesas 5:​23, 25-29.

 ⁶ Lav we Jisas i gat long kongregesen blong ol disaepol blong hem i soem wan gudfala eksampol long ol hasban. Jisas i “stap lavem olgeta olwe,” i givim laef blong hem from olgeta, nating se oli sin man yet. (Jon 13:1; 15:13) Ol hasban oli kasem advaes blong mekem sem fasin ya se: “Yufala ol man we i mared, yufala i mas lavem ol woman blong yufala. Yufala i no mas mekem i strong long olgeta, oltaem yufala i mas mekem i gud long olgeta.” (Kolosi 3:19) ?Wanem i save halpem hasban blong mekem advaes ya i wok long laef blong hem, antap moa sipos samtaem waef i no waesgud long toktok no fasin blong hem? Hasban i mas tingbaot se hem tu i stap mestem plante taem. Mo hem i mas tingbaot wanem samting we hem i mas mekem sipos hem i wantem we God i fogivim hem. ?Wanem samting ya? Hem i mas fogivim olgeta we oli sin agensem hem, mo hemia i minim woman blong hem tu. Be i tru, woman tu i mas mekem sem mak long man blong hem. (Matiu 6:​12, 14, 15) Taswe, wan mared i save wok gud taem hasban mo waef tugeta i gat gudfala fasin ya blong fogif.

7. ?Jisas i tingbaot wanem samting oltaem, mo olsem wanem ol hasban oli save folem fasin blong hem?

⁷ Ol hasban oli mas makem poen ya se, oltaem nomo Jisas i tingbaot ol disaepol blong hem. Hem i tingbaot se oli no naf blong mekem sam samting, mo hem i tingbaot wanem samting we oli nidim long saed blong bodi. Olsem taem oli taed, Jisas i talem long olgeta se: “Yufala i kam. Yumi go long wan ples we i no gat man, we yufala i save spel smol.” (Mak 6:​30-32) I stret we ol hasban oli tingbaot waef blong olgeta long sem fasin. Baebol i talem se ol woman oli “no strong” olsem ol man blong olgeta, taswe ol man oli mas “ona long ol woman.” ?From wanem samting ya i impoten? From we “promes blong God i stap wantaem long man mo woman we tufala i mared, se long gladhat blong hem, bambae hem i givim laef long tufala.” (1 Pita 3:7) Ol hasban oli mas tingbaot se God i no luk olgeta se oli sas from we oli man nomo. Nogat. Nating se man no woman, be olgeta evriwan oli sas long ae blong God taem oli holem strong long hem.​—Ol Sam 101:6.

8. (a) ?Olsem wanem hasban i ‘lukaot gud long woman blong hem olsem we i stap lukaot gud long bodi blong hem nomo’? (b) ?I minim wanem se hasban mo waef tufala i “olsem wan bodi nomo”?

⁸ Baebol i talem se, taem hasban “i stap lukaot gud long woman blong hem, i olsem we hem i stap lukaot gud long bodi blong hem  nomo.” Hemia from we, olsem Jisas i talem, se man mo woman we tufala i mared, “tufala i no moa tu, tufala i olsem wan bodi nomo.” (Matiu 19:6) Taswe, tufala i no mas slip wetem narafala man no woman, tufala i mas stap tru long tufala. (Ol Proveb 5:​15-21; Hibrus 13:4) Oli save mekem olsem, sipos oli no tingbaot olgeta wan nomo be oli tingbaot nid blong narafala fastaem. (1 Korin 7:​3-5) I gud blong tingbaot poen ya tu se: “I no gat man we i wantem spolem bodi blong hem. Man i stap kakae gud blong mekem bodi blong hem i strong, mo i stap lukaot gud long bodi blong hem.” Ol hasban oli mas lavem waef blong olgeta olsem we oli stap lavem olgeta nomo. Oli mas tingbaot se oli stap mekem wok ya long fes blong hemia we i olsem hed blong olgeta, Jisas Kraes.​—Efesas 5:29; 1 Korin 11:3.

9. ?Wanem gudfala fasin blong Jisas we Filipae 1:8 i tokbaot? ?From wanem ol hasban oli mas soem fasin ya long waef blong olgeta?

⁹ Aposol Pol i talem se ‘Jisas Kraes i lavem yumi’ tumas. (Filipae 1:8) Lav we Jisas i soem i mekem ol man oli harem gud. Ol woman we oli biaenem hem, olgeta tu oli haremsave se hem i kea long olgeta. (Jon 20:​1, 11-13, 16) Mo ol waef oli wantem tumas we ol hasban blong olgeta i soem lav, mo kea long olgeta.

