HAF 7
?Taem Baebol i Tokbaot Kingdom Blong God, Hem i Minim Wanem?
1. ?Kingdom blong God, hem i wanem?
?Wanem i mekem se Jisas i wan gudfala King?—MAK 1:40-42.
Kingdom blong God, hem i gavman blong God long heven. Kingdom ya bambae i tekem ples blong ol gavman blong man, mo bambae i mekem samting we God i wantem i kamaot long heven mo long wol. !Hemia gud nius ya! Ol man oli nidim wan gudfala gavman. I no longtaem, Kingdom blong God bambae i mekem olgeta man long wol oli joen gud.—Ridim Daniel 2:44; Matiu 6:9, 10; 24:14.
Jehova i jusum Pikinini blong hem, Jisas, blong hem i King blong Kingdom ya.—Ridim Revelesen 11:15.
Wajem video ya ?Wanem Ya Kingdom Blong God?
2. ?From wanem Jisas i wan gudfala King?
Pikinini blong God hem i wan gudfala King from we hem i kaen gud, mo oltaem hem i mekem i stret. ( Jon 1:14) Mo tu, hem i gat paoa blong givhan long ol man, from we hem bambae i rul antap long heven mo wol. Taem hem i laef bakegen, hem i go antap long heven, i sidaon long raetsaed blong Jehova, i wet. (Hibrus 10:12, 13) Long stret taem, God i givim paoa long hem blong i rul.—Ridim Daniel 7:13, 14.
3. ?Hu bambae i rul wetem Jisas?
Baebol i talem se “olgeta ya we oli tabu man blong God” bambae oli rul wetem Jisas long heven. (Daniel 7:27, NW ) Ol gudfala aposol blong Jisas, olgeta nao oli fas man long grup ya. Kam kasem tede, Jehova i stap jusumaot sam man mo woman we oli holemstrong long hem, blong oli kam ol tabu man blong hem. Taem oli ded, God i mekem olgeta oli laef bakegen wetem wan bodi we i blong laef long heven, olsem Jisas.—Ridim Jon 14:1-3; 1 Korin 15:42-44.
?Hamas man bambae oli go long heven? Jisas i talem se oli “no plante.” (Luk 12:32) Fulnamba blong olgeta bambae i kasem 144,000. Bambae oli joen wetem Jisas blong rul long olgeta man long wol.—Ridim Revelesen 14:1.
4. ?Wanem i hapen taem Jisas i kam King?
Jisas i kam King long yia 1914. a Smoltaem biaen, hem i sakemaot Setan wetem olgeta enjel blong hem, oli aot long heven oli kamdaon long wol. Setan i kros tumas, nao hem i mekem bigfala trabol i kamaot long wol. (Revelesen 12:7-10, 12) Afta long taem ya, trabol i kam antap bigwan. I gat faet, kakae i sot, i gat ol rabis sik, mo graon i seksek bigwan. Olgeta samting ya oli olsem “saen” blong soemaot se i no longtaem, Kingdom blong God bambae i rulum fulwol.—Ridim Luk 21:7, 10, 11, 31.
5. ?Kingdom blong God i stap mekem wanem naoia? ?Bambae hem i mekem wanem long fiuja?
Kingdom blong God i stap lidim wok blong prij long olgeta ples long wol, blong pulum plante man oli joen long wan bigfala kampani we i gat pis mo i joen gud. Plante milian man we tingting blong olgeta i stap daon, oli wantem we Jisas i rul long olgeta. Kingdom bambae i sevem ol man ya taem i spolem ol rabis fasin blong wol. Taswe, ol man we oli wantem kasem ol blesing we Kingdom blong God bambae i givim, oli mas lanem blong obei long Jisas.—Ridim Revelesen 7:9, 14, 16, 17.
Long taosen yia we Kingdom ya bambae i rulum wol, sloslo tingting we God i gat fastaem bambae i kamtru. Wol ya bambae i kam paradaes. Biaen, bambae Jisas i givimbak Kingdom ya long Papa blong hem. (1 Korin 15:24-26) ?Yu yu tingbaot wan man we yu wantem talemaot Kingdom blong God long hem? Ale, yu no mas wet.—Ridim Ol Sam 37:10, 11, 29.
a Sipos yu wantem save moa long profet tok blong 1914, plis lukluk pej 215-218 blong buk ya ?Wanem Samting We Baebol i Rili Tijim?
