1. ?Wanem samting i stap givim save long saed blong fiuja?

?TAEM yu wajem nius long televisin, samtaem yu tingting se wol ya bambae i olsem wanem long ol yia we oli kam? Ol trabol oli kamaot kwiktaem nomo we man i no tingbaot nating. From samting ya, i no gat wan man we i naf blong save wanem bambae i kamtru long fiuja. (Jemes 4:14) Be, Jehova i save wanem we bambae i hapen long fiuja. (Aesea 46:10) Longtaem bifo, Tok blong hem Baebol i talemaot finis ol nogud samting ya we oli stap hapen long taem blong yumi, mo hem i talemaot tu, wanem gudfala samting we bambae i kamtru long fiuja.

2, 3. ?Wanem kwestin we ol disaepol oli askem long Jisas, mo hem i ansa olsem wanem?

² Jisas Kraes i tokbaot Kingdom blong God we bambae i finisim olgeta rabis fasin mo mekem wol ya i kam wan paradaes. (Luk 4:43) Long taem bifo, ol man oli wantem save se Kingdom ya bambae i kam wetaem. Ol disaepol blong Jisas oli askem long hem se: “?Wanem saen bambae i soemaot we yu yu kam finis mo we rabis fasin blong wol ya i kasem en blong hem?” (Matiu 24:​3, NW ) Jisas i ansa se Jehova God nomo i save stret taem we rabis fasin blong wol ya bambae i finis. (Matiu 24:36) Be hem i talemaot sam samting we bambae oli mas hapen long wol ya jes bifo we Kingdom i karem trufala pis mo seftaem i kam  long ol man. !Ol samting ya we hem i talemaot oli stap kamtru naoia!

³ Be bifo we yumi tokbaot ol pruf ya we oli soem se yumi stap finis long taem ya we “rabis fasin blong wol ya i kasem en blong hem,” i gud yumi tokbaot wan faet we ol man long wol ya oli no bin luk wetem prapa ae blong olgeta. Faet ya i hapen long heven, mo ol samting we oli hapen afta long faet ya i gat paoa long laef blong yumi.

4, 5. (a) ?Wanem i hapen long heven afta we Jisas i kam King? (b) ?Folem ol tok blong Revelesen 12:​12, wanem i mas hapen afta long faet ya long heven?

⁴ Japta 8 blong buk ya i tokbaot se Jisas Kraes i kam King long heven long yia 1914. (Daniel 7:​13, 14) Smoltaem afta we hem i kasem paoa olsem King, hem i statem wok blong hem. Baebol i talem se: “I gat bigfala faet i stat long heven. Mikael [narafala nem blong Jisas] wetem ol enjel blong hem oli stap faet agens long bigfala algita ya [Devel Setan]. Nao bigfala algita ya wetem ol enjel blong hem oli traem faet agens long Mikael olgeta.” * Setan mo ol rabis enjel blong hem oli lusum faet ya, ale olgeta long heven oli sakemaot olgeta oli kamdaon long wol. Ol gudfala enjel blong God oli glad tumas we Setan mo ol rabis enjel blong hem oli aot. Be ol man oli no glad nating. Baebol i talem se: “Sore tumas long yu, graon, . . . from we Setan i kamdaon finis long yufala. Mo hem i kros tumas, from we hem i save se i gat smol taem nomo blong hem i stap yet.”​—Revelesen 12:​7, 9, 12.

⁵ ?Yu yu makem wanem bambae i hapen afta long faet ya long heven? Setan i kros tumas, nao bambae hem i mekem trabol long ol man long wol ya. Long ol haf we oli kam biaen, bambae yu luk se yumi stap laef naoia long trabol taem ya. Be taem ya bambae i pas kwiktaem nomo, from we Baebol i talem se Setan i gat “smol taem nomo blong hem i stap yet.” Setan hem wan i luksave samting ya. Baebol i kolem smol taem ya se “ol  las dei.” (2 Timoti 3:​1, NW ) !Yumi save glad tumas se i no longtaem bambae God i finisim olgeta wok blong Setan! Naoia i gud yumi tokbaot sam samting we Baebol i talem se bambae i kamtru tede. Ol samting ya oli pruvum se yumi stap finis long ol las dei, mo se i no longtaem Kingdom blong God bambae i karem ol blesing we oli stap blong olwe long ol man we oli lavem Jehova. Fastaem, bambae yumi luk fo haf blong saen ya we Jisas i talem se i makemaot taem ya we yumi laef long hem.