10. ?Olsem wanem Jisas i soem wan gudfala eksampol long ol waef?

¹⁰ Wan famle i olsem wan grup blong man we oli wok tugeta. Blong wok gud tugeta, oli nidim wan bos. Jisas tu i gat wan bos, no Hed, blong hem. “God, hem i hed blong Kraes,” olsem we “man, hem i hed blong woman blong hem.” (1 Korin 11:3) Fasin blong Jisas blong stap aninit long God we i hed blong hem, i wan gudfala eksampol long yumi evriwan, from we yumi evriwan i gat wan we i hed blong yumi.

11. ?Wanem fasin we waef i mas soem long hasban blong hem? ?Mo fasin ya blong hem i save karem wanem frut?

¹¹ Ol man oli no stret gud olgeta mo plante taem oli mekem plante mastik. From samting ya, plante taem oli no mekem wok ya blong hed blong famle long fasin we i stret. ?Ale, i stret we waef i mekem wanem? I nogud hem i daonem olgeta samting we man blong hem i mekem, mo i nogud hem i traem bos long famle. Waef i mas tingbaot oltaem se samting we i gud tumas long ae blong God, hemia se hem i kwaet woman mo fasin blong hem i stret gud. (1 Pita 3:4) Taem waef i soem ol fasin ya, bambae hem i faenem se i isi moa blong stap daon aninit long man blong hem,  nating se plante taem hasban blong hem i mestem no i mekem i no stret. Baebol i gohed blong talem se: “Woman i mas ona gud long man blong hem.” (Efesas 5:33) ?Be olsem wanem sipos hasban i no wantem se Kraes i hed blong hem? Ale, Baebol i talem long ol waef blong folem advaes ya: “Yufala ol woman we i mared, yufala i mas obei long ol man blong yufala. Nao sipos ol man blong yufala oli no bilif long tok blong God, be bambae fasin nomo blong yufala i save pulum olgeta blong oli bilif. Taem ol man blong yufala oli luk we fasin blong yufala i klin gud, mo yufala i gat ona, hemia i naf blong pulum olgeta. Bambae i no nid blong yufala i talem wan samting long olgeta.”​—1 Pita 3:​1, 2.

12. ?From wanem i no rong sipos woman i talemaot tingting blong hem wetem respek?

¹² Sipos woman i toktokgud blong talem tingting blong hem we i defren long man blong hem, hemia i no min se hem i no gat respek long man blong hem, nating se man ya i wan Witnes no nogat. Maet tingting blong woman ya i stret, mo maet ful famle i save harem gud sipos oli folem tingting blong woman. Tingbaot Ebraham mo Sera. Ebraham i no agri long wanem we woman blong hem i talem olsem rod blong stretem wan problem insaed long famle blong olgeta. Be God i talem long Ebraham se: “Yu mekem olsem we woman blong yu i talem.” (Jenesis 21:​9-12) Be i tru tu se, sipos hasban i mekem wan desisen mo desisen ya i no agensem loa blong God, waef i soem se hem i glad blong stap aninit long man blong hem, taem hem i agri long desisen ya.​—Ol Wok 5:29; Efesas 5:24.

13. (a) ?Taetas 2:​4, 5 i pulum ol mared woman blong oli mekem wanem? (b) ?Baebol i talem wanem long saed blong seraot mo divos?

¹³ Woman i save mekem plante defdefren samting blong lukaot gud long famle. Baebol i soem se ol woman we oli mared oli mas “lavem ol man blong olgeta wetem ol pikinini blong olgeta . . . oli kwaet woman, we laef blong olgeta i klin gud . . . [oli] lukaot gud long haos blong olgeta, mo . . . [oli] ona long ol man blong olgeta.” (Taetas 2:​4, 5) Wan waef mo mama we i mekem samting ya, i save winim lav mo respek blong famle blong hem. (Ol Proveb 31:​10, 28) Be, from we mared i joenem tufala we tufala i sinman, i save gat sam bigfala trabol samtaem we i mekem se tufala i seraot no tufala i divos. Baebol i talem se i gat sam risen nomo blong wan man mo woman tufala i save seraot. Fasin ya blong seraot i wan samting we tufala i no mas ting nating long hem, from we Baebol i givim advaes  ya se: “Woman i no mas lego man blong hem. . . . Mo man i no mas [“lego,” NW ] . . . woman blong hem.” (1 Korin 7:​10, 11) Mo i gat wan risen nomo long Baebol we i givim raet long tufala blong divos, hemia sipos wan long tufala i slip wetem wan narafala man no woman.​—Matiu 19:9.

