Long 19 Mei 2022, United Nations Security Council i kasem ripot long bitim 75 haeman se: “COVID-19 pandemik mo weta we i jenis, i mekem se kakae i kam sot moa long fulwol, be from wo long Yukren, i kasem mak we plante man oli hanggri.” Smoltaem afta, The Economist i talem se: “I gat plante problem finis long wol, be wo i mekem se bambae i gat plante moa man oli hanggri.” Baebol i talemaot se samting ya bambae i hapen long taem blong yumi, mo tu i halpem yumi blong fesem.

•   Jisas i talemaot se: “Bambae ol nesen oli faet agensem ol narafala nesen, mo ol kingdom oli faet agensem ol narafala kingdom. . . . [Mo] bambae kakae i sot.”—Matiu 24:7.

•   Buk blong Revelesen i tokbaot fo man we oli ron long hos. Wan long ol man ya i representem faet. Biaen long hem, i gat man we i representem kakae i sot, hemia wan taem we i had blong kasem kakae mo ol man oli salem kakae long praes we i sas tumas. “Mi luk wan blak hos, mo man we i sidaon long hem i holem wan skel long han blong hem. Mi harem wan voes . . . i talem se: ‘!Praes blong wan kwot wit hemia mane we yu winim long wan fuldei! Praes blong tri kwot bale hemia mane we yu winim long wan fuldei tu.’”—Revelesen 6:5, 6, Contemporary English Version.

 Ol profet tok we oli talemaot se kakae i sot, oli stap kamtru tede long taem ya we Baebol i singaot se “ol las dei.” (2 Timoti 3:1) Blong save moa long saed blong “ol las dei” mo ol fo man ya long hos we Revelesen i tokbaot, wajem video ya Ol Samting Long Wol Oli Jenis Stat Long 1914, mo ridim atikol ya “Ol Fo Man Ya Long Hos—?Oli Hu?”

•   Long Baebol i gat ol gudfala advaes we oli save givhan long yu blong fesem ol trabol, olsem praes blong kakae i go antap mo kakae i sot. Yu save ridim sam gudfala advaes long atikol ya “Laef Wetem Smol Mane Nomo.”

•   Mo tu, Baebol i givim hop long yumi se bambae ol samting i jenis i kamgud moa. Baebol i promes se: “Bambae i gat fulap garen blong sid long olgeta ples long wol,” mo bambae i gat plante kakae blong evri man. (Ol Sam 72:16) Blong save moa long hop we Baebol i givim long saed blong fiuja, mo from wanem yu save trastem, ridim atikol ya “Trufala Hop Blong Wan Gudfala Fiuja.”