6, 7. ?Olsem wanem ol tok blong Jisas long saed blong ol faet mo kakae i sot i stap kamtru tede?

⁶ “Ol man bambae oli mekem faet long ol narafala man. Mo ol kantri bambae oli mekem faet long ol narafala kantri.” (Matiu 24:7) Long handred yia we i jes pas, plante milian man oli ded long ol wo. Wan man Inglan we i raetem buk long saed blong histri, i raetem se: “I gat plante moa man i ded long ol yia 1900 i winim olgeta yia bifo. . . . I gat faet olwe nomo long ol handred yia ya, long wan ples afta nara ples i gat man i holem masket mo mekem faet, ating i gat wanwan taem nomo we ples i bin kwaet blong smoltaem.” Wan ripot we i kamaot long Worldwatch Institute i talem se: “Namba blong ol man we oli ded long olgeta faet we oli kamaot long ol yia 1900, i tri taem antap long namba blong olgeta man we oli ded long ol faet stat long  yia 100 i kam kasem yia 1899.” Yes, bitim 100 milian man oli ded long ol faet stat long 1914 i kam kasem naoia. Plante milian man oli harem nogud tumas from we oli lusum wan fren no famle long faet. Maet yu tu yu lusum wan fren no famle blong yu olsemia.

⁷ “Ol man bambae oli gat hadtaem blong kasem kakae.” (Matiu 24:7) Long ol laswan 30 yia, ol man oli bin wokem ol garen we oli givim plante moa kakae i bitim bifo. Nating se i olsem, plante man long wol oli sot yet long kakae from we oli no gat naf mane blong pem kakae no oli no save pem graon blong wokem garen. Bitim wan bilian man long ol pua kantri, oli laef evri dei long samwe 100 vatu nomo. Bighaf long olgeta ya oli stap hanggri oltaem. Wol Helt Ogenaesesen i faenemaot se bitim faef milian pikinini we oli stap ded evri yia, oli ded from we oli sot long kakae.

8, 9. ?Wanem i soem se profet tok blong Jisas long saed blong etkwek mo sik i stap kamtru?

⁸ “Bambae graon i seksek bigwan.” (Luk 21:11) Wan ripot we oli kolem U.S. Geological Survey i talem se stat long 1990, i gat samwe 19 etkwek evri yia. Ol etkwek ya oli strong naf blong spolem plante haos wantaem, mo oli stap kamaot evri yia. Ol ripot tede oli soemaot se ol etkwek oli kilim i ded tu milian man, stat long ol yia 1900. Wan ripot i talem se: “Nating se ol man oli wokem plante niu samting blong traem  katemdaon namba blong man we i ded long etkwek, be namba ya i godaon smol nomo.”

⁹ “Bambae i gat ol strong sik.” (Luk 21:11) Nating se save blong man i kam antap long saed blong sik mo meresin, ol sik blong longtaem finis wetem ol niufala sik tu oli stap gohed yet blong spolem laef blong plante man. Wan ripot i talem se 20 sik we ol dokta oli savegud finis​—sam long olgeta hemia tibi, malaria mo kolera—​oli kam antap bigwan long ol laswan 20 yia, mo sam long ol sik ya oli strong tumas, ol meresin oli no moa naf blong winim olgeta. Antap long hemia, i gat samwe 30 niufala sik we oli kamaot i no longtaem. Sam long olgeta i no gat meresin blong olgeta mo oli stap kilim man i ded.

10. ?Wanem sam fasin we yu yu luk long ol man tede olsem we 2 Timoti 3:​1-5 i tokbaot?