14. ?Jisas i mekem olsem wanem long ol pikinini? ?Ol pikinini oli nidim we papa mama i mekem wanem?

¹⁴ Jisas i soem gudfala fasin we ol papa mama oli save mekem long ol pikinini blong olgeta. Taem ol man oli traem blokem ol pikinini blong oli no kam long Jisas, Jisas i talem long olgeta se: “!Yufala i no blokem ol pikinini ya! Yufala i letem olgeta oli kam long mi.” Nao Baebol i talem se Jisas i “putum han blong hem i goraon long ol pikinini ya, mo i putum han blong hem long olgeta, i blesem olgeta.” (Mak 10:​13-16) Jisas i tekem taem blong storian mo lesin long ol pikinini. ?Olsem wanem long yu? ?Yu yu save mekem sem fasin ya long ol boe mo gel blong yu? Oli no nidim yu wanwan taem nomo, be oli nidim we yu spenem plante taem wetem olgeta. Yu mas tekem taem blong tijim olgeta, from we hemia samting we Jehova i talem long ol papa mama blong mekem.​—Dutronome 6:​4-9.

15. ?Ol papa mama oli save mekem wanem blong protektem ol pikinini blong olgeta?

¹⁵ Wol ya i stap kam moa nogud oltaem. Taswe ol papa mama  oli mas lukaotgud long ol pikinini blong olgeta, blong ol man oli no save spolem olgeta, olsem ol man we oli save mekem i nogud wetem pikinini long saed blong seks. Tingbaot olsem wanem Jisas i lukaotgud long ol disaepol blong hem, we hem i singaot olgeta se “ol pikinini blong mi.” Taem ol man oli holem Jisas, jes bifo we hem i ded, Jisas i wokem wan rod blong ol disaepol blong hem oli save ronwe. (Jon 13:33; 18:​7-9) Yu we yu wan papa no mama, yu mas luksave kwiktaem wanem samting we Setan i save yusum blong traem spolem ol pikinini blong yu. Yu mas givim woning long ol pikinini blong yu bifo we oli kasem trabol. * (1 Pita 5:8) Tede,  trabol we i save kasem ol pikinini long saed blong bodi, spirit, mo tingting, i moa nogud i bitim bifo.

16. ?Ol papa mama oli save lanem wanem long fasin we Jisas i mekem long ol disaepol blong hem taem oli mestem?

¹⁶ Long naet bifo we Jisas i ded, ol disaepol oli agiu se hu long olgeta i hae moa. Jisas i no kam kros long olgeta. Hem i soem lav, i toktok bakegen wetem olgeta mo i soem gudfala eksampol long olgeta. (Luk 22:​24-27; Jon 13:​3-8) ?Yu we yu papa no mama, yu luksave sam fasin blong Jisas we yu yu save folem blong stretem ol pikinini blong yu? I tru se sam samtaem ol pikinini oli nidim we yumi stretem olgeta, be yumi no mas stretem olgeta long fasin we i “strong tumas” mo yumi no mas stretem olgeta wetem kros. Taem yu yu tok, i nogud ol tok blong yu oli ‘olsem naef blong faet we i stikim olgeta.’ (Jeremaea 30:11; Ol Proveb 12:18) Sipos yu stretem pikinini long wei we hem i nidim, bambae pikinini i mas luksave biaen se wanem we yu mekem no talem i stret.​—Efesas 6:4; Hibrus 12:​9-11.

17. ?Olsem wanem Jisas i wan gudfala eksampol long ol pikinini?

¹⁷ ?Ol pikinini oli save lanem samting from eksampol blong Jisas? !Yes, oli save lanem fulap samting! Jisas i soemaot olsem wanem ol pikinini oli mas obei long papa mama blong olgeta. Hem i talem se: “Mi mi stap talemaot ol samting ya nomo we Papa blong mi i tijim mi finis long hem.” Mo hem i talem tu se: “Oltaem, mi stap mekem ol samting we hem i wantem.” (Jon 8:​28, 29) Jisas i obeigud long Papa blong hem long heven, mo Baebol i talem se ol pikinini oli mas obei long papa mama blong olgeta. (Efesas 6:​1-3) Jisas i wan pikinini we i no gat sin. Nating se i olsem, hem i obei long papa mama blong hem, Josef mo Meri, we tufala i sinman. !I sua se samting ya i givhan bigwan blong holem glad insaed long famle!​—Luk 2:​4, 5, 51, 52.

