Plante handred taosen man oli stap baptaes evri yia, taswe yumi nidim plante moa bilding blong yusum long wosip blong Jehova. From samting ya, long 2020 sevis yia, Lokol/Disaen Konstraksen i bin mekem plan blong bildim o wokem gud bakegen bitim 2,700 haos wosip long fulwol. a

 Sore tumas, COVID-19 pandemik i mekem se sam long ol plan ya oli no save kamtru. Pablising Komiti blong Hed Kampani i stopem bighaf blong ol projek ya, blong protektem ol brata mo sista mo blong obei long ol rul blong gavman. Nating se i olsem, long 2020 sevis yia, bifo long pandemik, oli bildim mo wokem gud bakegen bitim 1,700 ples blong wosip. Mo tu, oli finisim bitim 100 projek blong bildim ol branj ofis. Traem tingbaot olsem wanem tu long ol konstraksen projek we oli finisim, i givhan long ol brata mo sista.

 Kamerun branj ofis. Olfala branj ofis long Douala i smol tumas mo i nidim plante wok blong mekem i gud bakegen. Pablising Komiti i bin tingbaot blong wokem gud branj ofis ya bakegen, be from we hem i olfala mo i gat tumas wok blong mekem, bambae oli yusum tumas mane. Oli tingbaot tu blong bildim wan niufala branj ofis long wan narafala ples o pem wan bilding mo wokem gud bakegen, be tufala samting ya i no kamtru.

 Stret long taem ya, ol brata oli harem nius se long not blong Douala, gavman i gat plan blong wokem wan bigfala rod klosap nomo long wan Haos Asembli. Rod ya bambae i mekem se i moa isi blong kasem Haos Asembli, mo tu, bambae oli putum wota mo lektrik long eria we Haos Asembli i stap long hem. Hemia ol samting we oli nidim blong bildim wan branj ofis. Taswe Hed Kampani i agri se oli save bildim wan niufala branj ofis long wan pis graon klosap long Haos Asembli.

 Ol Witnes mo ol narafala man blong wok we oli pem olgeta, oli wok wanples long projek ya, mo hemia i sevem taem mo mane. Blong talem stret, oli no yusum bigfala mane olsem oli bin tingbaot fastaem, be oli sevem bitim 219 milian vatu. Bifo we COVID-19 i kamaot, Betel famle i muv i go long niufala bilding ya.

 Ol Betelaet long Kamerun oli luk niufala branj ofis ya olsem wan presen we Jehova i givim, from we i wan ples we i moa gud blong laef long hem mo wok long hem. Wan kapol i talem se: “Mifala i wantem wok had moa, blong soemaot se mifala i tinghae long presen ya.”

 Toholabal Translesen Ofis (RTO), Meksiko. Plante yia, translesen tim blong Toholabal i wok long Sentrol Amerika branj ofis, we i stap klosap long Meksiko Siti. Be bighaf blong ol man we oli toktok lanwis Toholabal, oli stap long Altamirano mo Las Magaritas, hemia klosap 1,000 kilometa longwe long branj ofis. From samting ya, i had blong ol transleta oli save ol jenis we i kamaot long Toholabal lanwis. Mo tu, i had blong branj ofis i faenem ol gudfala brata mo sista klosap, we oli save joen long translesen long Toholabal mo mekem ol rikoding.

 From ol risen ya, Raeting Komiti blong Hed Kampani i wantem muvum translesen tim blong Toholabal i go long ples we ol man oli toktok lanwis ya. Ale branj ofis i mekem desisen blong pem wan bilding mo wokem gud bakegen. Hemia i moa jip i bitim we oli bildim wan niufala bilding o rentem wan ples.

 Wan transleta i eksplenem olsem wanem plan ya i givhan long hem, i se: “Long ol ten yia we mi wok long branj ofis, mi no mitim wan famle klosap long ples ya we i toktok lanwis blong mi. Naoia translesen ofis i stap stret long medel blong ol man we oli toktok lanwis Toholabal. Mi toktok wetem olgeta evri dei. Mi lanem plante niufala toktok mo hemia i givhan long wok blong mi.”

 Sipos situesen i gud long 2021 sevis yia, i gat plan blong wok long 75 translesen ofis mo ples blong mekem ol Baebol skul. Wok bambae i gohed long eit bigfala branj ofis, wetem projek blong niufala Wol Hedkwota long Ramapo, New York, mo wok blong jenisim ples blong branj ofis long Ajentina mo Itali. Mo tu, i nidim bitim 1,000 niufala Haos Kingdom, mo i gat bitim 6,000 haos miting we oli mas tekemaot mo bildim niuwan long ples blong olgeta. Mo tu, i gat 4,000 Haos Kingdom we oli mas wokem gud bakegen.

 ?Mane i kam wea blong mekem ol wok ya? Brata Lasaro Gonsales, we i wan memba blong branj komiti blong Sentrol Amerika, i ansarem kwestin ya taem hem i tokbaot plan blong bildim translesen ofis blong Toholabal lanwis, i se: “Long ol ples we branj ofis i lukaot long olgeta, ol man oli no gat plante samting. Taswe sipos ol brata long ol nara ples oli no givhan long mifala, bambae mifala i no naf blong bildim ol translesen ofis long ples ya. Ol mane we ol brata long ol narafala ples long wol oli givim, i givhan blong putum ol transleta stret long ol ples we ol man oli toktok lanwis blong olgeta. Mifala i talem bigfala tangkiu long ol brata long fulwol from presen mane blong olgeta.” I tru tumas, ol projek ya oli save gohed nomo from ol presen mane we yufala long fulwol i givim, mo plante long yufala i givim tru long websaet ya donate.mr1310.com.