¹⁰ Baebol i tokbaot ol samting we bambae oli hapen long wol long taem ya blong ol las dei, mo hem i tokbaot wan jenis we bambae i kamaot long fasin blong ol man tu. Aposol Pol i talem se bighaf blong ol man bambae oli olsem wanem. Long 2 Timoti 3:​1-5 (NW ) yumi ridim se: “Taem blong ol las dei bambae i strong tumas, bambae i had blong winim ol trabol.” Hemia sam long ol samting we hem i talem se bambae yumi save luk long laef blong ol man:

•   Oli laekem olgeta nomo

• Oli laekem mane tumas

• Oli no obei long papa mama blong olgeta

• Oli no gat fasin blong stap tru long God mo long narafala man

• Oli no gat sore long ol narafala man

• Oli no save bos long tingting blong olgeta

• Oli wael olgeta

• Oli laekem moa ol pleplei, i winim we oli laekem God

• Long fes blong ol man, i luk olsem we oli man blong God, be oli giaman nomo

11. ?Olsem wanem Ol Sam 92:7 i tokbaot samting we bambae i hapen long ol rabis man?

¹¹ ?Yu yu luk we ol man long ples blong yu oli kam olsem? Ating yu luk finis. I gat man olsem long evri ples. Hemia i soem se i no longtaem nao bambae God i mekem wan samting. Baebol i talem se: “Taem ol man nogud oli kam plante olsem ol samting we oli gru long bus, mo taem ol man we oli stap mekem ol rabis fasin oli kam plante olsem olgeta flaoa we oli gru gud, long taem ya nao oli mas finis blong olwe.”​—Ol Sam 92:​7, NW.

12, 13. ?Olsem wanem “tru save” i kam antap long “taem blong en”?

¹² Ol las dei oli fulap long ol trabol we i mekem man i sore, olsem we Baebol i bin  talem. Be long trabol taem ya i gat sam gudgudfala samting we oli stap kamtru long ol man blong Jehova.

¹³ Buk blong Daniel long Baebol i talemaot se: “Bambae tru save i kam fulap.” ?Samting ya bambae i hapen wetaem? Bambae hem i hapen long “taem blong en.” (Daniel 12:​4, NW ) Antap moa, stat long 1914, Jehova i halpem ol man we oli rili wantem mekem wok blong hem, blong oli gru long save long saed blong Baebol. Olgeta ya oli kasem moa save long ol trutok long saed blong nem blong God mo stamba tingting blong Hem, ransom sakrefaes blong Jisas Kraes, mo trutok long saed blong ol dedman mo laef bakegen long ded. Antap long hemia, ol man blong Jehova oli lanem blong laef long fasin we i mekem i gud long olgeta mo we i presem Jehova. Mo tu, oli klia moa long saed blong ol wok we Kingdom blong God bambae i mekem mo olsem wanem hem bambae i stretem ol trabol long wol ya. ?Oli mekem wanem wetem save ya? Kwestin ya i pulum yumi blong tingbaot wan narafala profet tok we i stap kamtru long ol las dei naoia.

14. ?Wok blong talemaot gud nius blong Kingdom i bigwan olsem wanem tede? ?Hu olgeta we oli stap mekem wok ya?

¹⁴ Taem Jisas Kraes i talem profet tok blong hem long saed blong ‘en blong rabis fasin blong wol ya,’ hem i se: “Gud nius ya blong Kingdom, bambae ol man oli talemaot long olgeta ples long wol, blong oli witnes long hem long fes blong olgeta man, nao biaen bambae en i save kam.” (Matiu 24:​3, 14, NW ) Gud nius ya blong Kingdom i stap goaot long bitim 230 kantri mo long bitim 400 lanwis raon long wol. Gud nius ya i talemaot se Kingdom hem i wanem samting, bambae hem i mekem wanem, mo olsem wanem ol man oli save kasem ol blesing blong Kingdom ya. Plante milian Witnes blong Jehova oli stap wok strong blong talemaot gud nius ya blong Kingdom. Ol man mo woman ya oli kamaot long “olgeta kala, mo long olgeta kantri, mo long olgeta laen, mo long olgeta lanwis.” (Revelesen 7:9) Ol Witnes oli stap mekem fri Baebol stadi wetem plante milian man we oli wantem save wanem we Baebol i tijim. !Yumi glad tumas blong luk we profet tok ya i stap kamtru long bigfala fasin olsem, antap moa taem yumi tingbaot we Jisas i bin talem se ‘ol man bambae oli no laekem nating’ ol trufala Kristin we oli mekem wok ya!​—Luk 21:17.