18. ?From wanem Jisas i obei oltaem long Papa blong hem long heven? ?Hu i glad taem ol pikinini tede oli obei long papa mama blong olgeta?

¹⁸ ?Long wanem samting ol pikinini oli save folem fasin blong Jisas mo mekem papa mama blong olgeta i glad? I tru se samtaem ol pikinini oli save faenem i had blong obei long papa mama blong olgeta, be hemia samting we God i wantem ol pikinini blong mekem.  (Ol Proveb 1:8; 6:20) Jisas i obei oltaem long Papa blong hem long heven, nomata wanem kaen hadtaem we hem i fesem. Wan taem, Jisas i mas mekem wan samting we God i wantem hem blong mekem. Be samting ya i no isi nating. Jisas i talem se: “Plis yu tekemaot ol samting ya [we Jisas i mas mekem] we i stap mekem mi mi harem nogud.” Nating se i olsem, Jisas i mekem wanem we God i askem hem blong mekem from we hem i luksave se Papa blong hem i save wanem samting we i gud moa. (Luk 22:42) Taem ol pikinini oli lanem blong obei, bambae oli mekem papa mama blong olgeta i glad, mo tu, bambae oli mekem we Papa blong olgeta long heven i glad tumas. *​—Ol Proveb 23:​22-25.

19. (a) ?Olsem wanem Setan i traem ol pikinini? (b) ?Nogud fasin we wan pikinini i folem i save mekem wanem long papa mama?

¹⁹ Devel Setan i traem Jisas, mo yumi save sua se bambae hem i traem pulum ol yangfala tu blong oli mekem samting we i nogud. (Matiu 4:​1-10) Setan i yusum ol fren from we i had long ol yangfala blong winim traem we i kamaot long ol fren. !Taswe i impoten tumas we ol pikinini no yangfala blong yumi oli no joen wetem ol man we oli stap mekem ol nogud fasin! (1 Korin 15:33) Gel blong Jekob, nem blong hem Daena, i stap joen wetem ol gel we oli no wosipim Jehova, mo samting ya i mekem bigfala trabol i kamaot. (Jenesis 34:​1, 2) !Tingbaot soa we ful famle i save harem sipos wan long famle i mekem doti fasin long saed blong seks!​—Ol Proveb 17:​21, 25.

20. ?Wanwan memba blong famle i mas mekem wanem sipos oli wantem gat wan hapi famle?

²⁰ Taem yumi folem ol advaes blong Baebol, i isi moa blong winim ol problem insaed long famle. Tru ya, ol advaes ya oli rod ya nomo we i save mekem famle i hapi. Taswe, ol hasban, yufala i mas lavem waef blong yufala, mo yufala i mas mekem long olgeta olsem we Jisas i mekem long kongregesen. Ol waef, yufala i mas stap aninit long man blong yufala we i hed blong yufala. I gud yufala i folem fasin blong gudfala waef ya we Ol Proveb 31:​10 -31 i tokbaot. Papa mama, trenemgud ol pikinini blong yufala. (Ol Proveb 22:6) Ol papa, i gud yufala i ‘lukaot gud long famle blong yufala.’ (1 Timoti 3:​4, 5; 5:8) Mo ol pikinini, yufala i mas obei long papa mama blong yufala. (Kolosi 3:20) I no gat wan memba blong famle we i stret olgeta. Taswe i gud blong gat tingting daon mo askem narafala blong fogivim yu taem yu rong.

21. ?Wanem nambawan hop i stap long fiuja? ?Olsem wanem yumi save gat wan hapi famle naoia?

²¹ Yes, Baebol i holem plante gudfala advaes mo tijing we i save givhan long famle. Antap long hemia, Baebol i tijim yumi se bambae God i wokem wan niufala wol, wan paradaes we bambae i fulap long ol man we oli hapi mo we oli wosipim Jehova. (Revelesen 21:​3, 4) !Hemia wan nambawan hop blong yumi long fiuja! Stat naoia finis, yumi save gat wan hapi famle sipos yumi folem ol advaes we God i putum i stap long Baebol.