15. (a) ?Yu yu bilif se yumi stap long ol las dei? ?From wanem? (b) ?Taem “en” i kam, wanem bambae i hapen long ol man we oli agensem Jehova, mo long ol man we oli glad blong stap aninit long rul blong Kingdom blong God?

¹⁵ ?From we i gat plante profet tok we oli stap kamtru tede, yu yu agri se yumi stap naoia long ol las dei? Afta we gud nius i goaot kasem mak we Jehova i wantem, ale “en” bambae i kam. (Matiu 24:​14, NW ) “En” i minim taem ya we God bambae i spolem ol rabis fasin mo ol rabis man long wol ya. Jehova bambae i yusum Jisas mo ol strongfala enjel blong hem blong spolem olgeta man we oli agensem Hem. (2 Tesalonaeka 1:​6-9) Setan mo ol rabis enjel blong hem bambae oli no moa lidim ol man long wol ya oli go krangke. Afta long samting ya, Kingdom blong God bambae i blesem olgeta we oli wantem stap aninit long rul blong God we i stret gud olgeta.​—Revelesen 20:​1-3; 21:​3-5.

16. ?I waes se yu mekem wanem?

¹⁶ From we en blong rabis wol blong Setan i kam klosap finis, yumi mas tingting dip long kwestin ya se, ?Mi mi mas mekem wanem naoia? I waes blong traem save moa long saed blong Jehova mo ol samting we hem i wantem yumi blong mekem. (Jon 17:3) Tinghevi long stadi blong Baebol. Tekem fasin ya blong joen oltaem wetem ol man we oli wantem mekem ol samting olsem we Jehova i wantem. (Hibrus 10:​24, 25) Tekem save blong Jehova God we i plante tumas. Jehova i wokem rod blong ol man raon long wol oli save kasem save ya. Ale, jenisim ol samting long laef blong yu blong mekem se God i save glad long yu.​—Jemes 4:8.

17. ?From wanem dei blong Jehova bambae i mekem bighaf blong ol man i sek?

¹⁷ Jisas i talem finis se plante man bambae oli no wantem luksave ol pruf se yumi stap long ol las dei. En blong ol rabis man bambae i kam wantaem nomo, long taem we man i no tingbaot. Olsem wan stilman we i kam long naet mo i mekem man i sek, taem en bambae i kam, bighaf blong ol man bambae oli sek. (1 Tesalonaeka 5:2) Jisas i givim woning se: “Long taem ya we mi, mi Pikinini blong Man mi kamtru, bambae i olsem taem blong  Noa bifo, we ol man oli no rere. Long taem ya, taem we wota i no ron bigwan yet, ol man oli stap kakae, mo oli stap dring, mo oli stap mekem mared, go kasem taem we Noa i go insaed long bigfala sip blong hem. Mo olgeta ya oli no save se bambae trabol i kam, gogo wota i ron bigwan, i tekemaot olgeta. Nao long taem ya we mi, mi Pikinini blong Man mi kamtru, bambae i sem mak nomo.”​—Matiu 24:​37-39.

18. ?Wanem woning blong Jisas we yumi mas tinghevi long hem?

¹⁸ Taswe Jisas i talem long ol man long taem blong hem se: “Yufala i mas lukaot gud. Yufala i no mas westem taem blong yufala long fasin ya we yufala i stap ronem lafet, mo yufala i stap drong, mo yufala i stap tingting tumas long laef blong wol ya. I nogud Dei ya blong mi i kam kasem yufala wantaem nomo, we yufala i no tingbaot nating, olsem we yufala i fas long wan trap, from we dei ya bambae i kasem olgeta man long wol. Be oltaem, yufala i mas rere, mo yufala i mas prea. Sipos yufala i mekem olsem, bambae yufala i gat paoa blong ronwe long olgeta trabol ya, mo bambae yufala i save stanap long fes blong mi, mi Pikinini blong Man we yufala i no sem.” (Luk 21:​34-36) I waes blong tinghevi long ol tok ya blong Jisas. ?From wanem? !From we olgeta we Jehova God mo “Pikinini blong Man,” Jisas Kraes, oli glad long olgeta, oli gat hop blong laef tru long en blong wol ya blong Setan mo blong laef olwe long wan nambawan niufala wol we i klosap nao!​—Jon 3:16; 2 Pita 3:13.